«KAMBAGʻALLIKNI QISQARTIRISh BOʻYIChA XITOY TAJRIBASI» MAVZUSIDA ONLAYN SEMINAR BOʻLIB OʻTDI

Davlatimiz rahbari tashabbusi bilan mahallalarni ijtimoiy-iqtisodiy rivojlantirish, aholi bandligini taʼminlash, tadbirkorlikni rivojlantirish va shu orqali kambagʻallikni qisqartirish maqsadida 2022-yil 1-yanvardan boshlab har bir mahallada hokim yordamchisi lavozimi joriy etilgan edi. Ularga yaratib berilgan sharoit va moliyaviy dastaklar qisqa davrda mahalla ahli bilan ijobiy munosabat oʻrnatish imkonini berib, aholini ijtimoiy himoya qilish, ularning bandligini taʼminlash va tadbirkorlik tashabbuslarini qoʻllab-quvvatlash borasidagi ishlari natijadorligini oshirdi.

Respublika miqyosi boʻylab “Xitoyning kambagʻallikni qisqartirish boʻyicha tajribasi” mavzusiga bagʻishlangan onlayn seminar ham hokim yordamchilari uchun ushbu sohada tizimli ishlarni yoʻlga qoʻyish borasida yordamchi boʻldi.

Seminar Kambagʻallikni qisqartirish va bandlik vazirligi, Oʻzbekistonning Xitoydagi elchixonasi, Xitoydagi kambagʻallikni qisqartirish xalqaro markazi va BMTning Taraqqiyot dasturi bilan hamkorlikda tashkil qilindi.

21-25-avgust kunlari oʻtkazilgan seminar Amudaryo tumani hokimligining studiyasida ham tashkil qilinib, tumanda mavjud 49ta mahallaning hokim yordamchilari ishtirok etdi.

Ushbu seminar Oʻzbekiston Respublikasi Prezidentining 2023-yil 12-iyundagi farmonining ijrosini taʼminlash maqsadida hamda Oʻzbekiston Respublikasi Kambagʻallikni qisqartirish va bandlik vazirligi va Xitoydagi kambagʻallikni qisqartirish xalqaro markazi oʻrtasidagi anglashuv memorandumi, Oʻzbekistonning kambagʻallikni qisqartirish boʻyicha delegatsiyasining Xitoyga tashrifi davomida erishilgan kelishuvlar asosida tashkil qilindi.

Seminar mahallalarda aholi bandligini taʼminlash va kambagʻallikni qisqartirish yoʻnalishida hokim yordamchilari samaradorligini oshirishga bagʻishlandi.

Onlayn seminar 6ta tematik maʼruzlardan iborat boʻlib, birinchi kunida ishtirokchilarga qisqa muddatli oʻquv-mashgʻulotning mazmun-mohiyati va dasturli ish rejasi tanishtirib oʻtildi.

Shuningdek, seminar “Kambagʻallikdan chiqish va yuqoriga intilish, maqsadli yordam” mavzusida videolar, amaliy misollar bilan ishtirokchilarga tushuntirildi.

Maʼlumki, Xitoy Xalq Respublikasi dunyo mamlakatlari oʻrtasida kambagʻallikni qisqartirish boʻyicha yetakchi mamlakat hisoblanadi. Unda kambagʻallik darajasi 0,5-1 foizni tashkil qiladi. Holbuki, ushbu koʻrsatkich XX asrning 70-80-yillarida 70 foizdan yuqori boʻlgan. Bu esa mamlakatda kambagʻallikka qarshi kurashish boʻyicha joriy etilgan manzilli ishlarning yuqori samaradorligini bildiradi va jahon hamjamiyati uchun bebaho tajriba sifatida eʼtirof etildi.

Mazkur seminarning maqsadi ishtirokchilarga Xitoyning kambagʻallikni qisqartirish sohasida amalga oshirgan chora-tadbirlari, aholi daromadlarini oshirish boʻyicha qoʻllanilgan manzilli instrumentlari va kambagʻal aholi qatlamlari bilan individual tarzda ishlash mexanizmlari kabi tajribasini oʻrgatish hisoblanadi.

Seminarni tashkil etish natijasida mahallalarda faoliyat yuritayotgan hokim yordamchilarida ushbu mavzu boʻyicha tushunchalar va unga qarshi kurashish boʻyicha xalqaro tajribalar shakllantirildi.

Shuningdek, ishtirokchilar kambagʻallik tushunchasi va uning sabablari, aniqlash metodikasi, ushbu toifadagi oilalar bilan ishlash, ularning xohish va istaklarini aniqlash, kasb-hunarga oʻqitish uchun yoʻnaltirish va tadbirkorlikka jalb etish hamda bandligini taʼminlash boʻyicha tajribalarga ega boʻldi.

Seminarda hokim yordamchilari har bir kambagʻal oilaga individual yondashishi, yangi innovatsion mexanizmlarni qoʻllashi va oilalarni kambagʻallikdan chiqishiga qoʻshimcha yordam boʻlishi koʻzda tutildi.

Seminar yakunida ishtirokchilar olgan bilimlarini mustahkamlash uchun test sinovlaridan oʻtkazildi.

Tuman hokimligining Axborot xizmati