Energiya resurslaridan samarali foydalanish masalasida targʻibot tadbirlari tashkil etilmoqda

Amudaryo tumani prokurori Aziz Roʻzmetov tashabbusi bilan energiya resurslaridan samarali foydalanish va ularni iqtisod qilish boʻyicha qator tashkilotlar, soha masʼullari bilan uchrashuv tashkil etildi. Tuman koʻp tarmoqli markaziy poliklinikasi binosida tuman gaz taʼminoti korxonasi, Tibbiyot birlashmasi, Maktabgacha va maktab taʼlimi boʻlimi hamda boshqa qator tashkilotlar rahbarlari ishtirokida tabiiy gazni iqtisod qilish boʻyicha tushuntirish ishlari olib borildi.

Targʻibot tadbirida tuman prokurori Aziz Roʻzmetov elektr energiyasi va tabiiy gaz resurslaridan samarali foydalanish borasida amalga oshirilayotgan islohotlar, energiya manbalarini iqtisod qilish, kuz-qiz mavsumini betalafot oʻtkazish maqsadida puxta tayyorgarlik koʻrish lozimligi xususida soʻz yuritdi.

Taʼkidlash lozimki, Oʻzbekiston Respublikasi Prezidentining 2023-yil 13-fevraldagi “Yoqilgʻi-energiya resurslaridan foydalanish sohasida davlat nazorati samaradorligini oshirish chora-tadbirlari toʻgʻrisida”gi qarori sohadagi ishlarni tartibga solishda muhim dasturulamal boʻlmoqda.

Yoqilgʻi-energiya resurslaridan noqonuniy foydalanish holatlarini bartaraf etish va oldini olish, ulardan samarali va oqilona foydalanish orqali iqtisodiyot tarmoqlari va ijtimoiy sohaning energiya samaradorligini oshirish, isteʼmolchilar tomonidan elektr energiyasi va tabiiy gazdan foydalanish qoidalariga rioya etilishi ustidan nazoratni kuchaytirish maqsadida imzolangan Prezident qarorini ijro qilish maqsadida Oʻzbekiston Respublikasi Vazirlar Mahkamasining “Elektr energiyasi va tabiiy gazdan foydalanish qoidalarini tasdiqlash toʻgʻrisida”gi qarori imzolangan. Ushbu hujjatlar asosida joylarda samarali ishlar tashkil etilmoqda.

Amudaryo tumani prokurori oʻz soʻzida, tegishli masʼullar tomonidan oʻtkazilayotgan oʻrganishlar jarayonida aniqlangan kamchiliklarni zudlik bilan bartaraf etish, kuz-qish oylarida koʻp kvartirali uylarda istiqomat qiluvchi aholi xonadonlari va ijtimoiy soha obʼektlarini barqaror issiqlik energiyasi bilan taʼminlash, qor-yomgʻirli kunlarda koʻp qavatli binolarning tomidan chakki oʻtmasligini taʼminlash borasida oldinda turgan ustuvor vazifalari xususida toʻxtaldi.

Shuningdek, tadbir mobaynida tuman gaz taʼminoti korxonasi hamda elektr tarmoqlari korxonasi masʼul xodimlari tomonidan energiya tejovchi uskunalar toʻgʻrisida maʼlumotlar berildi, xususan, eskirgan tabiiy gaz yondirgichlaridan foydalanishning salbiy oqibatlari, yondirgichlarni yangilariga almashtirish lozimligi, tejamkor lampalardan foydalanish orqali elektr energiyasi katta miqdorda tejalishi mumkinligi xususida maʼlumotlar berildi. Qolaversa, tadbir ishtirokchilari tomonidan mavzuga oid yoʻllangan savollarga mutaxassislar tomonidan aniq misollar bilan javoblar berildi. Bu kabi targʻibot tadbirlari tumandagi barcha hududlarda davom etmoqda.

Charos Arslonova, tuman hokimligining Axborot xizmati rahbari.