Dehqonchilik va chorvachilikdan daromad topayotgan qoramonliklar

Mamlakatimizda barcha sohalarni ijtimoiy-iqtisodiy rivojlantirish maqsadida olib borilayotgan tizimli islohotlar natijasida aholi turmush tarzi tobora yaxshilanib borayotgani insonlarning bugungi kunga shukronaligi, ertangi kunga ishonchi hamda ezgu orzu-maqsadlarining asosi boʻlmoqda.

Amudaryo tumanining olis chekka hududda joylashgan Qilichboy ovulining Qoramon mahallasida hayotini, yashash sharoitlarini oʻzgartirish uchun yaratilayotgan imkoniyatlardan unumli foydalanayotgan mehnatsevar insonlar talaygina.

Ana shunday harakatchan, mehnatdan qochmaydigan hamyurtlarimizdan biri Karomaddin Xudayberganovning aytishicha, kaftdekkina tomorqasi orqasidan kattagina daromadga erishib kelmoqda. Ayni paytda 5 sotix yer maydonida issiqxona tashkil qilib, pamidor, bodring, qalampir, kartoshka, sabzi, rediska ekib, ota-onasi, turmush oʻrtogʻi bilan birgalikda mehnat qilib, parvarishlab kelishmoqda.

Hokim yordamchisi Adil Beshboyev oʻzi faoliyat olib borayotgan Qoramon mahallasi aholisini har tomonlama qoʻllab-quvvatlab, ularning dehqonchiliklarini yanada rivojlantirishlariga koʻmak bermoqda. Xudayberganovlar oilasi ham dehqonchilik mahsulotlarini ichki bozorga olib borishlari uchun kredit asosida mototsikl olishga yordam bergan hamda ogʻirini yengil qilgan hokim yordamchisidan minnatdor.

Karomaddining aytishicha, issiqxona tashkil qilgan yer maydonidan hosilni yigʻib olgandan keyin, oʻrniga kechki karam ekib, ikkinchi marta hosil olishadi. Shuningdek, hosil pishib yetilgandan keyin Xorazm viloyati Gurlan tumani, Amudaryo tumani Mangʻit shahri ichki bozorlariga olib borib sotishadi hamda tomorqasidagi oilaviy hamjihatlikdagi mehnat natijasida har yilgi hosildan 40-50 mln soʻmga yaqin daromad olishadi. Oilaning iqtisodiy ahvoli yildan yilga yaxshilanib, uylarini taʼmirlashgan, toʻy qilishgan, yangi “Spark” rusumli avtomobil sotib olishgan. Mehnat orqali orzular ushalishga, hayot tarzining yaxshilanishiga erishgan.

Ana shunday qoramonlik mehnatsevar, hamjihat Oʻrazmetovlar oilasi uzoq yillardan beri ota-bobolarimizdan meros boʻlib kelayotgan chorvachilik, baliqchilik, dehqonchilik, qishloq xoʻjaligi mahsulotlarini yetishtirish bilan shugʻullanib kelishmoqda.

Tozaboy Oʻrazmetovning aytishicha, 5-6-yildan buyon issiqxonada sabzavot va poliz ekinlari mahsulotlari yetishtirib, yaxshigina daromad olib kelishmoqda.

Hozirda tomorqasidagi issiqxona atrofidagi boʻsh turgan yer maydoniga ekish uchun pamidor, bodring, qovun, tarvuz nihollarini tayyorlashmoqda. Ayni paytda 4 nafar aka-ukalar turmush oʻrtoqlari hamda farzandlari hamjihatlikda oilaviy ushbu ishga jalb qilingan.

Shuningdek, tomorqada Turkiyadan olib kelingan 300 tup gilos bogʻi barpo qilingan. 3-yil oldin ekilgan gilos nihollari hozir kattagina gilos daraxtiga aylangan. Yaxshi parvarish qilingan gilos nihollaridan bu yil ilk marotaba hosil olinishi hamda oilaga yaxshi daromad kelishi kutilmoqda.

Qolaversa, Tozaboy Oʻrazmetov baliqchilikka qiziqishi tufayli 3 sotix yer maydonida baliq hovuzi tashkil qilgan. Hovuzga har biri 100 gramm keladigan qizil sazan baliqlaridan 50 kg chovoq yuborib, boqishni va parvarishlashni yoʻlga qoʻygan.

Qoramon mahallasidagi tinib-tinchimas, mehnatsevar hamyurtlarimizdan yana biri Alisher Yaxshimov 2022-yilda chorvachilik faoliyatini yoʻlga qoʻyish maqsadida bankdan 66 mln soʻm imtiyozli kredit olib, yaratilayotgan imkoniyatlardan samarali foydalanib kelmoqda. Ushbu kredit mablagʻlari hisobiga mavjud 2 bosh qoramoli yoniga yana 10 bosh qoramol sotib olib qoʻshgan. Hozirda yaxshi parvarishlash natijasida chorvachilik sirlarini yaxshi bilgan hamyurtimizning chorva mollari soni salkam 20 boshga yetgan. Shuningdek, ilgari 5-6 bosh qoʻy boqqan boʻlsa, bugungi kunga kelib ular soni 30 boshga yetgan.

Alisher Yaxshimovning aytishicha, chorvachilik bilan shugʻullanish natijasida oilaning iqtisodi anchagina yaxshilangan. Turmush oʻrtogʻi hamda farzandlari oʻqishdan boʻsh vaqtlarida chorvadorga yordam berib, birgalikda mehnat qilib kelishadi. Qolaversa, hamyurtimiz qoʻshimcha daromad olish maqsadida asalarichilikni ham yoʻlga qoʻygan. Har yili asalarichilik orqasidan 3-3,5 tonna asal olinib, oilaga 15-20 mln soʻmga yaqin qoʻshimcha daromad keladi.

Charos Arslonova, tuman hokimligining Axborot xizmati rahbari.