Kitob – bilim manbai
Kitob bizning nafaqat ongimizga, balki qonimizga, jonimizga singib ketgandir. Insondagi kitobga boʻlgan mehr u harfni tanib, mutolaa qilishni oʻrganganidan keyin boshlanmaydi, balki, goʻdaklik davridan ulgʻayguniga qadar onasi aytgan allalar, buvisidan eshitgan ertaklari orqali yoshligidan kitob oʻqishga nisbatan mehr va ishtiyoq shakllana boradi.
Kimning qanday kitob tanlab oʻqishi oʻziga bogʻliq. Hozir aksariyat yoshlar kitob oʻqishga qiziqmay qoʻyishdi. Ular koʻproq internetdan maʼlumotlar izlashga, yangiliklarni ham onlayn tarzda topib oʻqishga moyilroq boʻlib borishayapti.
Kitob tanlashda uning qanday mazmunda yozilganligiga eʼtibor qaratish nechogʻlik muhimligini bugun yoshlar bilishadimi?
Kitob shunday katta kuch-qudratga egaki, u insonni va hatto uning taqdirini ham oʻzgartirib yubora oladi. Kezi kelganda, hech kim unga gap uqtira olmagan, odamlar bilan murosaga kelib yashay olmaydigan kimsa kitobda yozilgan birgina gapni oʻqiganida, undan taʼsirlangan holda atrofidagilarga nisbatan xushmuomala boʻlib qolishi mumkin. Baʼzilar insondagi bilimlarni oshirib, maʼnaviy dunyosini boyitishda unga yordam beradigan asosiy vosita kitob desa, boshqa birovlar esa zamon bilan birga olgʻa qadam tashlashda hamda yangiliklardan tezkor ravishda xabardor boʻlib turishda kitob oʻqib oʻtirishdan koʻra, internet, zamonaviy aloqa vositalari qulayroq ekanligini aytadi.
Bola kamolotga yetgunga qadar ota-ona farzandlariga ularning yoshiga mos kitoblar tanlab, oʻqib berishlari, ertaklar aytib, dunyoqarashining boyishida turtki boʻlishlari lozim. Keyin esa bolalari mustaqil oʻqiy boshlaganlarida qiziqarli kitoblar olib berib, boʻsh vaqtdan unumli foydalanishga oʻrgatish maqsadga muvofiqdir. Bilim olishga boʻlgan ishtiyoq kitobga boʻlgan mehr qanchalar koʻp boʻlsa, insonning maʼnaviyati tobora yuksalib, uni ezgu amallar qilishga chorlayveradi. Zotan, maʼnaviyatni boyitishda xoh kitob boʻlsin, xoh internet, undan maqsadli foydalanilsagina ijobiy natijaga erishish mumkin.
Tazaxan Qidirniyozova,
3-sonli maktab kutubxonachisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
