BAYRAM MUNOSABATI BILAN AMUDARYoLIK AYoL-QIZLAR IShTIROKIDA SPORT MUSOBAQALARI OʻTKAZILDI

Xalqaro ayol-qizlar kuni munosabati bilan yurtimizning barcha hududlarida turli maʼnaviy-maʼrifiy, koʻngilochar tadbirlar oʻtkazildi. Korxona-tashkilot va muassasalarda “Ayol borki, olam munavvar”, “Ayollari qadr topgan yurt”, “Sen baribir muqaddassan, muqaddas ayol”, “Qizlar davrasi” nomli madaniy-maʼrifiy tadbirlar koʻtarinki ruhda nishonlandi. Ayniqsa, bayram arafasida tashkil etilgan sport musobaqalarida qatnashgan ayol-qizlarga joʻshqinlik ulashilib, bayramni xushnud oʻtkazishdi.

5-6-mart kunlari Amudaryo tumanida ham 8-mart – Xalqaro ayol-qizlar bayrami munosabati bilan taʼlim tizimida faoliyat olib borayotgan ayol-qiz xodimlar oʻrtasida “Sport – salomatlik garovi” shiori ostida sportning shaxmat, shashka, stol tennisi, darts va voleybol turlari boʻyicha musobaqalar oʻtkazildi. Musobaqalar Amudaryo muhandislik texnikumi, tuman ixtisoslashtirilgan maktabi va 40-sonli umumtaʼlim maktabi sport zallarida oʻtkazildi.

Musobaqalarning ochilish marosimida ishtirok etib soʻzga chiqqan masʼullar barcha xotin-qizlarni, sportchi va trenerlarni, tizim xodimlarini nafosat va goʻzallik bayrami bilan tabriklashdi. Jamiyatimizning turli jabhalarida xotin-qizlarning oʻrni beqiyosligini taʼkidlab, ular oʻzlarining bilimi va malakasi, tajribasi va mahorati bilan yurtimiz ravnaqiga, jamiyatimiz rivojiga munosob ulushini qoʻshib kelayotganini, jismoniy tarbiya va sport sohasida ham samarali mehnatlari, yuqori koʻrsatkichlari bilan el nazariga tushgan, obroʻ-eʼtiborga sazovor boʻlgan ayol-qizlar koʻpchilikni tashkil qilishini, ular turli nufuzli musobaqalarda ulkan yutuqlarni qoʻlga kiritib, tumanimiz, mamlakatimiz dovrugʻini olamga yoyishga oʻz hissalarini qoʻshishayotganini faxr va gʻurur bilan eʼtirof etib oʻtishdi.

Musobaqalarda tuman boʻyicha hududlarda gʻolib sanalgan ishtirokchilar va gʻolib jamoalar ishtirok etishdi. Sportning shaxmat turi boʻyicha boʻlib oʻtgan musobaqalarda faxrli 1-oʻrinni 11-sonli umumtaʼlim maktabi oʻqituvchisi Raisa Saxiyeva, 2-oʻrinni 65-sonli umumtaʼlim maktabi oʻqituvchisi Ozoda Abdullayeva, 3-oʻrinni 12-sonli umumtaʼlim maktabi oʻqituvchisi Dilorom Shomurodovalar egallashdi. Shashka turi boʻyicha oʻtkazilgan musobaqalarda esa faxrli 1-oʻrinni 26-sonli maktabgacha taʼlim tashkiloti xodimi Tursunoy Tojibayeva, 2-oʻrinni 67-sonli umumtaʼlim maktabi oʻqituvchisi Zulayho Bobojonova, 3-oʻrinni 45-sonli umumtaʼlim maktabi oʻqituvchisi Dilfuza Abdurahmonovalar qoʻlga kiritishdi.

Sportning stol tennisi turi boʻyicha qizgʻin kechgan musobaqalarda 46-sonli umumtaʼlim maktabi oʻqituvchisi Muyassar Masharipova faxrli 1-oʻrin, 8-sonli maktabgacha taʼlim tashkiloti xodimi Gulshod Masharipova 2-oʻrin, 11-sonli umumtaʼlim maktabi oʻqituvchisi Qunduz Kamolova 3-oʻrin gʻoliblari boʻlishdi. Shuningdek, sportning darts turi boʻyicha oʻtkazilgan musobqalarda esa 19-sonli umumtaʼlim maktabi oʻqituvchisi Muborak Masharipova faxrli 1-oʻrinni, 11-sonli umumtaʼlim maktabi oʻqituvchisi Nasiba Kamolova 2-oʻrinni, 16-sonli umumtaʼlim maktabi oʻqituvchisi Rahima Saparboyeva 3-oʻrinni egallashdi.

Bahslarga boy tarzda oʻtgan voleybol musobaqalarida esa faxrli 1-oʻrinni 28-sonli umumtaʼlim maktabi jamoasi, 2-oʻrinni 22-sonli umumtaʼlim maktabi jamoasi, 3-oʻrinlarni 41-sonli umumtaʼlim maktabi jamoasi va 32-sonli umumtaʼlim maktabi jamoalari egallashdi.

Musobaqalarda gʻolib boʻlgan jamoalar va faxrli oʻrin egallagan ishtirokchilar Taʼlim va fan xodimlari kasaba uyushmasi Amudaryo tuman boʻlinmasi kengashi tomonidan diplomlar va sovgʻalar bilan taqdirlanishdi.

U.Abdurahmonov, Oʻzbekiston taʼlim va fan xodimlari kasaba uyushmasi Amudaryo tuman boʻlinmasi kengashi raisi.