АЛИШЕР НАВОИЙ ДАҲОСИГА ҲУРМАТ ВА ЭҲТИРОМ КЎРСАТИЛДИ
Миллий маънавиятимиз, мумтоз адабиётимизни буюк бобокалонимиз – сўз мулкининг султони Мир Алишер Навоийсиз тасаввур қила олмаймиз. Шу боис, нафақат мамлакатимизда, балки бутун дунёда Навоий даҳосига юксак ҳурмат ва эҳтиром рамзи сифатида унинг асарлари севиб ўқилади. Навоий меросини чуқур ўрганиш борасида илмий изланишлар олиб борилиб, дунё навоийшунослари иштирокида илмий-амалий анжуманлар ўтказилади. Мақсад эса ягона – буюк мутафаккир асарларидаги умуминсоний қадриятларни ўсиб келаётган ёш авлод қалбига сингдириш, уларни чин маънодаги ватанпарвар, халқпарвар инсонлар қилиб тарбиялашдир.
Президент мактаблари тизимидаги Амударё ихтисослаштирилган мактабида туман Маданият бўлими билан ҳамкорликда Алишер Навоий таваллудининг 584 йиллиги муносабати билан ўтказилган “Навоийхонлик” кечасида ҳам шоирнинг асрлар давомида ўз қадр-қимматини йўқотмаган шеър-у ғазаллари, рубоий ва туюқлари, ҳамон дунё халқларини ўзига мафтун этиб келаётган достонлари ҳақида маърузалар ўқилиб, шоир ғазаллари билан айтиладиган ашулалар ижро этилди.
Тадбирни мактаб директорининг ўқув ишлари бўйича ўринбосари Равшан Холмуродов очди ва мамлакатимизда Алишер Навоий меросини ўрганиш, унинг фалсафий, ижтимоий-маънавий аҳамиятга эга асарларида илгари сурилган ғояларни ўсиб келаётган ёш авлод онгига сингдириш борасида амалга оширилаётган ишлар ҳақида батафсил сўз юритди. Айниқса, 2025 йил Президентимиз томонидан Навоий вилоятида “Алишер Навоий йили” деб белгилангани, шу муносабат билан жорий йилда мамлакатимиз миқёсида ўтказилиши режалаштирилган адабий-бадиий, мусиқий тадбирлар, халқаро илмий-амалий анжуманлар ташкил этилиши, бу каби тадбирларда Навоий асарлари билимдонлари бўлмиш умумтаълим мактабларининг ўқувчилари ҳам иштирок этиши хусусида мамнуният билан таъкидлади.
Шундан сўнг, мактаб ўқувчилари шоир ғазалларидан намуналар ўқидилар, “Хамса” достони ва ушбу достонда илгари сурилган ҳалоллик, касб-у ҳунарга эътибор, тўғрисўзлик, халқлар дўстлиги, ўзаро тотувлик, меҳр-оқибат, ватанпарварлик ҳамда халқпарварлик ғоялари хусусидаги фикрларини билдирдилар.
Тадбир давомида мактабнинг “Турон” театр жамоаси томонидан саҳна кўриниши намойиш этилди. Саҳна кўриниши орқали тадбир иштирокчилари гўё бир муддат Алишер Навоий яшаб ўтган давр воқеаларига гувоҳ бўлишиб, салкам олти асрдан бери ҳамон долзарблигини йўқотмаган эзгу ғоялар оғушига шўнғидилар. Амударё туман Маданият бўлими санъаткорлари томонидан маромига етказиб ижро этилган Навоий ғазалларига басталанган мумтоз наволар, мактабнинг бадиий ҳаваскорлар жамоаси талқинидаги дилрабо рақслар барчага маънавий руҳ бағишлади.
Амударё туман Маданият бўлими ва Президент мактаблари тизимидаги Амударё ихтисослаштирилган мактаби педагогика жамоаси ҳамкорлигида ташкиллаштирилган “Навоийхонлик” кечаси ўқувчи-ёшлар қалбида миллий-маънавий қадриятларга, мумтоз адабиётимиз, айниқса, буюк мутафаккир олим, давлат ва жамоат арбоби Ҳазрат Алишер Навоий даҳосига меҳр, ҳурмат ва эҳтиром туйғусини янада мустаҳкамлади.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
