САРҲАДЛАРИМИЗ ДАХЛСИЗЛИГИ, ОНА ВАТАН ТИНЧЛИГИ ЙЎЛИДА ХАЛҚ ВА АРМИЯ – БИР ТАН-У БИР ЖОНДИР

14 ЯНВАРЬ—ВАТАН ҲИМОЯЧИЛАРИ КУНИ

Касблар ичида энг машаққатлиси ва энг шарафлиси – бу она Ватан ҳимоячиси бўлишдир. Она Юрт сарҳадларида собит туриб, ўз киндик қони томган тупроқ дахлсизлигини таъминлаш, халқ осойишталиги, тинч ва фаровон ҳаёти учун дахлдорлик туйғуси билан яшаш эса Ватан ўғлонларига хос. Шу боис, Мустақил Ўзбекистонимиз тарихидаги ёрқин саҳифа – 14 январь – Ватан ҳимоячилари куни нафақат ҳарбий хизматчилар, балки Қуролли кучлар сафида муқаддас бурчини ўтаб қайтган аскарлар, ҳарбий хизматга бориш учун шайланаётган минглаб мард ва навқирон йигитларнинг, меҳнатсевар ва олийжаноб халқимизнинг энг азиз ва шарафли байрами сифатида ҳар йили кенг нишонланади. Чунки халқимиз ва ватанпарвар фарзандлари учун Она Юрт ҳимояси қанчалик эзгу ва муқаддас бўлса, Миллий Армиямиз қудратини ҳамда ана шу қудратли Армияни шарафлаш, қалбларида Ватанга чексиз садоқат туйғулари билан бу азиз кунни байрам қилиш бебаҳо қадриятдир.

Ўзбекистон Республикаси Қуролли Кучлари бугунги кунда жаннатмакон юртимизнинг буюк келажаги, халқимизнинг эртанги умиди, истиқболли режалар ва хайрли ишларимизнинг давомчиси бўлмиш ёшларимизни ҳарбий ватанпарварлик руҳида тарбиялаш, уларни ҳарбий касбга йўналтириш, қалбларида мамлакат келажаги учун фуқаролик масъулияти ҳиссини оширишга хизмат қилувчи етакчи институтга айланди. Бу сўнгги йилларда мамлакатимизда “Халқ ва армия – бир тан-у бир жон” тамойили асосида амалга оширилаётган улкан ишларда ўз аксини топмоқда. Халқ Миллий Армиянинг ҳар томонлама қудрати ва ёрдамини ҳаётнинг барча соҳаларида чин дилдан ҳис этмоқда.

Чунки мамлакатимизнинг барча жабҳаларини қамраб олаётган ислоҳотлар, Янги Ўзбекистонни барпо этиш борасидаги саъй-ҳаракатлар юртимизда ҳарбий касбнинг обрў-эътиборини, армия ва халқ якдиллигини, ёшларимиз қалбида армиямиз билан фахрланиш туйғусини ҳамда Ватан ҳимоячиси бўлишдек олийжаноб касбга ҳурмат-эҳтиром ҳиссини янада кучайтиришга хизмат қилмоқда.

Амударё туман Мудофаа ишлари бўлими томонидан “Халқ ва армия – бир тан-у бир жон” тамойили асосида амалга оширилаётган маънавий-маърифий ва ҳарбий ватанпарварлик мавзусидаги ишлар мазмун-моҳиятида ҳам Қуролли Кучларимиз жанговар қобилиятини ошириш, мамлакатимизнинг мудофаа қобилиятини мустаҳкамлаш, қўшинларни замонавий қурол-аслаҳалар, ҳарбий техника ва алоқа воситалари билан таъминлаш ҳамда такомиллаштириш, касбий маҳорати юқори даражада шаклланган, ўз бурчига содиқ, ватанпарвар, мард ва жасур ҳарбийларни тарбиялаш, чинакам Ватан ҳимоячиси бўлишга қодир ёшларни ҳарбий хизматга тайёрлашдек эзгу ва шарафли мақсад мужассам.

Хусусан, ўтган 2024 йилда Амударё туман Мудофаа ишлари бўлими томонидан “Умумий ҳарбий мажбурият ва ҳарбий хизмат тўғрисида”ги Ўзбекистон Республикаси Қонунининг 18-моддасига асосан 2002 нафар амударёлик ёшлар рўйхатга олинди ва мутахассислар томонидан қатъий назорат асосида саралаш ишлари амалга оширилди. Жисмонан ва ақлан етук, ҳарбий хизматга лаёқатли йигитлар қўшинларни бутлаш учун муддатли ҳарбий хизматга ва сафарбарлик чақируви резерви хизматига юборилди.

Шуниси қувонарлики, ҳар иккала йўналишдаги ҳарбий хизматга юборилган йигитларнинг барчаси ўзлари хизмат бурчларини адо этаётган ҳарбий қисмларда намунали хулқ-атворлари, жанговар тайёргарлик машғулотларидаги эпчилликлари ҳамда қатъиятлари билан сафдошларига ўрнак бўлишмоқда.

Мудофаа ишлари бўлими билан туман Мактабгача ва мактаб таълими бўлими тасарруфидаги умумтаълим мактабларининг Чақириққа қадар бўлган тайёргарлик бўйича ҳарбий таълим раҳбарларининг ўзаро ҳамкорлиги натижасида биргина 2024 йилда умумтаълим мактабларининг 11-синф ўқувчиларидан иборат 2002 нафар ўқувчи-ёшлар иштирокида Нукус дала-ўқув майдонида амалий ўқ отиш машғулотлари амалга оширилиб, уларнинг мерганлик қобилиятлари, ҳарбий касбга нисбатан қизиқиш ва интилишлари синовдан ўтказилди.

Шунингдек, амударёлик ёшлар орасидан Қуролли Кучлар қўшинлари учун ноёб мутахассисларни тайёрлаш мақсадида 21 нафар ҳарбий хизматга мажбур фуқаролар дала-ўқув майдонида махсус тайёргарликдан ўтказилди. Ўзини-ўзи бошқариш органлари билан ҳамкорликда 18-27 ёшгача бўлган 9400 нафар чақирилувчилар ва уларнинг ота-оналари билан маҳаллабай тизимда хонадонма-хонадон юриб, чақирилувчиларнинг оилавий аҳволи, соғлиги, интеллектуал салоҳияти ва ҳарбий касбга бўлган қизиқишлари ўрганиб чиқилиб, тарғибот-ташвиқот ишлари олиб борилди.

Натижада 2025 йилги чақирув мавсумида муддатли ҳарбий хизматга ва сафарбарлик чақируви резерви хизматига сараланиб, танловларга жалб этилаётган жисмонан етук ва баркамол ёшлар ҳар қачонгидан ҳам кўп. Ўтган 2024 йилда “Темурбеклар мактаби”га 4 нафар, Олий ҳарбий таълим муассасасига 3 нафар ёшлар ўқишга қабул қилинган бўлса, 2025 йилда амударёлик ёшлар орасида Она Ватан ҳимоячиси бўлишдек шарафли касбни эгаллаш иштиёқидаги ёшлар сафи янада ошиши кутилмоқда. Айни пайтда 98 нафар амударёлик мард ва жасур ўғлонлар мамлакатимизнинг турли ҳудудларида ўзларининг Ватан олдидаги муқаддас бурчларини шараф билан адо этишмоқда. Шунингдек, 263 нафар ёшлар муддатли ҳарбий хизматни ва 650 нафар ёшлар эса сафарбарлик чақирув резерви хизматини ўташга шайланишмоқда.

Шу кунларда, яъни 2024 йилнинг 15 декабрь санасидан 2025 йилнинг 15 январь кунига қадар мамлакатимизнинг барча ҳудудларида бўлгани сингари Амударё туманида ҳам “Янги Ўзбекистон Армияси – мамлакат таянчи, халқимиз фахри” шиори остида Қуролли Кучлар фахрийлари, зиёлилар, спортчилар, ҳарбий хизматчилар ва жамоат ташкилотлари вакиллари иштирокида умумтаълим мактаблари, ҳарбий қисмлар ҳамда маҳалла фуқаролар йиғинларида, аҳолининг кенг қатламлари орасида маданий-маърифий, ҳарбий ватанпарварлик ва спорт тадбирлари ўтказилмоқда. Ўтказилаётган тадбирларда халқимиз жипслиги, Янги Ўзбекистон Армиясидан фахрланиш туйғуси баралла акс этмоқда.

Ёшлар қалбида давлатимиз суверенитети, ҳудудий яхлитлигини, халқимизнинг тинч ҳаёти ва хавфсизлигини таъминлашдек шарафли касб эгалари бўлиш каби эзгу орзулар янада мустаҳкамланмоқда. Чунки ҳарбий касбга меҳр – она Ватанга меҳр ва садоқат, халқнинг тинч ва осойишта ҳаётини таъминлашга бўлган дахлдорлик ҳиссининг уйғунлигидир.

Ана шундай меҳр ва дахлдорлик туйғуси билан яшаётган ватанпарвар ёшлар туфайли сарҳадларимиз мустаҳкам, ҳаётимиз осуда ва халқимиз осойишта. Ана шу осойишталик ва тинчликни таъминлаб сарҳадларимизда собит туриб, Қуролли Кучларимиз сафларида ўз хизмат бурчларини шараф билан адо этаётган она Ватан ҳимоячиларини, заҳирадаги ҳарбий хизматчиларни ва бутун халқимизни Қуролли Кучларимизнинг шонли 33 йиллиги билан чин дилдан муборакбод этаман! Тинчлигимиз, азиз халқимизнинг жипслиги мангу, Ватан ҳимоячилари куни байрами барчага муборак бўлсин!

Шуҳрат Маматов, Амударё туман Мудофаа ишлари бўлими бошлиғи, майор.