Ijtimoiy himoyaga muhtoj yoshlarga uy-joy berildi

Joriy yilning 15-iyun sanasida Amudaryo tumani hokimligining majlislar zalida 3 nafar ijtimoiy himoyaga muhtoj yoshlarga yangi xonadonlar kalitlari topshirildi. Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, tuman hokimining yoshlar siyosati, ijtimoiy-rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, “Inson” ijtimoiy xizmatlar markazi tuman boʻlimi boshligʻi Gʻulomjon Duysenboyevlar, boʻlim masʼul xodimlari hamda aholi vakillari ishtirok etdi.

Tadbirda soʻzga chiqqan masʼullar bugungi kunda mamlakatimizda yoshlarga oid davlat siyosatida amalga oshirilayotgan islohotlar, yoshlarning har tomonlama oʻsib-rivojlanishi uchun berilayotgan eʼtibor va gʻamxoʻrlik, yaratilayotgan imkoniyatlar xususida soʻz yuritdilar hamda yoshlarga uy-joylar kalitlarini topshirdilar.

Taʼkidlanganidek, Oʻzbekiston Respublikasi Vazirlar Mahkamasining “Yetim bolalar va ota-ona qaramogʻidan mahrum boʻlgan bolalarni ijtimoiy qoʻllab-quvvatlashga doir qoʻshimcha chora-tadbirlar toʻgʻrisida”gi qarori yoshlarga oid davlat siyosatida olib borilayotgan tizimli ishlarni yangi bosqichga olib chiqishda muhim dasturulamal boʻlib xizmat qilmoqda.

Mazkur hujjat yetim bolalar va ota-ona qaramogʻidan mahrum boʻlgan bolalarning ijtimoiy himoyasini kuchaytirish, ularni turar joylar bilan taʼminlash, oilaviy bolalar uylariga joylashtirish, hayotga tayyorlash uchun qulay shart-sharoitlar yaratish tizimini takomillashtirish maqsadida imzolangan boʻlib, unda bu borada amalga oshirilishi lozim boʻlgan qator ustuvor vazifalar belgilab berilgan.

Qaror bilan tasdiqlangan “Yetim bolalar va ota-ona qaramogʻidan mahrum boʻlgan bolalarni uy-joy bilan taʼminlash tartibi toʻgʻrisida”gi nizomga koʻra uy-joyga muhtoj boʻlgan yetim bolalar va ota-ona qaramogʻidan mahrum boʻlgan bolalar uy-joy bilan taʼminlanish huquqiga ega ekanligi koʻrsatilgan. Shuningdek, oʻzlariga biriktirilgan turar joyga ega boʻlmagan va turar joyga muhtojlar sifatida hisobda turgan yetim bolalar hamda ota-ona qaramogʻidan mahrum boʻlgan bolalarga 18 yoshga toʻlgan yilda koʻp kvartirali uy-joylardan umumiy maydoni 25 kvadrat metrdan kam boʻlmagan 1 xonali, voyaga yetgan yetim bolalar va ota-ona qaramogʻidan mahrum boʻlgan bolalar oʻrtasida nikoh tuzilgan hollarda esa 50 kvadrat metrdan kam boʻlmagan 2 xonali kvartiralar ajratilishi belgilangan.

Mazkur qaror asosida Amudaryo tumanida yashovchi 3 nafar yetim bolalar va ota-ona qaramogʻidan mahrum boʻlgan bolalarga yashashi uchun barcha zarur sharoitlarga ega boʻlgan, yaʼni taʼmirlangan va jihozlangan, oshxona anjomlari, gaz plita, karavot, televizor, muzlatgich, stol-stul kabi sharoitlar bilan taʼminlangan uy-joylar berildi.

Tadbirda qayd etilganidek, nizom talablariga koʻra yetim bolalar va ota-ona qaramogʻidan mahrum boʻlgan bolalarga uy-joylar mulkka egalik qilish huquqi asosida, biroq ular 30 yoshga toʻlgunga qadar uy-joyni sotish, hadya qilish yoki garovga qoʻyish yoxud ijaraga berish hamda uy-joyda oʻzi va oila aʼzolari (eri yoki xotini, farzandlari)dan tashqari boshqa fuqarolarni doimiy yashash joyi boʻyicha roʻyxatga olish huquqisiz ajratiladi. Bunda, yetim bola yoki ota-ona qaramogʻidan mahrum boʻlgan bolaning asoslantirilgan murojaati asosida mahalliy hokimliklar tomonidan uy-joyning umumiy maydonini kengaytirish va nizomda nazarda tutilgan talablarni saqlab qolish sharti bilan sotishga ruxsat beriladi.

Aytish joizki, ijtimoiy himoyaga muhtoj yoshlarni har tomonlama qoʻllab-quvvatlash borasida amalga oshirilayotgan bu kabi islohotlar kelajak egalari boʻlgan yosh avlod vakillarinining hayotda va jamiyatda oʻz oʻrnini topishiga, kamol topib rivojlanishiga, Vatanga foydasi tegadigan inson boʻlib voyaga yetishiga xizmat qiladi.

Charos Arslonova, tuman hokimligining Axborot xizmati rahbari.