Yoshlarga oliy harbiy taʼlim muassasalariga oʻqishga kirishda muayyan imtiyoz beruvchi tavsiyanomalar topshirildi

Mamlakatimizda yangi Oʻzbekistonni barpo etishdek ulugʻvor maqsadga erishish yoʻlida asosiy tayanchimiz boʻlgan azm-u shijoatli yoshlarga eʼtibor va gʻamxoʻrlik koʻrsatish, ularga barcha sohalarda oʻz iqtidori va salohiyatini toʻliq namoyon etishi uchun zarur sharoit va imkoniyatlar yaratib berish davlat siyosatining ustuvor yoʻnalishi hisoblanadi. Shu maqsadda yoshlarga oid davlat siyosatini izchil va samarali amalga oshirish, yoshlarni vatanparvarlik, milliy anʼana va qadriyatlarimizga hurmat ruhida tarbiyalash, ularni har tomonlama qoʻllab-quvvatlash, maʼnaviy yetuk va jismonan sogʻlom, barkamol qilib tarbiyalash yoʻlida masʼul tashkilotlar tomonidan tizimli ishlar amalga oshirilmoqda.

Joriy yilning 11-iyul kuni Amudaryo tumanidagi 82-sonli maktabning faollar zalida umumtaʼlim maktablarining 11-sinf oʻquvchilari – “Vatan tayanchi” otryadi aʼzolariga respublika oliy harbiy taʼlim muassasalarining tegishli taʼlim yoʻnalishlariga oʻqishga kirish uchun test sinovlari natijalariga koʻra toʻplagan ballarining 5 foizi miqdorida qoʻshimcha ball shaklida imtiyoz beruvchi tavsiyanomalar topshirildi.

Tadbirda Amudaryo tumani Mudofaa ishlari boʻlimi boshligʻi Sherzod Murodov, Maktabgacha va maktab taʼlimi boʻlimi boshligʻi Yalgʻash Shamuratov, Milliy gvardiya tuman boʻlimi boshligʻi Baxtiyor Atajanov va boshqalar ishtirok etdi.

Dastlab 82-sonli maktab direktori Zafar Aqmanov soʻzga chiqib, yigʻilganlarga mehmonlarni tanishtirdi va yoshlarni harbiy-vatanparvarlik ruhida tarbiyalashga qaratilgan “Vatan tayanchi” harakatining mazmun-mohiyati haqida maʼlumotlar berdi.

Shundan soʻng masʼular Oʻzbekiston Respublikasi Prezidentining 2022-yil 2-mart kungi “Vatan tayanchi” bolalar va oʻsmirlar harbiy-vatanparvarlik harakati faoliyatini tashkil etish toʻgʻrisida”gi Qarorining maqsadi, ushbu tavsiyanomaga ega boʻlgan yoshlarga republikadagi oliy harbiy taʼlim muassasalarining tegishli taʼlim yoʻnalishlariga oʻqishga qabul qilishda beriladigan imtiyozlar toʻgʻrisida maʼlumotlar berdi. Shuningdek, “Vatan tayanchi” harakatining asl mohiyati va uning yoshlar hayotida tutgan oʻrni haqida alohida toʻxtalib oʻtildi.

Darhaqiqat, zamon shiddat bilan rivojlanayotgan bugungi kunda oʻsib kelayotgan yosh avlodni Vatan taqdiriga daxldorlik, maʼnaviy-axloqiy, milliy va umuminsoniy qadriyatlar hamda qonunlarimizga nisbatan yuksak hurmat ruhida tarbiyalash har qachongidan ham dolzarb masala hisoblanadi. “Vatan tayanchi” harakati mana shunday erkin fikrlaydigan, mustahkam bilimli, mamlakatimiz farovonligi va yanada rivojlanishiga munosib hissa qoʻshish orzusida boʻlgan yoshlarni tarbiya qilishda muhim vazifalarni bajaradi. Bu harakat, ayniqsa, dunyo globallashayotgan bugungi davrda farzandlarimizni turli xavfli gʻoyalar va “ommaviy madaniyat” niqobi ostida tashqaridan kirib kelayotgan salbiy taʼsirlardan himoya qilishda muhim ahamiyatga ega.

Tadbir yakunida masʼullar tomonidan oliy harbiy taʼlim muassasalariga qabul qilishda muayyan imtiyoz beruvchi tavsiyanomalar oʻz egalariga tantanali ravishda topshirildi.

Maʼlumot oʻrnida aytishimiz joizki, ushbu tavsiyanomalar berilgan sanadan boshlab 3-yil mobaynida amal qiladi.

Shohzod Qurbonboyev