“Кексалар маслаҳати гуруҳи” аъзолари, спорт мураббийлари ва ёш спортчилар иштирокида учрашув бўлиб ўтди

Мамлакатимизда спорт соҳасини ривожлантиришга қаратилаётган эътибор ва рағбат туфайли спортнинг олимпия турлари бўйича шуғулланувчи ёшлар сафи йил сайин ошиб бормоқда. Бугунги кунда бокс, дзю-до, кураш, ўзбек жанг санъати, бадиий гимнастика, қиличбозлик, теннис спорти билан шуғулланувчи ёшлар турли халқаро мусобақаларда Ватанимиз байроғини баланд кўтариб, ғолиблик пиллапояларидан тобора муносиб жой олишаётгани халқимизга қувонч ва ифтихор бағишлайди.

Спортчиларимиз эришаётган бундай ютуқларда, албатта, уларни тарбиялаб, вояга етказган ота-оналарининг, жисмоний жиҳатдан етук ва кучли спортчилар сифатида шаклланишларида ҳамда қизиқиш ва интилишларини қўллаб-қувватлашда спорт мураббийларининг хизматлари катта. Шу боис, турли нуфузли мусобақаларда ғолибликка эришган спортчиларнинг ота-оналари ва спорт мураббийлари билан учрашувлар ўтказиш, уларни моддий ва маънавий рағбатлантиришга алоҳида эътибор қаратилади.

Бу борада Амударё туманида спортчи-ёшлар ва уларнинг ота-оналари, мураббийлари иштирокида ўтказилаётган маънавий-маърифий тадбирлар ҳам эътиборга муносиб. Хусусан, жорий йилнинг 26 сентябрь санасида Амударё туман Мактабгача ва мактаб таълими бўлими тасарруфидаги 82-сонли умумтаълим мактаби фаоллар залида бўлиб ўтган “Кексалар маслаҳати гуруҳи” аъзолари, спорт мураббийлари ва ёш спортчилар иштирокидаги учрашувда ҳам мамлакатимизда спортга ва спортчиларга қаратилаётган эътибор, яратилган шарт-шароитлар, имкониятлар мамнуният билан эътироф этилди.

Учрашувга таклиф этилган Токио ва Париж олимпиадаларининг иштирокчиси, кўплаб халқаро мусобақаларнинг ғолиб ва совриндори, дзю-до спорти бўйича Ўзбекистон терма жамоаси аъзоси Шарофаддин Болтабоевнинг оила аъзоларига жаҳон спорт ареналарида Ватанимиз шарафини муносиб ҳимоя қилишга қодир фарзандни тарбиялаб, вояга етказишгани учун Амударё туман ҳокими томонидан миннатдорчилик изҳор этилиб, туман ҳокимининг Ташаккурномаси тақдим қилинди.

Шунингдек, учрашув давомида ўзбек жанг санъати бўйича жаҳон чемпионатида мамлакатимиз ва туманимиз шаънини муносиб тарзда ҳимоя қилиб, 2та олтин, 1та кумуш, 4та бронза медалларига сазовор бўлган ёш спортчилар эришган ютуқлар мамнуният билан эътироф этилди. Спортнинг пара енгил атлетика югуриш тури бўйича фахрли 2-ўрин соҳиби Нурсултон Сарибоев, пара стол теннис тури бўйича “Беш ташаббус олимпиадаси” мусобақаларида 1-ўринни эгаллаган Шаҳзода Раҳматуллаева ҳамда уларнинг мураббийлари Амударё туман ҳокимининг Ташаккурномаси ва эсдалик совғалари билан тақдирландилар.

Учрашув якунида “Кексалар маслаҳати гуруҳи” аъзолари, ҳожи оналар ҳамда нуроний ҳожи оталар, Амударё туманидан етишиб чиққан таниқли спортчиларнинг оила аъзоларига, шунингдек, ёш спортчиларга ва уларнинг мураббийларига ўзлари шуғулланаётган спорт йўналишларида янада янги муваффақиятларга эришишларида омадлар тиладилар.

Равшан Баҳромов.