1-iyun – Xalqaro bolalarni himoya qilish kuni munosabati bilan “Bolalarga bering dunyoni!” nomli bayram tadbiri oʻtkazildi

Dunyoda bolalarni yaxshi koʻrmaydigan millat yoʻq. Ammo biz kabi bolajon xalq boshqa boʻlmasa kerak. Donishmand ota-bobolarimizning “Bir bolaga yetti mahalla ota-ona” degan naqli ham bolajonlik xalqimizning qadriyatiga aylanganini ifodalaydi.

Amudaryo tumanidagi Madaniyat va istirohat bogʻida 1-iyun – Xalqaro bolalarni himoya qilish kuni munosabati bilan tashkil etilgan bayram tadbiri aholi, ayniqsa bojonlar uchun unitilmas quvonchli lahzalarga boy boʻldi.

“Bolalarga bering dunyoni!” – tadbirning aynan shunday nomlanishi ham bejizga emas. Chunki bu kunning butun shodliklari kelajagimiz egalari – bolajonlarga bagʻishlandi. Shu kuni istirohat bogʻi bolalar bilan gavjum boʻldi, attraktsionlardan ularning shodon kulgusi yangradi. Bolalarning quvonchi dunyoni toʻldirdi, goʻyo.

Bayram tadbirida tuman hokimi Sobir Xoʻjametov, sektor rahbarlari, hokim oʻrinbosarlari, Maktabgacha va maktab taʼlimi boʻlimi masʼullari, maktabgacha taʼlim tashkilotlari rahbarlari, bolajonlar va ularning ota-onalari qatnashdi.

Dastlab, tuman hokimi Sobir Xoʻjametov mutasaddilar bilan birgalikda taʼlim tashkilotlari xodimlari va oʻquvchilar tamonidan namoyish qilingan bayram-koʻrgazmasi bilan yaqindan tanishdi. Mutasaddilar kelajagimiz egalari boʻlgan bolajonlarning sevimli mashgʻulotlariga qiziqib, ularni bayram bilan tabrikladi va dildan muloqot qilishdi. Koʻplab musobaqa va bellashuvlarda qatnashib, yuqori natijalarga erishgan bolajonlar, maktabgacha taʼlim tashkilotlari tarbiyalanuvchilarining yutuqlari eʼtirof etilib, ularga faxriy yorliqlar va bayram sovgʻalari topshirildi.

Koʻrgazmada bolarning qay biri shaxmat-shashka doskasida dona surar, boshqa biri endigina chizgan rasmlariga rang berar, yana boshqa bola esa akrobatik mashqlarini namoyish qilardi. Stullarga chiroyli qilib taxlangan har xil buyumlar va oʻyinchoqlar sevimli ertak qahramonlarini eslatadi. Yigʻilganlar bolalar taʼlim-tarbiya olishdan boʻsh vaqtlarida qanday mashgʻulotlar bilan mashgʻul ekanliklarini koʻrib, xursand boʻlishdi.

Mehmonlar Madaniyat boʻlimi tamononidan tayyorlangan bayram tadbiriga tashrif buyurib, ona-onalarni, nuroniylarni hamda barcha bolajonlarni 1-iyun – Xalqaro bolalarni himoya qilish kuni bayram bilan samimiy tabrikladilar. Tuman hokimi Sobir Xoʻjametov tabrik nutqida Yangi Oʻzbekistonda bolalarga eʼtibor davlat siyosati darajasiga koʻtarilgani, ularni asrab-avaylash, har tamonlama barkamol qilib voyaga yetkazish yoʻlida amalga oshirilayotgan islohotlar haqida aytib oʻtdi.

Yurtimiz kelgusida yanada ravnaq topib, xalq turmushi bundan-da farovon boʻlishi uchun farzandlarimiz komil insonlar boʻlib ulgʻayishlari zarurligi alohida taʼkidlandi. Zamonaviy uslublarda qurilgan va qayta jihozlangan maktabgacha taʼlim tshkilotlari va maktablar, sport-sogʻlomlashtirish muassasalari bolajonlarimizning chuqur bilim olib, isteʼdodlarini yuzaga chiqarishlariga xizmat qilmoqda. Bir soʻz bilan aytganda, davlat va jamiyat bolajonlarning sogʻlom va barkamol boʻlib voyaga yetishlari uchun barcha imkoniyatlarini ishga solmoqda.

Tadbir davomida maktabgacha taʼlim tashkiloti tarbiyalanuvchilari va maktab oʻquvchilarining chiqishlari, mashxaraboz va tsirk tomoshalari, sevimli ertak va multfilm qahramonlarining har xil oʻyinlari, begʻubor bolalikni tarannum etuvchi kuy-qoʻshiqlar bolajonlarga olam olam quvonch bagʻishladi.

Shuningdek, istirohat bogʻiga yigʻilgan bolajonlarga tuman hokimligi tomonidan muzqaymoqlar ulashildi.

Baxtli bolalik mana shunday bayramlar bilan goʻzal. Fursatdan foydalanib, biz ham barcha bolajonlarni 1-iyun – Xalqaro bolalarni himoya qilish kuni bilan tabriklab, ularning Vatanga, el-u yurtga xizmat qiladigan maʼnan yetuk, jismonan sogʻlom boʻlib ulgʻayishlarini tilab qolamiz.

Shohzod Qurbonboyev