Тарбия ва таълим боғчадан бошланади
Мактабгача таълим ташкилоти ҳаётини болаларга таълим-тарбия бериш билан бир қаторда байрамларсиз, маънавий-маърифий тадбирларсиз тасаввур этиш қийин. Миллий ва умумбашарий байрамларни ташкил этиш орқали болажонлар онгида миллий-анъанавий қадриятларимизни шакллантириш мақсад қилинган.
Дарҳақиқат, байрам — ижтимоий, маданий ва маънавий ютуқларни намойиш этувчи, шу ютуқлар асосида тарбияловчи муҳим восита ҳисобланади. Шу боисдан байрамлар тарбияланувчилар тарбиясига ижобий таъсир қилувчи ўзига хос сеҳрли кучга эгадир.
Шу мақсадда мактабгача таълим ташкилотларида ташкил этилаётган «Салом, боғча!» тадбирлари болажонлар билан ўйин-кулги тарзида, эртак китобларни ўқиш, қизиқарли суҳбатлар, қўғирчоқ театри томошалари шаклида ўтказиляпти. Амударё туманидаги 2-сонли давлат мактабгача таълим ташкилотида истиқлолимизнинг 33 йиллиги ҳамда мамлакатимизда 2024-2025-ўқув йили бошланиши муносабати билан «Бир бўлсак – ягона халқмиз, бирлашсак – Ватанмиз!» шиори остида ташкил этилган «Салом, боғча!» номли тадбир ҳам болажонларга олам-олам қувонч бахш этди.
Тадбир давомида болажонлар боғчада олган билимларини намойиш этишди. Хусусан, Она-Ватан, боғча ҳамда болаликни мадҳ этувчи шеърларни ифодали ўқишди. Байрамона куй-қўшиқларга гуруҳ бўлиб рақс ижро этишди ва тенгдошлари билан биргаликда ўйнаб-кулишди.
Шу ўринда айтиш жоизки, муассасамизда тарбияланаётган болажонлар мусиқа тўгараги раҳбари Отабек Худойберганов бошчилигида туманимизда ўтказилаётган байрамларда ўзларининг ёд олган шеру қўшиқлари ҳамда тайёрлаган рақслари билан фаол иштирок этиб келишади.
Очиқ дарслар вақтида болажонларга истиқлол ғоялари, ватанпарварлик ва юртга садоқат туйғулари, умуминсоний ва миллий қадриятларимиз уларнинг ёшига мос тарзда ҳар хил ўйинлар, қўғирчоқ театри томошалари, эртак қаҳрамонлари тимсоли орқали тушунтирилди.
Маълумот ўрнида, Амударё тумани Қипчоқ ШФЙ ҳудудида жойлашган 2-сонли давлат мактабгача таълим ташкилотида бугунги кунда 13та гуруҳ ташкил этилган бўлиб, ушбу гуруҳларда 325 нафар ўғил-қиз тарбия қилинмоқда. Болажонларга 47 нафар ходим билим ва тарбия бериб келишмоқда. Шундан 15 нафарини олий маълумотли ходимлар ташкил этади.
11-сонли умумтаълим мактабида ташкил этилган мактабгача тайёрлов гуруҳида 2023-2024 ўқув йилида 25 нафар ўғил-қиз тарбияланиб, умумтаълим мактабларининг 1-синфига кузатилди. Бу йил ҳам ушбу гуруҳга 25 нафар болажонлар қабул қилинди. Мактабгача таълим узлуксиз таълимнинг бошланғич қисми бўлиб, боғча тарбияси боланинг соғлом ва ривожланган шахс сифатида шаклланишида муҳим аҳамиятга эга ҳисобланади.
Боғча ёшидаги болаларда маълумотларни қабул қилиш, тил ўрганиш кўникмалари кучли ҳисобланади. Муассасамизда болажонлар рус ва инглиз тили тўгаракларида хорижий тиллардан бошланғич билимларни олишмоқда.
Бундан ташқари «Йилнинг энг яхши тарбиячиси-2024» касбий кўрик танловида муассаса методисти Саломат Тураева туман босқичида 1-ўринни олиб, Қорақалпоғистон Республикаси босқичида муносиб иштирок этди.
Шу ўринда таъкидлаш жоизки, кишилик жамияти пайдо бўлганидан буён тарбия тушунчаси мавжуд. Зеро, инсон ер юзидаги энг мукаммал зот бўлиши учун, аввало, тарбияланиши лозим. Шундай экан ҳаётимизда мактабгача таълимнинг ўрни ва аҳамияти ҳамиша муҳим бўлиб қолаверади.
Муҳаббат Худойберганова, 2-сонли ДМТТ директори
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
