Sarishtali uy – farishtali uy

Sarishtali uy – farishtali uy deb xalqimiz bekorga aytmagan. Haqiqatan ham chor-atrofi obod, yashil daraxtlar bilan burkangan, gullar qulf urib ochilib turgan hovlini koʻrgan odamning bahri-dili ochilib ketadi. Orastalik, ozodalik hukmron xonadonlarga havas bilan qarashimiz, sarishtali uy - farishtali uy, deyishimiz, qaniydi, hamma joyda ham shunday manzara hukmron boʻlsa, deya havas qilishimiz ham bejiz emas.

Quvonarlisi, keyingi yillarda bizning Kuyuk-koʻpir ovulimizda ozodalik, obodlik aholining turmush tarziga aylanib bormoqda. Hududimizdagi 19-sonli, 14-sonli umumtaʼlim maktablari oʻqituvchilari, "Oʻzbekiston” QVP tibbiyot xodimlari bilan hamkorlikda aholining tibbiy madaniyatini yuksaltirish, hududning sanitariya holatini yaxshilash borasida olib borgan tashviqot-targʻibotlarimiz oʻz samaralarini bermoqda.

Aholi oʻz hovlisi hududini obodonlashtirib, ozoda saqlashga, mevali, manzarali daraxtlarni koʻpaytirishga va tomorqasidan unumli foydalanishga harakat qilmoqda.

Ovulimizda obodonlashtirish ishlariga yil boshidanoq kirishdik. Koʻchalar, yoʻl boʻylaridagi daraxtlarni butab, shakl berib ohaklash, koʻcha va yoʻllarni tartibga keltirish, chiqindilarni tashkiliy ravishda chiqarib tashlash, ariq-zovurlarni tozalash ishlari qoʻlga olindi. Shu kungacha hududimizdagi turar joylarning fasad qismlari ohaklanib, tutash koʻchalar, yoʻl chetlari tartibga keltirildi. 25 tonna maishiy chiqindilar chiqarib tashlandi.

Eshon ovul aholi punktidagi ichki uchta koʻchaning 1,8 kilometr, Xoʻja ovul aholi punktidagi ichki 3 ta koʻchaning 1,5 kilometr qismiga hashar yoʻli bilan tosh yotqizildi.

Ovulimiz boʻyicha joriy koʻklamda 20556 tup mevali, 23746 tup manzarali koʻchatlar ekish rejalashtirilgan boʻlsa, hozirgi kungacha 4000 tupdan ziyod mevali, 5500 tupdan ziyod manzarali daraxtlar koʻchatlari oʻtqazildi.

Atrof-muhit ozodaligini saqlashda jamoatchilikning ishtirokini taʼminlashga eʼtiborni kuchaytirmoqdamiz.

Aholimizyurtimizda atrof-muhit, tabiiy zahiralarning muhofaza qilinishiga doir, ekologik vaziyatni yaxshilashga va aholi sogʻligini mustahkamlashga, tibbiy madaniyatni oshirishga doir qabul qilinayotgan dasturlarni oʻzlari uchun muhim hayotiy yoʻl-yoʻriq sifatida qabul qilmoqda.

Ovulimiz aholisi 14-15-mart kunlari boʻlib oʻtgan umumxalq hasharida ham faol qatnashib, hududimizni obodonlashtirishga katta hissa qoʻshdilar.

Obodonlashtirish ishlari bundan keyin ham doimiy diqqat-markazimizda boʻlib qolaveradi.

Rashid YeRLAPASOV,