Fuqarolarning koʻchmas mulk obʼektlariga boʻlgan huquqlari eʼtirof etilmoqda

Amudaryo tumanida Oʻzbekiston Respublikasi Prezidentining “Qoraqalpogʻiston Respublikasi aholisini ijtimoiy qoʻllab-quvvatlash hamda jismoniy shaxslar tomonidan qurilgan uy-joylarga boʻlgan huquqlarni eʼtirof etish toʻgʻrisida”gi 119-sonli Farmoni doirasida qator amaliy ishlar qilinmoqda. Mazkur hujjat ijrosini taʼminlash maqsadida tumanda maxsus ishchi guruh tuzilib, belgilangan talablarga javob beradigan fuqarolarning uy-joyga boʻlgan egalik huquqini eʼtirof etish boʻyicha Xalq deputatlari tuman Kengashining tavsiyasi asosida Qoraqalpogʻiston Respublikasi Joʻqorgʻi Kengesi Prezidiumining qarori qabul qilinib, tegishli hujjatlar topshirilmoqda.

Xalq deputatlari Amudaryo tuman Kengashining 2024-yil 22-may kungi 73-sessiyasi qarori bilan 501ta, 30-may kungi 74-sessiyasi qarori bilan 699ta hamda 2-iyul kungi 75-sessiyasi qarori bilan 1857ta turar joylar hamda yer uchastkalari roʻyxati tasdiqlangan boʻlib, endilikda Joʻqorgʻi Kenges Prezidiumining qarori asosida tegishli hujjatlar mulk egalariga topshiriladi.

Tuman hokimligining majlislar zalida oʻtkazilgan yigʻilishda tuman hokimi Sobir Xoʻjametov 501 nafar uy-joy egalariga mulkka egalik huquqini rasmiylashtirish imkonini beruvchi qarorlarni tantanali ravishda topshirdi.

Tuman hokimi oʻz soʻzida davlatimiz rahbarining “Qoraqalpogʻiston Respublikasi aholisini ijtimoiy qoʻllab-quvvatlash hamda jismoniy shaxslar tomonidan qurilgan uy-joylarga boʻlgan huquqlarni eʼtirof etish toʻgʻrisida”gi Farmoni Qoraqalpogʻistn Respublikasini har tomonlama rivojlantirish uchun olib borilayotgan samarali islohotlaridan biri ekanligini alohida eʼtirof etdi va mazkur qarorning mazmun-mohiyati va ahamiyati xususida soʻz yuritdi.

Taʼkidlash kerakki, mazkur hujjat Oʻzbekiston Respublikasi Konstitutsiyasining 47-moddasiga muvofiq Qoraqalpogʻiston Respublikasida aholining uy-joyga boʻlgan huquqi amalga oshirilishi uchun shart-sharoitlar yaratish, jismoniy shaxslar tomonidan qurilgan koʻchmas mulk obʼektlariga boʻlgan huquqlarni eʼtirof etish orqali aholini ijtimoiy qoʻllab-quvvatlash maqsadida qabul qilingan.

Qarorda yer uchastkasiga ijara huquqi hamda bino va inshootlarga mulk huquqini eʼtirof etish uchun fuqaro ushbu uy-joydan 2018-yil 1-maygacha boʻlgan davrdan boshlab oʻziniki kabi halol, oshkora va uzluksiz foydalangan boʻlishi, ushbu holat kosmik suratlarni qayta ishlash orqali hamda soʻnggi besh yil uchun yer soligʻi va mol-mulk soligʻi toʻlanganligi bilan tasdiqlangan boʻlishi belgilangan.

Shuningdek, yer uchastkasi boʻsh boʻlmasligi, unda qurilgan uy-joy yashash uchun moʻljallangan boʻlishi, fuqarolarning hayoti va sogʻligʻiga xavf tugʻdirmasligi, yer uchastkasi sugʻoriladigan yerlar, muhofaza etiladigan tabiiy hududlar, tarixiy-madaniy ahamiyatga molik yerlar, transport, aloqa va mudofaa maqsadlariga moʻljallangan yerlar, kimyoviy yoki radioaktiv moddalar bilan ifloslangan yerlar toifasiga kirmasligi, suv obʼektlarining sanitariya muhofazasi zonalarida, yer usti va yer osti suvlarining hosil boʻlish zonalarida joylashmagan boʻlishi shartligi belgilab qoʻyilgan.

Qaror ijrosini taʼminlash maqsadida 2023-yilning 5-avgust kuni Qoraqalpogʻiston Respublikasi Joʻqorgʻi Kengesi Prezidiumining qarori qabul qilingan. Prezidium qaroriga asosan Qoraqalpogʻistonning barcha hududlarida ishchi guruhlar tuzilgan.

Davlat kadastrlar palatasi Amudaryo tumani filialida tuzilgan ishchi guruh tegishli hujjati boʻlmagan jami 4795 nafar jismoniy shaxslar tarafidan qurilgan turar joylarning manzilli roʻyxatini shakllantirgan. Shundan ishchi guruh aʼzolari tomonidan 2937ta turar joylarga ijobiy xulosa berilgan. Bugungi kunda tegishli xulosaga ega boʻlgan va Farmon talablarini bajargan fuqarolarning uy-joyga boʻlgan egalik huquqlarini eʼtirof etish boʻyicha amaliy ishlar davom etmoqda.

Charos Arslonova, tuman hokimligining Axborot xizmati rahbari.