“YoNGʻIN XAVFSIZLIGI OYLIGI” DOIRASIDA PROFILAKTIK TADBIRLAR OʻTKAZILMOQDA

Kuz-qish mavsumida havo haroratining keskin sovib ketishi munosabati bilan yurtimizda isitish moslamalariga ehtiyoj ortib boradi. Shu barobarida tabiiy gaz yoki muqobil yoqilgʻi mahsulotlaridan foydalanish hajmi keskin oshib ketishi tufayli yongʻin xavfsizligi qoidalariga amal qilish dolzarb vazifaga aylanadi. Chunki mamlakatimizning turli hududlarida oʻtgan yillar kuz-qish mavsumida yongʻinlar bilan bogʻliq koʻngilsiz hodisalar, is gazidan zaharlanish holatlari sodir boʻlib turganligi hech kimga sir emas.

Shularni eʼtiborga olgan holda bir necha yillardan beri qish masumida yongʻinlar bilan bogʻliq baxtsiz hodisalarning oldini olish maqsadida “Yongʻin xavfsizligi oyligi” oʻtkazib kelinmoqda.

Joriy yilda ham 15-noyabrdan 15-dekabrgacha butun mamlakatimiz boʻylab “Yongʻin xavfsizligi oyligi” oʻtkazilmoqda. Oʻtgan kunlar mobaynida Amudaryo tuman Favqulodda vaziyatlar boʻlimi tomonidan ham iqtisodiyot tarmoqlari, ijtimoiy soha obʼektlari hamda xonadonlarda yongʻin xavfining oldini olish borasida profilaktik tadbirlar rejaga muvofiq olib borilayotir.

28-noyabr kuni Amudaryo tuman ixtisoslashtirilgan maktabida oylik doirasida oʻqituvchilar, oʻquvchilar uchun yongʻinga qarshi profilaktik tadbir oʻtkazildi.

Tadbirda dastlab maktab hovlisida yongʻin sodir boʻlganda ishlatiladigan asbob-uskunalar, texnika vositalari koʻrgazmasi namoyish etildi va mutaxassislar tomonidan ularni ishlatish yoʻl-yoʻriqlari tushuntirildi. Maktab hovlisida tadbirda namoyish etilgan va qay tarzda ishlatilishi tushuntirilgan asbob-anjomlardan foydalanngan holda, yongʻin sodir boʻlganda qanday harakatlanish boʻyicha oʻquvchilarning bilim va koʻnikmalarini sinovdan oʻtkazish maqsadida shartli sodir boʻlgan yongʻinni oʻchirish tajribasi namoyish etildi.

Shundan soʻng ixtisoslashtirilgan maktab kutubxonasida oʻqituvchilarga uchun “Yongʻin xavfsizligi oyligini” oʻtkazishning mazmun-mohiyati, oylik doirasida amalga oshirilayotgan chora-tadbirlar, yongʻin xavfining oldini olishda har bir fuqaroning burchi va vazifalari xususida keng tushuntirildi.

Oʻqituvchilarni mavzu yuzasidan qiziqtirgan savollarga tuman Favqulodda vaziyatlar boʻlimi xodimlari tomonidan batafsil javoblar berildi.

Tadbir soʻngida maktab oʻquvchilari istiqomat qiluvchi yotoqxonadan shartli ravishda yongʻin xabari keldi hamda tuman Favqulodda vaziyatlar boʻlimi xodimlari va koʻrgazmada qoʻyilgan yongʻin-qutqaruv vositalari xavfni bartaraf etishga tezkorlik bilan jalb etildi. Xodimlarning shiddatli harakatlari va aniq amalga oshirgan choralari tufayli shartli yongʻin oʻchirildi, hech bir oʻquvchi tan jarohati olmaganligi qayd etildi.

Mazkur tadbirda Amudaryo tumani Ixtisoslashtirilgan maktabi oʻqituvchi va oʻquvchilari yongʻin xavfsizligi qoidalari, kutilmaganda yongʻin kelib chiqqan vaziyatda qanday harakatlarni amalga oshirish lozimligi borasida keng bilim va tushunchalarga ega boʻldilar.

“Yongʻin xavfsizligi oyligi” doirasidagi tadbirlar davom etmoqda.

Sh.Erkinboyev, tuman Favqulodda vaziyatlar boʻlimi Profilaktikasi va nazorat boʻlinmasi inspektori, katta leytenat.