MANGʻITDA YaNGI SAVDO MARKAZI IShGA TUShIRILDI

Amudaryoliklar mamlakatimiz mustaqilligimizning 32 yilligini munosib qarshi olish uchun tayyorgarlik qizgʻin tus olayotgan shukuhli damlarda – shu yilning 20-avgustida quvonchli voqeaning guvohi boʻldilar: Mangʻit shahrining Boyovul mahallasi hududida “Shohjahon” savdo markazi ish boshladi.

Ilgari toʻla foydalanilmay turgan ikki qavatli zamonaviy uslubda qurilgan binoni ijraga olib ish boshlagan tadbirkor Dostonbek Bobojonov tumanimiz aholisiga zamonaviy talablar asosida savdo xizmati koʻrsatishni maqsad qilgan. Savdo markazi tashqaridan salobatli koʻrinadi va ichkarisi ham shinam, koʻrkam boʻlib, bu yerda xaridorlar uchun ham, sotuvchilar uchun ham munosib sharoitlar yaratilgan. Mazkur savdo markazining ochilish marosimi mangʻitliklar uchun esda qolarli voqea boʻldi.

Tadbirda tuman hokimi oʻrinbosari Faxriddin Yusupov, Boyovul mahalla fuqarolar yigʻini raisi Erkin Husainov, mahalla faollari, tadbirkorlar, “Yusuf Eshon bobo” jomʼe masjidi va hududlar imomlari ishtirok etdilar.

Tadbirni Boyovul mahalla fuqarolar yigʻini raisi Erkin Husainov ochdi va yangi faoliyat boshlayotgan tadbirkorni savdo markazini ishga tushirayotgani bilan qutladi. Tabriklardan soʻng Dostonbek Bobojonov barcha yigʻilganlarni savdo markazi ichkarisiga taklif etdi va markaz faoliyati bilan tanishtirdi.

Taʼkidlanganidek, savdo markazida maishiy texnikalar, uy jihozlari, mebellar, smartfon va gadjetlar, kompyuter texnikalari arzon va maqbul narxlarda sotiladi.

Markazda mashhur va ishonchli ishlab chiqaruvchilarning jami 30 mingdan ortiq turdagi mahsulotlari sotuvi yoʻlga qoʻyilgan.

Eʼtiborli jihati shundaki, mahsulotlarga toʻlovlarni 3 oydan 3-yilgacha boʻlgan muddatda boʻlib toʻlash imkoniyati mavjud. Buning uchun ortiqcha ovoragarchiliklarsiz sanoqli daqiqalarda hujjatlar rasmiylashtiriladi. Yurtdoshlarimizga bayram arafasida foydali xaridlarni taklif etayotgan “Shohjahon” savdo markazi xodimlari xaridorlarga sifatli xizmat koʻrsatishga harakat qilishayapti.

Savdo markazi ishga tushirilishi munosabati bilan bu yerda 11 nafar yurtdoshlarimiz doimiy ish bilan taʼminlandi.

Shunisi eʼtiborliki, xalqimiz turmushi farovonlashib borayotgani sari ularning zamonaviy axborot texnologiyalari va maishiy texnikalarga, uy jihozlariga talabi ham ortib bormoqda. Shu maʼnoda olib qaraydigan boʻlsak, “Shohjahon” savdo markazining ishga turishilishi yurtdoshlarimizga xarid qilishda tanlash imkoniyatini kengaytirgani bilan ham ahamiyatli boʻldi.

Ochilish marosimiga tashrif buyurgan mehmonlar va ilk xaridorlarga rastalardagi mahsulotlar haqida batafsil maʼlumotlar berildi. Oʻz navbatida mehmonlar ham yangidan tadbirkorlik faoliyatini boshlayotgan Dostonbek Bobojonovga va uning hamkorlariga ishlari oʻngidan kelishini tilab duo qildilar.

Sevara ISMOILOVA.