Ўқувчи-ёшлар ўртасида китобхонлик маданиятини ривожлантиришга қаратилган ташаббус

Бугунги кунда ёшларнинг бўш вақтларини ахборот технологиялари ва турли медиа ресурсларга сарфлаётгани уларнинг китобга бўлган қизиқишини ошириш бўйича янгича ёндашувларни талаб этмоқда. Шу мақсадда Ўзбекистон Ёшлар ишлари агентлиги томонидан “Мутолаа” лойиҳаси йўлга қўйилган бўлиб, мазкур лойиҳадан ёшлар ўртасида китобхонлик маданиятини шакллантириш ва интеллектуал ривожланишни рағбатлантириш мақсад қилинган. Лойиҳа доирасида ўзбек ва жаҳон адабиётининг сара асарлари аудио ва электрон форматларда кенг оммага тақдим этилмоқда. Шунингдек, китобхонликни рағбатлантириш мақсадида интеллектуал мусобақалар, танловлар ва турли тадбирлар ўтказилмоқда.

Яқинда Амударё туманининг Арна бўйи маҳалласи ёшлар етакчиси Шаҳзод Нуратдинов ташаббуси билан 27-сонли мактабда ўқувчи-ёшлар ўртасида китобхонликни кенг тарғиб қилиш ва “Мутолаа” лойиҳаси имкониятларидан самарали фойдаланиш мақсадида “Заковат” интеллектуал ўйини ташкил этилди.

Тадбирда мактаб директори Қуват Жўраев, туман Ёшлар ишлари бўлими бош мутахассиси Даврон Бозорбоев, Миллий гвардия ходими Исламбек Ембергеновлар иштирок этишди. Тадбирга она тили ва адабиёт фани ўқитувчилари Зайнаб Матчанова ва Зайнаб Ибрагимовалар бошловчилик қилишди.

Интеллектуал мусобақа мактабнинг юқори синф ўқувчиларидан иборат 6 та жамоа ўртасида ўтказилди. Баҳс учун саволлар “Мутолаа” иловасида мавжуд бўлган бадиий дурдоналар – Абдулҳамид Чўлпоннинг “Кеча ва кундуз”, Абдулла Қаҳҳорнинг “Даҳшат”, Ўткир Ҳошимовнинг “Дунёнинг ишлари”, Худойберди Тўхтабоевнинг “Сариқ девни миниб” ва Пауло Коэльонинг “Алкимёгар” асарлари асосида тузилди.

Жамоалар ушбу асарларнинг мазмуни, қаҳрамонлари, ғояси ва тарихий жиҳатлари бўйича билимларини синовдан ўтказишди. Беллашув қизғин ва баҳсли тарзда ўтди, китоб мутолаасига қизиқувчан ёшлар ўз билимларини намоён этишди.

Маҳалладаги ёшлар етакчиси Шаҳзод Нуратдинов интеллектуал ўйинлар ёшларни китоб мутолаасига ундашда самарали восита бўлиб, уларнинг билим доирасини кенгайтириш, тафаккурини юксалтириш ва ўз устида ишлашга рағбатлантиришда муҳим ўрин тутишини таъкидлади. Шунингдек, у мактаб кутубхонаси билан ҳамкорликда ўқувчиларни мунтазам китоб ўқишга жалб қилиш мақсадида бу каби ташаббусларни доимий равишда амалга ошириш ниятида эканини билдирди. Таъкидлаш жоизки, интеллектуал мусобақа ўқувчиларнинг мактаб кутубхонасидан фаолроқ фойдаланишига ва китобхонлар сафи ортишига хизмат қилди.

20 раунддан иборат беллашув натижаларига кўра, 9-"B" синф жамоаси 14 та тўғри жавоб билан 1-ўрин соҳиби бўлди. Фахрли ўринларни эгаллаган жамоалар ёшлар етакчиси томонидан китоб жамланмалари ҳамда пул мукофоти билан тақдирланди. Шунингдек, ўқувчиларнинг тарихий-маданий билимларини бойитиш мақсадида ғолиб ва совриндор жамоалар Хива шаҳрига саёҳат қилиш имконига эга бўлишди.

Бундай лойиҳалар ёшлар ўртасида интеллектуал муҳитни шакллантириб, уларни билимга ошно этишга хизмат қилади. “Мутолаа” лойиҳаси ва “Заковат” интеллектуал ўйини ёш авлоднинг тафаккурини чархлаб, мустақил фикрлаш қобилиятини ривожлантиришга катта ҳисса қўшади.

Шоҳзод Қурбонбоев.