OFY raisi: "Maqsadimiz– infratuzilmani rivojlantirish". 3 505 nafar aholi istiqomat qiluvchi Tosh yop ovuli haqida nimalarni bilasiz?

Oʻzbek mahallalaridagi jamoaviylik, qoʻni qoʻshnilar yaxshi yomon kunlarida bir-birlariga yelkadosh boʻlib, bir-birlarini qoʻllab-quvvatlashi qanday bebaho qadriyat... toʻgʻrimi? Axir dunyoda yonginasidagi qoʻshnisining kim ekanligini bilmaydigan, eshigini qoqsangiz shaxsiy maʼlumotlaringizni toʻliq aniqlamaguncha eshigini ochmaydigan odamlar qancha. Oliyjanob xalqimiz xonadonlarining eshiklari esa, mehmon boʻlib kelajak har bir inson uchun hamisha ochiq. Soʻngi yillarda muhtaram Prezidentimiz tashabbusi bilan mahalla tizimiga boʻlgan eʼtibor kuchaydi. Qator islohotlar natijasida ovul va mahallalar qiyofasi kundan kun chiroy ochib, obod manzillarimiz safi kengaymoqda. Shulardan biri- Tosh yop ovul fuqarolar yigʻinidir. Mazkur OFY 2013-yili tashkil topgan boʻlib, 3 505 nafar aholi istiqomat qiluvchi mazkur hududga Gulshod Sobirova raislik qilib kelmoqda. Hududda 701 ta oila, 596 xonadon mavjud. Shuningdek, 2 ta (76 va 5-sonli) maktab, 4 ta xususiy maktabgacha taʼlim muassasasi hamda bitta Davlat tomonidan qurilgan (51-sonli) maktabgacha taʼlim tashkiloti bor. Shu bilan bir qatorda 7 ta Oziq ovqat doʻkoni hamda bitta «MANAS» choyxonasi, 11 ta issiqxona mavjud.

Mehr-oqibat, saxovatpeshalik xalqimizga xos azaliy odat. Joriy yilda ovuldagi ehtiyojmand, boquvchisini yoʻqotgan, tarkibida nogironligi boʻlgan farzandlari bor oilalar va yolgʻiz yashovchi fuqarolarning xonadonlariga borib, ularning holidan xabar olinib oziq-ovqat mahsulotlari, koʻmir mahsulotlari tarqatildi. Mamlakatimizda prezidentimiz rahnamoligida keksa avlod vakillarini qoʻllab-quvvatlash, ularning jamiyat va oilalar mustahkamligini saqlashdagi rolini kuchaytirish, shuningdek, yosh avlodni xalqimizning koʻp asrlik anʼanalarini hurmat qilish ruhida tarbiyalash kabi masalalarga alohida eʼtibor qaratilmoqda. Jumladan, Oʻzbekiston Respublikasi Vazirlar Mahkamasining tegishli qarori ijrosini taʼminlash maqsadida, 2019-yildan beri yurtimizda xar yili anʼanaviy tarzda oʻtkazilib kelinayotgan “Keksalar haftaligi” doirasida mahalladagi kasal yotgan nuroniy Otaxon va onaxonlar xonadonlariga borib, holidan xabar olindi. Shuningdek, 82 nafar nuroniy otaxon va onaxonlar ishtirokida Xiva, Nukus shaharlaridagi muzey va tarixiy maskanlarga, tumanimizdagi ziyoratgohlarga sayohatlar uyushtirildi.

“Yaxshidan bogʻ qolar” deydi dono xalqimiz. Bogʻ yaratish, dehqonchilik qilish tosh yopliklarning qon qoniga singgan hunarlarning biri. Joriy yil ovulda ”Yashil makon” umummilliy loyihasi doirasida ham bir qator xayrli ishlar olib borildi. Hududdagi kam taʼminlangan oilalarga fermerlar hamda Tosh yop OFY tomonidan 200 tupga yaqin mevali va manzarali daraxtlar koʻchatlari ekish uchun taqdim etilgani soʻzimizning isbotidir. Shu bilan birga, ushbu loyiha doirasida mahalla idorasi atrofidagi yerga yaqindagina oʻtqazilgan nihollar kun kelib yashil makonga aylanishiga ishongimiz keladi.

Tadbirkorlik faoliyati, qiziqishing kuchli boʻlgan mashgʻulot kim uchundir boʻsh vaqtini mazmunli oʻtkazishiga qaratilgan “hobby” boʻlsa, kim uchundir hayotining ajralmas qismi, yana kimgadir daromad manbaidir. Ovul ahli uchun esa bu ham daromad manbai, hamda tosh yoplik tadbirkorlarning qaysidir maʼnoda hayotining ajralmas qismi hamdir. Maskanda «Xar bir oila Tadbirkor» tamoyili asosida kredit olib, Qurbonboyeva Malohat va uning turmush oʻrtogʻi Xolmonov Doniyor kabi oʻz qoʻl mehnatlari bilan issiqxona tashkil qilib, unda bir-biridan goʻzal, anvoyi gullar yetishtirib oilasiga daromad keltirayotgan tadbirkorlar safi kengaymoqda. Sherboyev Baxtiyor,Urazboyeva Dildora, Begimov Tozaboy, Ganiboyev Toʻliboy, Ganiboyev Poʻlat kabi sergʻayrat tadbirkorlar qishloqda koʻplab topiladi.

Bugun yurtimizda aholini, turmush sharoiti ogʻir oilalarni ijtimoiy qoʻllab-quvvatlash, kambagʻallikni qisqartirish, muammolarni aniqlash va bartaraf etishda «Temir daftar», “Ayollar daftari”, “Yoshlar daftari» muhim ahamiyat kasb etmoqda. Mahallada bu boʻyicha roʻyxat shakllantirilib borilmoqda. Mahallaning qoʻli gul chevarlaridan biri boʻlgan Shahodat Yusupovaga kredit asosida tikuv mashinalari berilib hozirgi kunda oʻz tadbirkorlik faoliyatini boshladi. Tadbirkor ayol hozirda mahallaning 2 nafar qizlarini yoniga olib, tikuvchilik sirlarini oʻrgatib kelmoqda.

Shuningdek, «Yoshlar daftari»dan Saparboyeva Adolat, Gulmonova Mavluda kabi pazanda qizlarga pishiriqlar pishirish uchun elektr pech berildi. Tikuvchilik bilan shugʻullanish istagini bildirgan Toʻliboyeva Asaloyga esa subsidiya asosida tikuvchilik mashinasi berildi.

Ha, ovul odamlarining ham, OFY masʼullarining ham kelgusidagi rejalari katta. ­

– Kelgusidagi rejalarimiz aholini qiynab kelayotgan dolzarb masalalarga yechim topishdir. Shulardan biri – infratuzilmani rivojlantirish. Yurtdoshlarimizning ogʻirini yengil qilish maqsadida mahallamizdagi ichki va tashqi yoʻllarni taʼmirlash, shagʻal yotqizish ishlarini amalga oshirishdir, – deydi OFY raisi.

Biz esa ijodiy guruhimiz bilan ularning kelgusidagi ishlariga kuch-quvvat tilab, xayrlashdik.

Aziza MADRAHIMOVA