Oʻzbekiston Respublikasi Sogʻliqni saqlash vaziri oʻrinbosari Elmira Basitxonova ishtirokida seminar oʻtkazildi

Mamlakatimizda tibbiyot sohasiga qaratilayotgan eʼtibor, sohada amalga oshirilayotgan izchil islohotlar xalq salomatligini mustahkamlash, ayniqsa, onalik va bolalikni muhofaza qilish, oilalarda sogʻlom farzand dunyoga kelishi uchun sharoitlar yaratish imkonini bermoqda. Prezident Farmon va Qarorlari ijrosini taʼminlashga qaratilgan saʼy-harakatlar tufayli sohaning moddiy-texnika bazasi tobora yangilanib, xalqimizga tibbiy xizmat koʻrsatish darajasi yil sayin yaxshilanib bormoqda. Ayniqsa, ona va bola salomatligini muhofaza qilish borasida amalga oshirilayotgan chora-tadbirlar tufayli tugʻruq paytida va tugʻruqdan keyingi ona va bola oʻlimi keskin kamayishiga erishilgani kelajagimiz boʻlgan yosh avlodni har tomonlama sogʻlom va barkamol insonlar qilib tarbiyalash imkonini bermoqda.

Amudaryo tumanida ham ona va bola salomatligini muhofaza qilish, homilador va fertil yoshidagi ayollarning tibbiy madaniyatini oshirish, Tibbiyot birlashmasi huzuridagi koʻp tarmoqli markaziy poliklinika, oilaviy poliklinikalar hamda oilaviy shifokorlik punktlari mudirlari va bosh doyalari, yetakchi (lider) doyalar, patronaj doyalarining bilim va malakasini uzluksiz oshirib borish maqsadida doimiy ravishda sohaning yetakchi mutaxassislari, olimlar, trener-shifokorlar ishtirokida mahorat saboqlari, seminar treninglar oʻtkazilib borilmoqda.

 Joriy yilning 27-iyun sanasida Tibbiyot birlashmasi majlislar zalida Oʻzbekiston Respublikasi Sogʻliqni saqlash vazirining oʻrinbosari Elmira Irkinovna Basitxonova ishtirokida boʻlib oʻtgan uchrashuvda ham Amudaryo tumanida onalik va bolalikni mufofaza qilish borasida amalga oshirilayotgan ishlar batafsil muhokama etildi. Tibbiyot birlashmasi boshligʻining oʻrinbosarlari, koʻp tarmoqli markaziy poliklinika, oilaviy poliklinikalar hamda oilaviy shifokorlik punktlari rahbarlari, ayollar maslahatxonasi mudirlari, shuningdek, akusher-ginekologlar, patronaj doyalar, oilaviy shifokorlar, sohaga masʼul xodimlar ishtirok etgan mazkur uchrashuv davomida mahorat darslari ham oʻtkazilib, oʻzaro tajriba almashuv jarayonlari amalga oshirildi.

Shundan soʻng, Elmira Basitxonova rahbarligida Tibbiyot birlashmasining tugʻruq boʻlimlari, Tibbiyot birlashmasi huzuridagi koʻp tarmoqli poliklinika ayollar maslahatxonasida monitoring oʻtkazilib, zarur maslahat va tavsiyalar berildi. Xususan, aholi orasida tibbiy madaniyatni shakllantirish aholiga sifatli va samarali tibbiy xizmat koʻrsatish, har bir oilada sogʻlom farzand dunyoga kelishini taʼminlash, onalik va bolalikni muhofaza qilish, doyalar tomonidan oilani sogʻlom rejalashtirish yuzasidan oʻzaro fikr almashinib, qimmatli maslahatlar berildi.

Shuningdek, Elmira Basitxonova Tibbiyot birlashmasining tajribali akusher-ginekologlari, oilaviy shifokorlar hamda patronaj doyalar bilan zamonaviy tibbiyot sohasidagi oʻzgarishlar, sohaga tatbiq etilayotgan yangiliklar yuzasidan suhbatlashib, ularni qiziqtirgan savollarga batafsil javob berdi.

Robiya Yoʻldosheva.