Oʻzbekiston Respublikasi Sogʻlikni saqlash vaziri oʻrinbosari ishtirokida seminar oʻtkazildi

17-aprel kuni Amudaryo tuman tibbiyot birlashmasi majlislar zalida Oʻzbekiston Respublikasi Sogʻlikni saqlash vaziri oʻrinbosari Farrux Sharipov, Qoraqalpogʻiston Respublikasi Sogʻlikni saqlash vaziri Murod Qurbanovlar ishtirokida tibbiyot xodimlari va soha maʼsullari uchun seminar oʻtkazildi.

Maʼlumki, Oʻzbekiston Respublikasi Sogʻlikni saqlash vazirining 2023-yil 13-oktyabrdagi buyrugʻi bilan Oʻzbekiston Respublikasi davlat byudjeti mablagʻlari hisobidan qoplanadigan, tuman darajasida ambulator va statsionar sharoitda koʻrsatiladigan tibbiy yordamning kafolatlangan hajmlari roʻyxati tasdiqlangan edi. Shuningdek, vazirning 2024-yil 23-yanvardagi buyrugʻiga muvofiq 2024-yilda Toshkent shahri va Qoraqalpogʻiston Respublikasida, 2025-2026-yillarda bosqichma-bosqich qolgan hududlarda davlat tibbiy sugʻurta mexanizmlari joriy etilishi hamda moliyalashtirishning yangi modeliga oʻtilishi munosabati bilan tegishli chora-tadbirlar belgilangan edi.

Seminarda tibbiyot sohasi masʼullariga ushbu buyruqlarning mazmun-mohiyati va ularda topshirilgan vazifalarning ijro mexanizmlari haqida batafsil tushunchalar berildi.

Oʻzbekiston Respublikasi Sogʻlikni saqlash vazirining oʻrinbosari Farrux Sharipov seminar ishtirokchilariga davlat byudjeti mablagʻlari hisobidan koplanadigan, tuman darajasida ambulator va statsionar sharoitda koʻrsatiladigan tibbiy yordamning kafolatlangan xajmlari roʻyxati haqida, davlat tibbiy sugʻurta mexanizmlarini joriy etish hamda moliyalashtirishning yangi modeliga oʻtilishi jarayoniga tayyorgarlik koʻrish, bu borada tibbiyot xodimlari tomonidan qilinishi lozim boʻlgan funktsional vazifalar, aholi oʻrtasida oʻtkaziladigan tushuntirish-targʻibot ishlarining ahamiyati haqida toʻxtaldi.

Vazir oʻrinbosari tumandagi markaziy shifoxona, koʻp tarmoqli markaziy poliklinika, oilaviy poliklinikalar, oilaviy shifokorlik punktlarida aholini tibbiy brigadalarga biriktirish va xavf guruhlariga ajratish, shifokor oldi koʻrigi xonasida amaliyotchi hamshira qabulini tashkil qilish borasida tavsiyalar berdi. Shuningdek, seminar ishtirokchilari bilan kafolatlangan tibbiy yordam hajmlari, dori vositalari paketi, diagnostika uchun ajratiladigan reaktiv va sarflov materiallari, elektron tibbiy karta, elektron navbatga yozilish tartibi, oilaviy shifokor yoʻllanmasi asosida koʻrsatiladigan bepul tibbiy yordam turlari, tibbiy xizmatlar uchun norasmiy toʻlovlarni bartaraf etish yoʻllari borasida fikr almashildi.

Tuman tibbiyot birlashmasi masʼullari va tibbiyot xodimlariga davlat tibbiy sugʻurta tizimini joriy etish boʻyicha aholini birlamchi tibbiy-sanitariya yordami muassasalariga biriktirish tartibi, oilaviy shifokor tomonidan bemorga kafolatlangan paket doirasida tibbiy yordam olishi uchun beriladigan yoʻllanma shakli, shifoxonadan yoki ruhiy kasalliklar shifoxonasidan chiqarilganlarning statistik kartasi shakli, oilaviy poliklinikalar, oilaviy shifokorlik punktlari va aholi biriktirilgan koʻp tarmoqli markaziy poliklinikalarni moliyalashtirish hajmini shakllantirish maqsadida qoʻllaniladigan hamda ushbu muassasalarga biriktirilgan aholi yoshi va jinsi koeffitsiyentlari haqida batafsil tushunchalar berildi.

Seminardan keyin masʼullar tumanning “Berdax”, “Qangli” oilaviy shifokorlik punktlarida boʻlib, ushbu tibbiyot muassasalarida davlat tibbiy sugʻurtasi mexanizlarini amalga oshirishga koʻrilayotgan tayyorgarlik ishlari bilan yaqindan tanishdilar va masʼullarga kerakli tavsiya hamda maslahatlar berdilar.

J.Yavqashev, tuman tibbiyot birlashmasining tashkiliy-uslubiy boʻlimi mudiri