“VATAN TAYaNChI” OTRYaDI AʼZOLARIGA KOʻKRAK NIShONI TOPShIRILDI

Amudaryo tumanidagi umumtaʼlim maktablarida tashkil etilgan “Vatan tayanchi” otryadlari aʼzolarining tantanali ravishda vaʼda berish va ularga koʻkrak nishoni topshirishga bagʻishlangan marosim oʻtkazildi.

20-oktyabr kuni tuman Madaniyat boʻlimi kontsertlar zalida boʻlib oʻtgan tadbirda Shimoli-gʻarbiy harbiy okrug masʼullari, tuman Mudofaa boʻlimi boshligʻi, podpolkovnik Sherzod Murodov, boʻlim boshligʻining tarbiyaviy va mafkuraviy ishlari boʻyicha oʻrinbosari Zokir Saʼdullayev, tuman Maʼnaviyat va maʼrifat markazi boshligʻi Islom Matkarimov, Davlat xavfsizlik xizmatiga qarashli harbiy qism xizmatchisi Sherzod Atayev, davlat va jamoat tashkilotlari vakillari qatnashishdi. Shuningdek, marosimda umumtaʼlim maktablarining Chaqiruvga qadar boshlangʻich tayyorgarlik boʻyicha rahbarlari hamda 200 nafarga yaqin 10-11-sinf oʻquvchilari – “Vatan tayanchi” otryadi aʼzolari ishtirok etishdi.

Tadbirda soʻzga chiqqanlar ushbu sharafli nishonga sazovor boʻlgan yoshlarni qutlab, kelgusi faoliyatida muvaffaqiyatlar tiladi. Shuningdek, “Vatan tayanchi” harakatining asosiy vazifasi hamda maqsadi tushuntirilib, oʻsib kelayotgan yosh avlodni Vatan taqdiriga daxldorlik, maʼnaviy-axloqiy, milliy va umuminsoniy qadriyatlar hamda qonunlarimizga nisbatan yuksak hurmat ruhida tarbiyalash kerakligi taʼkidlandi.

Maʼlumki, 2022-yil 2-martda Prezidentimizning «Vatan tayanchi» bolalar va oʻsmirlar harbiy-vatanparvarlik harakati faoliyatini tashkil etish toʻgʻrisida»gi qarori qabul qilingan edi. Ushbu Qarori asosida bugungi kunda tumandagi barcha umumtaʼlim maktablarida “Vatan tayanchi” bolalar va oʻsmirlar harbiy-vatanparvarlik harakati guruhlari faoliyati yoʻlga qoʻyilgan. Bu oʻz navbatida, yurtimizda olib borilayotgan yoshlarga oid davlat siyosatining mutlaqo yangicha yoʻnalishi boʻlib, yoshlarni vatanparvarlik ruhida tarbiyalashning oʻziga xos shakli hisoblanadi.

Qarorda davlat umumtaʼlim maktablarida tahsil olayotgan 10-11-sinf oʻquvchilari orasidan vatanparvar, eng intizomli va bilimli, tashabbuskor boʻlgan 20 nafar yoshni saralab olish orqali «Vatan tayanchi» otryadlarini tashkil etish belgilangan. Shuningdek, Qarorda harakat faoliyatini qoʻllab-quvvatlash boʻyicha tegishli idora va tashkilotlarga vazifalar, otryad aʼzolarining oliy harbiy taʼlim muassasalariga oʻqishga kirishlari uchun imtiyozlar ham nazarda tutilgan. Harakat aʼzoligiga qabul qilingan faol oʻquvchilar oliy harbiy taʼlim muassasasiga kirish uchun imtiyozli tavsiyanoma hamda test sinovlari natijalariga koʻra toʻplagan ballarining 5 foizi miqdorida qoʻshimcha ballni qoʻlga kiritadi.

Taʼkidlab oʻtilganidek, yosh avlodni Vatan taqdiriga daxldorlik, maʼnaviy-axloqiy, milliy va umuminsoniy qadriyatlar ruhida tarbiyalash, erkin fikrlaydigan, mustahkam bilimli, mustaqil qaror qabul qila oladigan, mamlakat va oʻz oilasi faravonligini yanada rivojlantirish orzusida boʻlgan yoshlarni voyaga yetkazish “Vatan tayanchi” – bolalar va oʻsmirlar harbiy-vatanparvarlik harakatining asosiy vazifalaridan sanaladi. Shuningdek, oʻquvchi yoshlar orasida harbiy-vatanparvarlik ruhini uygʻotish, oʻquvchilarni odob-axloq, vatanga sadoqat, oʻziga ishonch ruhida tarbiyalash, umumtaʼlim maktab oʻquvchilarning boʻsh vaqtlarini mazmunli oʻtkazish uchun qulay sharoit yaratish, oʻquvchilarni turli xavfli gʻoyalar va “ommaviy madaniyat” niqobi ostida kirib kelayotgan salbiy taʼsirlardan himoya qilish ham asosiy vazifalardan hisoblanadi.

Tadbirda tuman Madaniyat boʻlimining havaskorlari tomonidan tayyorlangan musiqiy dastur namoyish qilinib, tomoshabinlarga yanada koʻtarinki kayfiyat baxsh etildi.

Z.Saʼdullayev, tuman Mudofaa ishlari boʻlimi boshligʻining tarbiyaviy va mafkuraviy ishlar boʻyicha oʻrinbosari.