TANLOV GʻOLIBLARI TAQDIRLANDI

“Mahalla” xayriya jamoat fondi Amudaryo tuman boʻlinmasi Qoraqalpogʻiston Respublikasi Joʻqorgʻi Kengesi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan davlat granti tanlovida “Obod mahallam” nomli loyihasi bilan qatnashib gʻolib boʻlgan edi va mazkur loyihani muvaffaqiyatli amalga oshirishga erishdi.

Atrof-muhitni muhofaza qilish va tabiiy resruslardan oqilona foydalanish sohasidagi qonun hujjatlari talablari buzilishining oldini olish, uni aniqlash va chek qoʻyish, aholining ekologiyaga oid bilimlarini kengaytirish maqsad qilingan loyiha doirasida oʻtgan davr mobaynida aholi, oʻquvchilar bilan davra suhbatlari, uchrashuvlar, turli tanlovlar oʻtkazildi.

Ushbu saʼy-harakatlar aholi, ayniqsa, yoshlarni tabiatga ehtiyotkorona munosabatda boʻlishga, tabiiy resurslarni tejashga daʼvat etishga, ularning ekologiyaga oid bilimlarini oshirishga xizmat qilgani bilan ahamiyatli boʻldi.

Shuningdek, tuman hududining sanitariya holati va ekologik vaziyatni yaxshilash, atrof-muhitni muhofaza qilish, obodonlashtirish va koʻkalamzorlashtirish boʻyicha amalga oshirilayotgan ishlar keng targʻib etildi, oʻquvchilarning tabiat bagʻriga uyushtirilgan sayohatlari orqali ularning koʻnglida ona tabiatimizga mehr-muhabbat tuygʻulari mustahkamlandi.

Shu yilning 17-noyabrida mazkur grant loyihasi rejasiga muvofiq mahallalarda obodlikni taʼminlash, yoshlarning tibbiy va ekologik madaniyatini oshirish, ularga sogʻlom turmush tarzini keng targʻib qilish maqsadida Qilichboy ovuli hududidagi maktablar oʻquvchilari orasida “Tabiat bizning onamiz” mavzusida insholar tanlovi eʼlon qilingan edi. Tanlovda hududdagi 7ta umumiy oʻrta taʼlim muassasalaridan 15 nafar oʻquvchilar ishtirok etdilar. Eʼtiborlisi insholar sinfda, loyiha ijodkorlari kuzatuvida oʻtkazildi va bu oʻquvchilar mavzuga oid manbalardan foydalanmasdan oʻz bilimlari boʻyicha yozishlarini taʼminladi.

Mazkur insholar hakamlar hayʼati tomonidan oʻrganilib, xolisona baholandi. Natijalarga koʻra 15-sonli maktab 9-sinf oʻquvchisi Maftuna Hayitboyeva birinchi, 11-sinf oʻquvchisi Sevara Zarifboyeva ikkinchi, 20-sonli maktab 8-sinf oʻquvchisi Dilnura Yoʻldosheva uchinchi oʻrinlarni egalladilar. Shuningdek, 23-sonli maktab 9-sinf oʻquvchisi Marjona Rajabova, 83-sonli maktab 11-sinf oʻquvchisi Mahliyo Hasanovalarning tanlovdagi faol ishtiroki eʼtirof etildi.

30-noyabr kuni tanlov gʻoliblari “Mahalla” xayriya jamoat fondi tuman boʻlinmasi tomonidan taqdirlandi.

Tadbirda tuman Kambagʻallikni qisqartirish va aholi bandligiga koʻmaklashish boʻlimi boshligʻi oʻrinbosari Bahodir Boltaboyev, “Taraqqiyot koʻzgusi gazetasi muxbiri Oygul Rajabova, Respublika Maʼnaviyat va maʼrifat markazi tuman boʻlimi xodimi Zarifa Soatboyeva, loyiha ijrochilaridan biri Hidoyat Sultonovlar, tanlov gʻolibi boʻlgan oʻquvchilar, ularning ustozlari ishtirok etdilar.

Bahodir Boltaboyev, Oygul Rajabovalar oʻquvchilarning tanlovga taqdim etgan ijodiy ishlari xususida oʻz fikr-mulohazalarini bildirdilar.

Tanlovda gʻolib oʻquvchilar qimmatbaho sovgʻalar, Faxriy yorliqlar bilan taqdirlandilar.

Sevara Ismoilova.