Ekinlarni toʻqsonbosti usulida ekish boʻyicha hududiy seminarlar oʻtkazildi

Aholining ertaki sabzavot mahsulotlariga boʻlgan talabini toʻliq qondirish maqsadida hosildan boʻshagan maydonlarga sovuqqa chidamli piyoz va sarimsoqpiyoz kabi ekinlarni toʻqsonbosti usulida ekish ishlari qizgʻin surʼatlarda olib borilmoqda.

15-oktyabr kuni Amudaryo tumanining Qilichboy ovuli hududida faoliyat yurituvchi “Amirxon” fermer xoʻjaligida piyoz, sarimsoqpiyoz ekinlarini toʻqsonbosti usulida ekish boʻyicha seminar boʻlib oʻtdi.

Dehqonchilikning toʻqsonbosti usuli yaxshigina daromad manbai hisoblanadi. Bu usulda qishning toʻqson kuni nazarda tutilgan boʻlib, qish va bahor oylarida ham bozorlarimiz toʻkin-sochin, narx-navo barqaror boʻlishida qoʻl keladi. Xalqimizda “Toʻqsonda sugʻorsang, toʻqson botmon hosil olasan”, degan naql bejizga aytilmagan. Kuzda ekilib, qor ostida qoldirilgan sabzavot ekinlari urugʻlari erta koʻklamda yerdan juda barvaqt unib chiqib, tez rivojlanishi hisobiga erta hosil beradi.

Seminarda Oʻzbekiston Respublikasi Qishloq xoʻjaligi vazirining birinchi oʻrinbosari Botir Togʻayev, Prezident Administratsiyasi ishchi guruh aʼzosi Sunatillo Sobirov, tuman hokimining Qishloq va suv xoʻjaligi masalalari boʻyicha oʻrinbosari Anvar Yoʻldoshev hamda fermer xoʻjaliklari rahbarlari, mahalla va ovul fuqarolar yigʻinlari raislari qatnashdilar.

Seminarda 2024-yil hosili uchun fermer va dehqon xoʻjaliklarida piyoz va sarimsoqpiyoz ekinlarini toʻqsonbosti usulida ekishning oʻziga xos jihatlari, bu borada eʼtibor qaratish lozim boʻlgan agrotexnik talablar haqida hamda dala chetiga uzum, tut nihollarini oʻtqazish boʻyicha tushunchalar berildi.

Toʻqsonbosti usulida yetishtirilgan sabzavotlarning erta bahorda bozori chaqqon boʻlishi hech kimga sir emas. Ushbu masalaga hukumatimiz tomonidan ham alohida eʼtibor qaratilib, aholining sogʻlom ovqatlanishi, xalqimiz dasturxoni yil davomida har xil sabzavot mahsulotlari bilan taʼminlanishi bugungi kunning dolzarb masalasi sifatida eʼtirof etilmoqda. Bu borada Amudaryo tumanida ham qizgʻin ishlar olib borilmoqda.

Aytish joizki, keyingi yillarda respublikada tumanlarning ixtisoslashuvi, mintaqalarning tuproq-iqlim sharoitlari va suv bilan taʼminlanishi hamda boshqa omillarni eʼtiborga olgan holda qishloq xoʻjaligi ekinlarini oqilona joylashtirishga alohida eʼtibor berib kelinmoqda. Shundan kelib chiqqan holda bu yil tuman boʻyicha jami 1777 gektar maydonga piyoz, sarimsoqpiyoz kabi ekinlarni toʻqsonbosti usulida ekish rejalashtirilgan.

Oq oltin, Xolimbeg, Qilichboy, Doʻrman ovullarida bu borada ishlar yaxshi tashkil etilib, hududlardagi mehnatkash fermer, dehqon xoʻjaligi rahbarlari va tomorqa yer egalari har qarich yerdan samarali foydalanishmoqda.

Xususan, Oqoltin ovuli hududida 44,9 gektar yerga toʻqsonbosti usulida ekinlar ekish rejalashtirilgan. Hozirda 38,2 gektar yerdagi ekish ishlari yakunlandi.

Ekinlarni toʻqsonbosti usulida ekish fermer va dehqonlarga daromad keltirishi bilan birga, bozorlarimizda narx-navo barqarorligini taʼminlashda ham muhim ahamiyat kasb etadi. Shularni inobatga olgan holda amudaryolik dehqon va fermerlar hamda tomorqachilar kuzning iliq kunlaridan foydalangan holda ekish ishlarini qisqa fursatlarda yakunlash uchun barcha choralarni ishga solishmoqda.

Tuman hokimligi Axborot xizmati