3 декабрь – Халқаро ногиронлар кунига бағишланган тадбир бўлиб ўтди
Маълумки, Бирлашган миллатлар ташкилоти Бош Ассамблеясининг 1992 йил 14 октабрдаги резолюциясига мувофиқ, ҳар йили 3 декабрь санаси бутун дунёда Халқаро ногиронлар куни сифатида нишонланиб келмоқда. Дунё мамлакатлари қатори юртимизда ҳам ушбу сана кенг нишонланади.
Сана муносабати билан Амударё тумани ҳокимлиги томонидан катта байрам тадбири ташкил этилди. Туманимиздаги “Олтин сарой” тантаналар саройида ногиронлиги бўлган ҳамюртларимиз учун байрам дастурхони ёзилди. Тадбирда туман ҳокимининг биринчи ўринбосари – иқтисодий тараққиёт ва камбағалликни қисқартириш бўлими бошлиғи Фаҳриддин Юсупов сўзга чиқиб, бугунги кунда муҳтарам Президентимиз томонидан кексалар ва ногиронлиги бўлган шахсларни ижтимоий ҳимоя қилиш ҳамда қўллаб-қувватлаш масаласига алоҳида эътибор қаратилаётгани, бу борада амалга оширилаётган чора-тадбирлар натижасида ушбу тоифа вакиллари турмуш тарзининг тобора яхшиланаётгани хусусида сўз юритди ҳамда барчани байрам билан табриклади.
Туман “Инсон” ижтимоий хизматлар маркази бошлиғи Ғуломжон Дуйсенбоев ўз нутқида инсон ҳуқуқлари, жумладан, ногиронлиги бўлган шахслар ҳуқуқларининг кафолатларини мустаҳкамлаш, ногиронлиги бўлган шахсларнинг жамият ҳаётининг барча соҳаларида иштирок этишлари учун зарур шарт-шароитлар яратиш масаласига катта эътибор қаратилаётганини таъкидлаб, Ўзбекистон Республикаси Президентининг “Ногиронлиги бўлган шахсларни қўллаб-қувватлаш тизимини такомиллаштиришга доир қўшимча чора-тадбирлар тўғрисида”ги қарори бу борада муҳим дастуруламал бўлаётганини қайд этди.
Шундан сўнг байрам дастурхонига таклиф этилган барча ногиронлиги бўлган ҳамюртларимиз учун туман ҳокимлиги томонидан тайёрланган байрам совғалари топширилди. Тадбир туман Маданият бўлими хонандалари ижросидаги бетакрор куй-қўшиқлар билан давом этди.
Таъкидлаш жоизки, мамлакатимиздаги олий таълим муассасаларида ногиронлиги бўлган шахслар учун алоҳида квоталар белгиланганлиги ҳам давлат томонидан уларга берилаётган кенг имкониятлар белгиси саналади. Ушбу имкониятлардан самарали фойдаланган ҳолда туманимиздан 5 нафар ногиронлиги бўлган ёшларимиз олий таълим муассасалари талабаси бўлишди. Бу каби хайрли ишларнинг амалга оширилишида катта маъно бор. Чунки давлатимиз сиёсатида ҳам, муқаддас ислом динимиз таълимотларида ҳам инсон энг азиз ва мукаррам саналган. Меҳр-мурувватли ва бағрикенг халқимиз ҳам азал-азалдан ёрдамга муҳтож, имконияти чекланган инсонларга эътибор ва ғамхўрлик кўрсатишни жамиятда тинчлик, дўстлик ва ҳамжиҳатликни мустаҳкамлашга хизмат қиладиган энг муҳим қадриятлардан бири сифатида эъзозлаб келади.
Ана шундай эзгу анъаналаримизни бугунги замон талаблари асосида ривожлантириш мақсадида сўнгги йилларда мамлакатимизда имконияти чекланган фуқароларимизни қўллаб-қувватлаш, улар учун зарур барча шароитларни яратиш борасидаги давлат сиёсати янги босқичга кўтарилмоқда.
Байрам тадбири шўх-шодон куй-қўшиқлар билан юқори кайфиятда ажойиб таассуротларга бой тарзда ўтди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
