QILIChBOY OVULI AHOLISI UChUN BEPUL TIBBIY KOʻRIK TAShKIL ETILDI

Oʻzbekiston Respublikasi Prezidentining 2022-yil 18-mart kuni sogʻliqni saqlash sohasi vakillari bilan “Tibbiyotdagi islohotlar – inson qadri uchun” mavzusidagi ochiq muloqotida tibbiy xizmat sifatini oshirish va hududlardagi oilaviy poliklinikalar sonini oshirish boʻyicha vazifalar belgilab berilgan edi. Ushbu vazifalar ijrosini taʼminlash maqsadida Oʻzbekiston Respublikasi Prezidentining 2022-yil 25-apreldagi “Birlamchi tibbiy sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha qoʻshimcha chora-tadbirlar toʻgʻrisida”gi 215-sonli qarori qabul qilindi. Ushbu qarorda 2022-yil 1-maydan boshlab birlamchi tibbiy sanitariya muassasalaridan uzoqda joylashgan hududlar aholisi uchun profilaktik tibbiy koʻriklar oʻtkazib turilishi ham vazifa qilib belgilangan.

Qaror ijrosini taʼminlash maqsadida Respublika ishchi guruhi aʼzolari tomonidan aholining muammolari va ijtimoiy ahvolini oʻrganish jarayonida 25-sentyabr kuni Amudaryo tumanining Qilichboy ovuli hududida joylashgan 7-sonli oilaviy poliklinikada chuqurlashtirilgan tibbiy koʻrik tashkil etildi.

Tadbirda Respublika muassasalaridagi barcha ixtisoslashgan markazlarning kardiolog, travmatolog, nevropatolog, jarroh, pediatr, oftalmolog, LOR, urolog, endokrinolog, akusher-ginekolog, ftiziatr, pediatr mutaxassislari tomonidan aholi tibbiy koʻrikdan oʻtkazildi.

Shuningdek aholiga qulaylik yaratish maqsadida shu kuni UTT, EKG uskunalari, koʻchma laboratoriya, Respublika ixtisoslashgan koʻz mikroxirurgiyasi markazi Qoraqalpogʻiston Respublikasi filialining “Mobil poliklinika”si ham ovul ahli xizmatida boʻldi.

Tadbirga hududning 358 nafar aholisi jalb etilib, chuqurlashtirilgan tibbiy koʻrikdan oʻtkazildi. Shundan 231 nafar fuqarolarda turli kasalliklar aniqlandi.

Tibbiy koʻrik jarayonida turli kasallik aniqlangan 228 nafar bemorlarga ambulator sharoitda davolanishga tavsiya berildi, yuqori texnologik operatsiyaga muhtoj 2 nafar bemorga tuman shifoxonasida davolanish uchun yoʻllanma berilib, 19 nafar bemorlar esa 46 turdagi bepul dori-darmonlar bilan taʼminlandi.

Mamlakatimizda soʻnggi yillarda sogʻliqni saqlash sohasini tubdan takomillashtirish, tibbiyot muassasalarini eng ilgʻor tibbiy jihozlar bilan taʼminlash, tuman markazlaridan uzoqda yashovchi aholiga sifatli tibbiy xizmat koʻrsatish va murakkab amaliyotlarni tuman darajasida bajarish borasida amalga oshirilayotgan ishlardan koʻzlangan asosiy maqsad inson qadrini ulugʻlash, aholining turmush sifati va salomatlik darajasini yanada yaxshilashdir.

Tadbirda asosiy eʼtibor aholi oʻrtasida sogʻlom turmush tarzini keng targʻib qilish, fuqarolarning tibbiy bilim va madaniyatini oshirish, kasalliklarni ilk davrida aniqlash va davolash choralarini koʻrishga qaratildi hamda tadbir ishtirokchilariga bu borada keng tushunchalar berildi.

Shuningdek tibbiy koʻrik yakunida mutaxassislar tomonidan kasalliklarni davolash va salomatlikka eʼtibor qaratish yuzasidan zarur tibbiy tavsiyalar berildi.

Shuni alohida taʼkidlash kerakki, aholining salomatligini saqlash, kasalliklarni ilk bosqichda aniqlash va oldini olish borasida hududlarda, ayniqsa chekka qishloqlarda oʻtkazilayotgan bu kabi tibbiy koʻriklar muhim ahamiyat kasb etadi.

Tuman hokimligi Axborot xizmati