YoZGI SOGʻLOMLAShTIRISh TADBIRLARI BOLANI HAM MAʼNAN, HAM JISMONAN RIVOJLANTIRADI

“–Maktabgacha taʼlim tashkiloti bolani juda yoshligidan jamiyatga faol aralashishga oʻrgatadi, jamiyat qonun-qoidalarini erta tanigan bolalar vatanparvar, xalqparvar insonlar boʻlib voyaga yetadilar", – degan edilar muhtaram Prezidentimiz soha vakillari bilan uchrashuvlardan birida.

Haqiqatdan ham, boshlangʻich sinflar oʻqituvchilari Prezidentimiz eʼtirof etganlariday, maktab yoshiga yetgunga qadar maktabgacha taʼlim tashkilotida tarbiyalangan bola bilan oilada, ota-onasi va yaqinlari davrasida ulgʻaygan, 1-sinfga qabul qilingan bolalar oʻrtasida keskin farq borligini aytishadi.

Bir necha yil davomida MTTda tarbiyalangan bolalar maktab hayotiga juda tez koʻnikishlari bilan birga, shaxsiy fikrini ifoda etishda tezkor va moslashuvchan, epchilligi bilan ajralib turishadi. Oilada tarbiyalanib, maktabga chiqqan bolalar xulq-atvorida esa tortinchoqlik, oʻqituvchi bilan muloqot jarayonidagi oʻz fikrini mustaqil ifoda etish qobiliyati sust boʻladi. Ana shu sustkashlik va tortinchoqlik tufayli bola maktab taʼlimini oʻzlashtirishda tengdoshlaridan orqada qoladi. Shu jihatdan olib qaraganda, kelajagimiz egalari boʻlgan yosh avlodni barkamol insonlar qilib tarbiyalashda maktabgacha taʼlim tashkilotlarining tutgan oʻrni muhim ahamiyatga ega.

Amudaryo tumanidagi 23-sonli maktabgacha taʼlim tashkilotida “Yozgi sogʻlomlashtirish oyligi” doirasida boʻlib oʻtgan oʻquv-uslubiy koʻrgazmali seminarda bu haqda soha mutaxassislari tomonidan qimmatli fikrlar bildirilib, ilgʻor tajribalar koʻrgazmali ravishda namoyish etildi.

Oʻquv-uslubiy koʻrgazmali seminar ishida tumandagi mavjud 52 ta maktabgacha taʼlim tashkilotlari rahbarlari va uslubchilari ishtirok etishdi. Seminar mashgʻulotlarini olib borish uchun bejizga mazkur MTT tanlanmagan. Chunki 23- sonli MTTda bolajonlarning yayrab oʻsishlari, tabiat bagʻrida miriqib oʻynashlari, oʻz orzu-intilishlarini amalda namoyon etishlari, nutqiy salohiyatini rivojlantirishlari uchun barcha sharoitlar yaratilgan. Ayni paytda 5ta asosiy guruhda 150 nafar kichkintoylar taʼlim-tarbiya olayotgan muassasada 5ta yoʻnalish boʻyicha mashgʻulotlar qatʼiy reja asosida olib boriladi.

Unga koʻra, muassasa xodimlari tomonidan ijodkorlik, xususan, tasviriy sanʼat, musiqiy va didaktik oʻyinlar, shuningdek, suv va qum oʻyinlari uchun oʻyinchoq hamda jihozlar, sport maydonchasida har xil harakatli oʻyinlar tarzidagi mashgʻulotlar orqali bolajonlarda mantiqiy fikrlash, sogʻlik uchun foydali boʻlgan mantiqiy harakatli oʻyinlarni toʻgʻri bajarish koʻnikmalari shakllantiriladi.

“Yozgi sogʻlomlashtirish oyligi” doirasida oʻtkazilgan seminarda bolajonlarni jismoniy rivojlantirish va sogʻlom turmush tarzini shakllantirish, ijtimoiy-hissiy rivojlanish, nutq va muloqot, oʻqish hamda yozish malakalari, bilish jarayonining rivojlanishi, ijodiy rivojlanish sohalari koʻnikmalari asosida bola qobiliyatini rivojlantirishga qaratilgan taʼlim- tarbiya soatlari koʻrgazmali tarzda amalga oshirildi.

Oʻquv-uslubiy koʻrgazmali seminari davomida ishtirokchilar 23-sonli MTT xodimlarining ilgʻor tajribalarini koʻrgazmali vositalar yordamida oʻrgandilar va oʻz faoliyatlarida tatbiq etish boʻyicha oʻzlarini qiziqtirgan yoʻnalishlar yuzasidan savollar bilan murojaat qildilar hamda barcha savollariga javoblar oldilar.

“Yozgi sogʻlomlashtirish oyligi” doirasida oʻtkazilgan mazkur tadbir MTT xodimlarining bilim va malakalarini oshirishga qaratilgani bilan ishtirokchilarda katta taassurotlar qoldirdi.

Robiya Yoʻldosheva.