SAYYoR SUDDA AJRAShISh ARAFASIDA TURGAN OILA YaRAShTIRILDI

Fuqarolik ishlari boʻyicha Amudaryo tumani sudi tomonidan ochiq sayyor sud majlisi oʻtkazildi.

Yangiobod mahallasi hududida joylashgan Amudaryo muhandislik texnikumi binosida boʻlib oʻtgan ushbu sayyor sud majlisida tumandagi mahallalardan birida yashovchi oila tomonidan berilgan nikohdan ajratish haqidagi daʼvo arizasi koʻrib chiqildi. Sud ishida sud masʼullari bilan birgalikda tomonlarning himoyachilari, fuqarolar yigʻinlari masʼullari, xotin-qizlar faollari, koʻchaboshchilar va yoshi ulugʻ keksalar ishtirok etishdi.

Sud majlisida mazkur oila tomonidan berilgan nikohdan ajratish haqidagi daʼvo arizasi, ajrashish sabablari, oilaviy muhit, oila aʼzolari oʻrtasidagi bir-birlariga boʻlgan munosabat keng muhokama etildi.

Soʻzga chiqqanlar oilalar mustahkam boʻlsa, jamiyatda ham osoyishtalik hukm surishini, baxtli oilalar tufayli yurtimiz yanada fayzga toʻlishini, oʻzaro mehrli boʻlgan ota-onalarning farzandlari ham bir-biriga mehribon boʻlishini eʼtirof etishdi. Ammo jamiyatimizda arzimagan sabablar, tushunmovchiliklar, uchinchi shaxsning aralashuvi natijasida ayrim oilalar ajralish yoqasiga kelib qolayotgani, bunday oilalarning farzandlari koʻngli yarim boʻlib ulgʻayishini, hatto tarbiyasiga taʼsir qilib, nosoz yoʻllarga yurib ketishini alohida taʼkidlashdi. Kattalar oʻrtasida bir-birini tushunmaslikdan kelib chiqadigan janjal va mojarolarning ham bola tarbiyasiga salbiy taʼsir koʻrsatishini, maʼnan sogʻlom, odob-axloqli farzand tarbiya qilish uchun er va xotin turmushda sabrli, turli sinovlarga bardoshli boʻlishi, oilaviy muammolarni birgalikda, hamjihatlikda hal qilishga harakat qilishi kerakligini aytib oʻtishdi.

Majlis davomida fuqarolar yigʻinlari masʼullari, xotin-qizlar faollari oʻz hududlarda notinch oilalarni yarashtirish, ajrashishlarning oldini olish borasida qilinayotgan ishlar xususida maʼlumot berdi. Shuningdek, ajrashish arafasida turgan oilalarni yarashtirish, yuzaga kelgan nizolarni tinch yoʻl bilan bartaraf etish borasida fuqarolik ishlari boʻyicha sudlar hamda har bir mahalla fuqarolar yigʻini qoshida tashkil etilgan yarashtiruv komissiyalari tomonidan zarur chora-tadbirlar amalga oshirilayotganini maʼlum qilishdi.

Nikohdan ajratish boʻyicha sudga murojaat qilishning sabablari tahlil qilinib, bunga asosan moddiy jihatdan qiynalganlik, farzandsizlik, spirtli ichimliklarni suiisteʼmol qilish va boshqalar sabab boʻlishi, mazkur arizalar bilan sudga murojaat qilganlarning koʻp qismi yosh oilalar, aksariyatini 18 yoshdan 25 yoshgacha boʻlganlar tashkil qilishi taʼkidlab oʻtildi.

Shundan soʻng, Fuqarolik ishlari boʻyicha tuman sudiga ajrashish uchun daʼvo ariza bilan murojaat qilgan mazkur oilada yuzaga kelgan mojarolarning sabablari tahlil qilindi. Masʼullar tomonidan ajrashish arafasida turgan ushbu oila bilan induvidual suhbatlar oʻtkazilib, ularni yarashtirish choralari koʻrildi. Har biriga oila muqaddasligini, uni asrab-avaylash kerakligini, hayot tashvishlarini birgalikda yengishga harakat qilish, bir-biriga yelkadosh boʻlish kerakligini tushuntirishdi.

Mahalladagi yoshi ulugʻ keksalar ham oʻz hayotiy tajribalaridan kelib chiqib, pand-nasihatlar berishdi. Nikohning muqaddasligi, ajrimlarning asl sabablari va mohiyati haqida ham soʻz yuritishdi. Shuningdek, yoshlarga uzoq yillar birga tinch-totuv yashagan, hayotning turli sinovlaridan matonat va sabr bilan yashab kelayotgan piru-badavlat oilalar, nuroniylar va kayvoni onalar yoshlarga oʻrnak qilib koʻrsatildi.

Oʻtkazilgan suhbatlar besamar ketmadi. Ochiq sud majlisida taraflar yarashtirilib, ajrashish arafasidagi bir oila saqlab qolindi.

Q.Atamuradov, Fuqarolik ishlari boʻyicha tuman sudi raisi