Tabiiy gaz bosimining pastligi, suv, elektr taʼminotidagi uzilishlar: tuman hokimligidagi shtabga shu kungacha 225 ta murojaatlar kelib tushdi

Qoraqalpogʻistonda qish mavsumi ob-havosi Respublikamizning boshqa hududlariga nisbatan ayozli boʻladi va uzoqroq davom etadi. Shu boisdan ham aholining tabiiy gaz va isitish tizimiga, elektr energiyasiga ehtiyoji ortib ketadi. Bu oʻz navbatida baʼzan isitish moslamalaridan xavfsizlik qoidalariga rioya qilinmay foydalanganda favqulodda holatlar yuzaga kelishi, yongʻin, is gazidan zaharlanish kabi noxush holatlar sobir boʻlishiga sabab boʻlishi mumkin.

Amudaryo tumanida aholini qish mavsumidan talofatlarsiz olib chiqish, ularning tabiiy gaz, oʻtin, koʻmir va boshqa yoqilgʻilarning chala yonishi oqibatida paydo boʻladigan is gazidan zaharlanishining oldini olish, yongʻinlar sodir boʻlishiga yoʻl qoʻymaslik hamda isteʼmolchilarga elektr energiyasi, tabiiy gaz, ichimlik suvini uzluksiz yetkazib berish, ularning bu borada duch kelgan muammolarini tezkorlik bilan hal etish maqsadida shtab faoliyati yoʻlga qoʻyilgan edi.

Shtab sutkaning barcha vaqtlarida uzluksiz faoliyat koʻrsatishi uchun “Qoraqalpoq suv taʼminoti” masʼuliyati cheklangan jamiyati tuman filiali, “Amudaryotumangaz”, tuman elektr tarmoqlari korxonasi, Obodonlashtirish boshqarmasi, Sanitariya epidemiologik-osoyishtalik va jamoat salomatligi boʻlimi masʼul xodimlarining navbatchiligi tashkil etilgan va ishonch telefoni muntazam ishlab turibdi.

Shtab tashkil etilgan 2023-yilning 28-sentyabridan joriy yilning 16-yanvariga qadar ushbu ishonch telefoni orqali aholidan 225ta murojaatlar qabul qilingan va tezkorlik bilan chora-tadbirlar koʻrilib, ijobiy hal etilgan.

Shtabga koʻplab yurtdoshlarimiz qatori Mangʻit shahrining Chordara mahallasida istiqomat qiluvchi Xosiyat Qutimova suv tarmogʻidagi nosozlik, Beshtom mahallasida istiqomat qiluvchi Komiljon Toʻliboyev xonadoniga qoʻyilgan suv oʻlchagich ishlamay qolganligi, Gulzor mahallasidagi koʻp xonadonli uyning 5-qavatida istiqomat qiluvchi yana bir yurtdoshimiz uyining tomonidan chakka oʻtayotganligi, Xolimbeg ovulidan Yunus Tursunov elektr energiyasidagi uzilishlar boʻlayotgani yuzasidan murojaat qilishgan. Kelib tushgan murojaatlarning koʻpchiligi tabiiy gaz bosimining pastligi, suv, elektr taʼminotidagi uzilishlarga doir boʻlib, muammolar tegishli sohalar mutasaddilari tomonidan oʻz vaqtida hal etish choralari koʻrilayotir.

Shunisi eʼtiborliki, shtab aʼzolariga va ishonch telefoni orqali murojaat qilayotgan yurtdoshlarimizga tuman Favqulodda vaziyatlar boʻlimi mutasaddilari aholini qish mavsumidan talofatlarsiz olib chiqish maqsadida sodir boʻlishi mumkin boʻlgan favqulodda holatlarning oldini olish yuzasidan keng tushunchalar berib bormoqdalar.

Ular aholi xonadonlarida ham boʻlib, tabiiy gazning toʻliq yonmasligi, xona ichida toʻplanib qolishi, gaz plitalarining, isitish qozonlarining yoqib, qarovsiz qoldirilishi is gazidan zaharlanish, yongʻin kabi koʻngilsiz hodisalar sodir boʻlishiga olib kelishini batafsil tushuntirmoqdalar. Bu borada fuqarolar ogohlikka, hushyorlikka daʼvat etilmoqda.

Albatta, buningdek targʻibot tadbirlari oʻzining ijobiy natijalarini beradi. Shu yilning 15-yanvarida Ayoqchi mahallasida istiqomat qiluvchi Qoʻziboy Rahimov shtabga xonadonida tok kuchlanishi baland ekinligi xususida ishonch telefoni orqali murojaat qilgan edi. Shtab navbatchilari bu haqda tuman elektr tarmoqlari korxonasi rahbariyatiga maʼlum qilgan. Natijada yuqori kuchlanishli tok tufayli kelib chiqishi mumkin boʻlgan noxush holatning oldi olingan.

Xulosa qilib aytganda, shtab faoliyati tumanimizda aholining qish mavsumini betalofat oʻtkazishiga xizmat qilayotgani bilan juda ahamiyatli.

Oygul RAJABOVA.