Oʻzbekiston va Qoraqalpogʻiston Yozuvchilar uyushmalari aʼzosi, atoqli shoira Zulfiya Olloyorova muborak 60 yoshni qarshi oldi

Adabiyot – koʻngil ishi, ilhom samarasi, ruhiyat va kechinmalar ifodasidir. Ijod – murakkab jarayon. Soʻzga umrini bahshida etish uchun insonda katta jasorat boʻlishi lozim. Adabiyot xalqni tarbiyalab, yosh avlodni begona gʻoyalar taʼsiridan saqlaydi. Oʻlmas ijod namunalari esa har birimizni ezgulikka chorlab turadi. Shoir va yozuvchilar maʼnaviy obidalarning mohir meʼmorlaridir. Ularning ibratli umr yoʻlini targʻib qilish yosh avlodning maʼnaviy kamolotida muhim omil boʻlib xizmat qiladi.

Shu maqsadda mamlakatimizda shoir va yozuvchilar hamda ijod ahliga alohida ehtirom koʻrsatilib, tavalludiga bagʻishlangan adabiy-badiiy kechalar, yubiley tadbirlari muntazam ravishda tashkil qilinadi. Davlatimiz tomonidan har yili oʻz ijodiy mehnati bilan xalq farovonligi va yurt ravnaqi yoʻlida xizmat qilib, jamiyat taraqqiyotiga munosib hissa qoʻshayotgan ijodkorlar mehnatining eʼtirof etilishi jamiyatda ziyoli qatlamning mavqeyini yanada oshiryapti.

Joriy yilda Oʻzbekiston va Qoraqalpogʻiston Yozuvchilar uyushmasi aʼzosi, amudaryolik taniqli shoira, bir qator kitoblar muallifi, koʻplab yosh ijodkorlarning sevimli ustozi Zulfiya Olloyorova muborak 60 yoshni qarshi oldilar. Sana munosabati bilan Qoraqalpogʻiston Yozuvchilar uyushmasi tomonidan Amudaryo tumani Madaniyat boʻlimida yubiley tadbiri tashkil etildi.

Tadbirga Qoraqalpogʻiston yozuvchilar uyushmasi masʼul kotibi Beknazar Yernazarov va Qoraqalpogʻistonda xizmat koʻrsatgan jurnalist, shoir va yozuvchi Joldasbay Nurillayevlar tashrif buyurdi. Shuningdek kechada, tuman Maʼnaviyat va maʼrifat boʻlimi muutaxassisi Zarifa Soatboyeva, tumanimizning taniqli shoirlari Tursunboy Abdullayev, Ahmad Nafasov, Shomurod Xoʻjanov, Xudoybergan Jumamurodov, shoira Zuhra Ahmedovalar hamda ijodkorning muhlislari, shogirdlari, qarindoshlari va keng jamoatchilik ishtirok etdi. Kechaga ajoyib suxandon Qudrat Matsafoyev boshlovchilik qildi. Sanʼatkor Vahobjon Abdullayev ijrosidagi jonli qoʻshiqlar kechaga oʻzgacha fayz bagʻishladi.

Dastlab ustoz shoir, suxandon Tursunboy Abdullayev soʻzga chiqib, muborak 60 yoshni qarshi olganligi bilan Zulfiya Olloyorovani tabriklab, oʻzining samimiy tilaklarini izhor etdi. Shoiraning ijod yoʻli xususida toʻxtalib, ijodi haqida iliq fikrlarini bildirdi.

Shuningdek, mehmon ijodkorlar Qoraqalpogʻiston Yozuvchilar uyushmasi masʼul kotibi Beknazar Yernazarov va Qoraqalpogʻistonda xizmat koʻrsatgan jurnalist, shoir va yozuvchi Joldasbay Nurillayevlar ham soʻzga chiqib, shoirani yubiley yosh bilan samimiy qutladilar. Mehmonlar yubilyarga uyushma tomonidan taqdim etilgan tabriknoma va sovgʻalarni tantali ravishda topshirishdi.

Shuni qayd etishimiz kerakki, Zulfiya Olloyorovaning bugungi kunga qadar “Ufqqa qoqilgan ishq”, “Dunyolikda dunyo ranglari”, “Koʻngilning chor nagʻmasi” kabi sheʼriy toplamlari nashr qilingan. Oʻzbekiston va Qoraqalpogʻiston xalq shoiri Jiyenbay Izbasqanov tomonidan shoira sheʼrlari qoraqalpoq tiliga tajrima qilingan va 2013-yilda “Muharrir” nashriyotida “Suyemen aq bulttay paklik jolin” nomi bilan nashr qilingan. Zulfiya Ollayorova 2014-yil Oʻzbekiston Yozuvchilar uyushmasi aʼzoligiga qabul qilingan. U 2012-2019-yillar davomida Amudaryo tumani “Barkamol avlod” bolalar markazida toʻgarak rahbari vazifasida faoliyat yuritgan. Hozirgi kunda “Bogʻ” mahalla fuqarolar yigʻinida maslahatchi vazifasida mehnat qilyapti.

Yubiley tadbiri davomida ustoz shoir Ahmad Nafasov va Shomurod Xoʻjonovlar ham sana munosabati bilan Zulfiya Ollayorovani samimiy qutlab, shoiraga bagʻishlangan tabrik sheʼrlarini oʻqidilar. Shuningdek, 14-sonli maktab oʻquvchilari tomonidan tayyorlangan sahna chiqishlari ham kechaga fayz bagʻishladi. Zulfiya mukofoti sohibasi Barno Samandarova ham ustozini tabriklab, shoira ijodidan yod olgan sheʼrlarini ifodali oʻqidi.

Kecha yakunida Zulfiya Olloyorova tadbir tashkilotchilariga, mehmonlarga va barcha ishtirokchilarga samimiy minnatdorlik bildirdi.

Fursatdan foydalanib biz ham Zulfiya Olloyorovani 60 yoshlik yubileyi bilan muborakbod etib, shoiraga sihat-salomatlik va bardavom ijod tilaymiz. Adabiyotga boʻlgan muhabbat koʻnglimizni aslo tark etmasin.

Shohzod Qurbonboyev