“Mangʻit arna” kanalini betonlash ishlari olib borilmoqda

2023-yil 11-noyabr kuni Amudaryo tumanidagi ichki xoʻjalik kanallarini betonlash ishlari yuzasidan amaliy seminar boʻlib oʻtdi.

Seminarda Qoraqalpogʻiston Respublikasi Suv xoʻjaligi vaziri Baxtiyar Juzbayev, tuman hokimi Sobir Xoʻjametov, tuman prokurori Aziz Roʻzmetov, tuman qishloq va suv xoʻjaligi boʻlimlari masʼul xodimlari, klaster, fermer xoʻjaligi va qurilish tashkilotlari rahbarlari ishtirok etdilar.

Joriy yilda tuman boʻyicha jami uzunligi 21,8 kilometr boʻlgan ichki xoʻjalik kanallarini betonlash rejalashtirilgan. Shundan tumandagi “Mangʻit arna” xoʻjaliklararo kanalidan suv oluvchi “Goʻja yop” ichki xoʻjalik kanali betonlash ishlari masʼuliyati cheklangan jamiyati shaklidagi “Amudaryotex” qoʻshma korxonasini hisobidan amalga oshirilmoqda.

Seminarda tuman hokimi Sobir Xoʻjametov suvdan samarali foydalanish va uning behuda sarflanishining oldini olish muhim ahamiyat kasb etishi toʻgʻrisida batafsil soʻz yuritdi. Soha mutaxassislari tomonidan “Goʻja yop” ichki kanalini betonlash ishlari natijasida suvning yerga soʻrilib ketishining oldi olinib, yangi texnologiyalarni joriy qilish hisobidan yil davomida jami 8,4 mln. kubometr suv iqtisod qilishinishi taʼkidlab oʻtildi.

“Goʻja yop” ichki xoʻjalik kanalining umumiy uzunligi 3,5 kilometr boʻlib, suv oʻtkazish qobiliyati daqiqasiga 1 kubometrni tashkil qiladi hamda 3ta fermer xoʻjaligi, 70ta aholi xanodonlari ushbu xoʻjalik kanalidan foydalanib keladi. Shuningdek, mazkur ichki xoʻjalik kanalidan 167 gektar yer maydoni sugʻoriladi. Shundan 74 gektar paxta, 36 gektar gʻalla, 15 gektari tomorqa maydonlariga toʻgʻri keladi.

Seminar davomida soʻzga chiqqan masʼullar suvni tejovchi texnologiyalar joriy qilingan maydonlarda mazkur texnologiyalardan maqsadli va samarali foydalanilishi yuzasidan fermer xoʻjaliklari rahbarlari va boshqa seminar ishtirokchilarga zarur tushunchalar berdi.

Suv resurslari mintaqamiz va mamlakatimiz uchun eng dolzarb masalalardan biriga aylanmoqda. Bugungi kunda koʻplab yer maydonlari eski usulda sugʻorilmoqda. Buning natijasida millionlab kubometr suv isrof boʻlmoqda va suv resurslari kamaymoqda. Ana shu suv yoʻqotishlarini kamaytirish uchun kanallarni betonlash hamda boshqa turdagi yangi materiallardan foydalanish, innovatsiyalarni qoʻllash usullari amaliyotga joriy qilinmoqda.

Yaqinda Davlatimiz rahbari raisligida boʻlib oʻtgan videoselektor yigʻilishida ham kelgusi 2024-yilga moʻljallangan davlat byudjetining eng muhim jihatlari muhokama qilingan edi. Muhokamada sanoat tarmoqlarida ham, hududlarda ham dolzarb vazifaga aylangan suv taʼminoti muammosiga alohida eʼtibor qaratilib, oxirgi ikki yilda suv xoʻjaligini saqlab qolish uchun 22 trillion soʻmga yetgan katta miqdorda mablagʻ ajratilgani qayd etildi va bu mablagʻlarni maqsadli sarflab, suvdan samarali va tejamkorlik bilan foydalanish zarurligi taʼkidlandi.

Seminarda soha vakillari fermer xoʻjaliklari rahbarlariga davlatimiz tomonidan tejamkor sugʻorish texnologiyalarini joriy etgan tadbirkorlik subʼektlariga subsidiyalar ajratish tartibi yoʻlga qoʻyilganini aytib, bu toʻgʻrisida batafsil tushuntirishlar berib oʻtdi.

Seminar ishtirokchilari “Goʻja yop” ichki xoʻjalik kanalini betonlash ishlari bilan yaqindan tanishdilar. Shuningdek, ish jarayonida uchrayotgan xato va kamchiliklar yuzasidan tegishli soha masʼullariga topshiriqlar berildi.

Tuman hokimligi Axborot xizmati