Xolimbeg ovulida qishloq xoʻjaligi boʻyicha koʻrgazmali seminar boʻlib oʻtdi

17-mart kuni Amudaryo tumanining Xolimbeg ovuli hududida tomorqa yerlaridan unumli foydalanuvchi dehqon xoʻjaliklari sonini koʻpaytirish, dehqonchilik, parrandachilik, asalarichilik, chorvachilik kabi qishloq xoʻjaligi tarmoqlarini yanada rivojlantirish maqsadida koʻrgazmali seminar boʻlib oʻtdi.

Seminarda tuman hokimi Sobir Xoʻjametov, sektorlar rahbarlari, hokim oʻrinbosarlari, respublikadagi hamda tumandagi agrar soha masʼullari, tijorat banklari rahbarlari, tuman ovul va mahallalar fuqarolar yigʻinlari raislari, hokim yordamchilari hamda korxona-tashkilotlar masʼullari ishtirok etdilar.

Mazkur seminar Prezidentimizning joriy yilning 5-mart sanasida imzolangan “Aholi xonadonlarida sanoat usulida mahsulot ishlab chiqarishni qoʻllab-quvvatlash hamda tomorqa va dehqon xoʻjaliklarida yangi zaxiralarni ishga solishga doir chora-tadbirlar toʻgʻrisida”gi 115-sonli qarori ijrosiga bagʻishlandi.

Dastlab seminar ishtirokchilari sobiq “Turkmaniston” muqobil mashina-traktor parki binosida tashkil etilgan qishloq xoʻjaligi texnikalari hamda mahsulotlarni oziqlantiruvchi, parvarishlovchi vositalardan iborat koʻrgazma bilan tanishdilar. Unda tuman hokimi Sobir Xoʻjametov soʻzga chiqib, davlatimiz rahbari tomonidan qishloq xoʻjaligi mahsulotlari ishlab chiqarishni yanada kengaytirishga, dehqonchilik, bogʻdorchilik, chorvachilik, parrandachilik kabi qishloq xoʻjaligi sohalarini rivojlantirishga alohida eʼtibor qaratilayotgani hamda bu borada tizimli islohotlar amalga oshirilayotgani xususida soʻz yuritdi.

Tuman hokimi oʻz soʻzida davlatimiz rahbarining “Aholi xonadonlarida sanoat usulida mahsulot ishlab chiqarishni qoʻllab-quvvatlash hamda tomorqa va dehqon xoʻjaliklarida yangi zaxiralarni ishga solishga doir chora-tadbirlar toʻgʻrisida”gi qarori bu boradagi ishlarni yangi bosqichga olib chiqishda muhim dasturulamal boʻlishini alohida taʼkidladi.

Seminarda soʻzga chiqqan Oʻzbekiston fermer, dehqon xoʻjaliklari va tomorqa yer egalari kengashi boʻlim boshligʻi Obil Safarov tomonidan qayd etilishicha, meva-savzavot mahsulotlarini yetishtirish va ularning eksportini oshirish, qishloq xoʻjaligi kichik ishlab chiqaruvchilarini yanada qoʻllab-quvvatlsh, ekin yerlaridan foydalanish samaradorligini yanada oshirish, pirovard natijada yer egalarining daromadlarini koʻpaytirish maqsadiga yoʻnaltirilgan mazkur qarorda qator yoʻnalishlar boʻyicha yangiliklar amalga oshirilishi belgilangan.

Xususan, hududlarning iqlim sharoitlaridan kelib chiqib hamda suv taʼminotini inobatga olgan holda, tumanlar eksportbop va serdaromad ekinlar ekishga, shuningdek, kichik ishlab chiqarish va mahsulot yetishtirishga ixtisoslashtiriladi. 2024-yilda meva-sabzavotchilikka ixtisoslashgan 51 ta tumanda meva-sabzavotlarni shok usulida muzlatishni yoʻlga qoʻyish boʻyicha yangi loyihalar amalga oshiriladi.

Shuningdek, mazkur hujjatda kichik biznesni uzluksiz qoʻllab-quvvatlash kompleks dasturi doirasida ishlab chiqarishga oid loyihalar bilan bir qatorda mahsulot yetishtirish bilan bogʻliq loyihalarga, qishloq xoʻjaligi ekinlarini yetishtirish bundan mustasno, 100 mln soʻmgacha garovsiz kreditlar ajratilishi belgilangan.

Seminar mobaynida Xolimbeg OFY hokim yordamchisi Akmalbek Xolmuradov tomonidan ovul hududidagi tomorqa yer egalari hamda dehqon xoʻjaliklari, ularni har tomonlama qoʻllab-quvvatlash borasida amalga oshirilayotgan ishlar haqida maʼlumot berildi.

Maʼlumotlarda keltirilishicha, Xolimbeg ovuli hududida jami 1298 ta aholi tomorqalarida 266 ga ekin yer maydonlari mavjud boʻlib, ulardan yuqori daromad olishni taʼminlash borasida oldinda turgan qaror vazifalarni amalga oshirish rejalashtirilgan.

Xususan, aholi tomorqalaridagi jami 184 ga bahorgi ekin maydonlaridan jami 5700 tonna mahsulot yetishtilishi, aholi xonadonlarida 26 ta issiqxonalar tashkil etish, “Bir mahalla – bir mahsulot” tamoyili asosida meva-sabzavotchilik yoʻnalishida mahsulot yetishtirilishi kabi tizimli ishlar amalga oshiriladi.

Seminar mobaynida ishtirokchilar Xolimbeg ovulida oʻz tomorqasidan yaxshi daromad olayotgan, dehqonchilik bilan uzoq yillardan beri shugʻullanib kelayotgan, koʻp yillik tajribaga ega dehqonlarning bilimlari hamda ish tajribalari bilan tanishdilar.

Jumladan, tomorqachi dehqon Erkin Qoʻshayevning oʻz tomorqasida xurmo, limon va qulupnay kabi parvarish talab qiladigan mevali daraxtlar koʻchatlari sonini yildan yilga koʻpaytirib borayotgani, quyonchilik bilan shugʻullanayotgani, oʻz tomorqasida yetishtirayotgan qishloq xoʻjaligi mahsulotlaridan olayotgan hosili hamda dehqonchilik sirlarini puxta egallash natijasida hayot tarzi, yashash sharoitlarining yaxshilanishiga erishganining guvohi boʻldilar.

Erkin Qoʻshayev seminarga yigʻilganlarga kortoshka, piyoz, sabzi mahsulotlarini yetishtirish hamda yerdan 2-3 marotaba hosil olish boʻyicha oʻz bilimi va tajribalari bilan boʻlishdi.

Shundan soʻng seminar ishtirokchilari oʻz tomorqasida katta issiqxona tashkil etgan hamyurtimiz Shavkat Oʻrozboyevning tomorqasi va issiqxonasidagi amalga oshirilayotgan ishlar bilan tanishdilar. Shavkat Oʻrozboyev 3-yil oldin tashkil etilgan, asosan bodring yetishtirishga moʻljallangan issiqxonadan yiliga 3 marotaba yaxshi hosil olayotgani haqida maʼlumotlar berdi.

Seminar yakunida tuman hokimi Sobir Xoʻjametov boshchiligidagi ishtirokchilar “Yashil makon” dasturi doirasida mevali daraxtlar koʻchatlarini ekdilar. Koʻrgazmali seminarda barcha ishtirokchilar katta bilim va tajribaga ega boʻldilar.

Charos Arslonova, tuman hokimligining Axborot xizmati rahbari.