FAVQULODDA VAZIYaTLARNING OLDINI OLIShGA BAGʻIShLANGAN MAXSUS-TAKTIK OʻQUV MAShQI OʻTKAZILDI

Qoraqalpogʻiston Respublikasi Vazirlar Kengashining raisi, Fuqaro muhofazasi boshligʻining 2023-yil 14-avgustdagi 10-sonli hamda Amudaryo tumani Fuqaro muxofazasi boshligʻining 2023-yil 15-avgust kungi 7-sonli buyruqlari ijrosini taʼminlash maqsadida Amudaryo tumanida 2023-2024-yillar kuz-qish mavsumida yuzaga kelishi mumkin boʻlgan favqulodda vaziyatlarning oldini olish va hamkorlikdagi tashkilotlarning toʻgʻri harakat qilishlari boʻyicha joriy yilning 16-avgust sanasida Amudaryo tumani FVDqT xizmatlari va mexanizatsiya yigʻma komandalari bilan maxsus-taktik oʻquv mashqi oʻtkazildi.

Mazkur maxsus-taktik oʻquv mashqini oʻtkazishdan maqsad 2023-2024-yillar kuz-qish mavsumida Amudaryo tumani hududida yuzaga kelishi mumkin boʻlgan kommunal tizimlaridagi favqulodda vaziyatlarning oldini olish boʻyicha yuklatilgan vazifalarni oʻz vaqtida va sifatli bajarish, maxsus-taktik oʻquv mashqida tabiiy va texnogen xususiyatli favqulodda vaziyatlar oqibatlarini bartaraf etishda FVDT hududiy va quyi tizimlari kuch-vositalarining hamkorlikdagi harakatlarini takomillashtirish va muvofiqlashtirish ishlarini samarali tashkil etishdan iborat boʻlib, 4ta bosqichda amalga oshirildi.

Maxsus-taktik oʻquv mashqining 1-bosqichida Qoraqalpogʻiston Respublikasi FVB boshligʻining birinchi oʻrinbosari - Shtab boshligʻi, polkovnik B.Orazbayev, Amudaryo tumani hokimining oʻrinbosari, “Yigʻma komanda” komandiri N.Kamolov, Qoraqalpogʻiston Respublikasi FVB boʻlim boshligʻi, podpolkovnik Ye.Arzuyev va Amudaryo tumani Favqulodda vaziyatlar boʻlimi boshligʻi, podpolkovnik I.Hosilovlar boshchiligida Yangiobod MFY hududida joylashgan Amudaryo tuman hokimligi binosi oldida tuman FM xizmatlari yigʻma komandasi va yigʻma mexanizatsiya otryadlarining kuch va vositalari tayyorgarligini koʻzdan kechirish uchun saf koʻrigi oʻtkazildi. Saf koʻrigida 23ta texnika va 106ta shaxsiy tarkib ishtirok etdi.

Tadbirning 2-bosqichida tuman gaz taʼminoti xizmati kuch va vositalarining gaz quvurlarida yuzaga kelgan avariyalarni bartaraf etishdagi amaliy harakatlari koʻzdan kechirildi. Kuzatish jarayonida 2023-2024-yil kuz-qish mavsumi oldidan Amudaryo tumani boʻyicha jami 24 476ta aholi xonadoni suyultirilgan gaz bilan bir maromda muntazam taʼminlanib kelinayotgani maʼlum boʻldi. Shuningdek, tadbirda tumandagi 24 476ta xonadonlarga ID karta tarqatilib, jami aylanmadagi 28 402 dona filial ijara ballonlari va aholining oʻz hisobidagi 2 540ta gaz ballonlariga yorliq (stiker)lari yopishtirilgani koʻrsatib berildi.

Shoxobchalarga uzoq boʻlgan hududlardagi 8 169ta xonadonda yashovchi istemolchilarga maxsus ISUZU avtomoshinalarida suyultirilgan gaz ballonlari yetkazib berilayotgani alohida qayd etildi.

Maxsus-taktik oʻquv mashqining 3-bosqichida tuman energetika xizmati kuch va vositalarining elektr tarmoqlarida yuzaga kelgan avariyalarni bartaraf etishdagi amaliy harakatlari koʻzdan oʻtkazildi. Unga koʻra, 2023-2024-yil kuz-qish mavsumi oldidan reja buyicha havo tarmoklari rejada belgilangan quvvatdagi elektr energiyasini oʻtkazish quvvatiga egaligi, tarmoqlarga tegib turgan daraxt shoxlaridan tozalanib, salqi simlar qayta tortilgani, tayanchlar raqamlangani va reja boʻyicha 108 dona transformator punkti holati yaxshilangani nazoratdan oʻtkazildi. Tadbir jarayonida transformatorlarning shitlari boʻyalib, avtomatlari, rubilniklari, predoxranitellari ichki jihozlari almashtirilgani va tevarak-atroflari yovvoyi oʻtlardan tozalanib, 46 dona transformator punktlari kapital taʼmirdan chiqarilgani va boshqa barcha zarur tayyorgarlik ishlari amalga oshirilgani maʼlum boʻldi.

Maxsus-taktik oʻquv mashqining 4-bosqichida tuman suv taʼminoti xizmati kuch va vositalarining suv quvurlarida yuzaga kelgan avariyalarni bartaraf etishdagi amaliy harakatlari koʻzdan kechirildi.

Maʼlum boʻlishigcha, ayni paytda Amudaryo tumanida jami 323,2 km. uzunlikda suv tarmoqlari mavjud boʻlib, shundan 194 km. suv quvurlari eskirgan. Markazlashgan ichimlik suvidan foydalanuvchi abonentlar soni esa 11 371tani tashkil etadi. 1 210ta xonadon koʻcha kolonkasidan foydalanadi. Shulardan 4 935ta xonadonga suv oʻlchagich asboblari oʻrnatilgan boʻlib, aholining 44,3 foizi markazlashgan ichimlik suvi bilan taʼminlangan.

Bugungi kunda tumanda 6 436ta xonadonga maxsus avtotransportlar orqali ichimlik suvi tashib berish yoʻlga qoʻyilgan boʻlib, aholining 36,8 foizi muqobil (quduq) suv manbalaridan foydalanishadi.

Maxsus-taktik oʻquv mashqi jarayonida 2023-2024-yillar kuz-qish mavsumida aholining sifatli tabiiy gaz, elektr energiyasi va ichimlik suvi va issiq suv bilan taʼminlanishi borasidagi tayyorgarlik ishlarining holati atroflicha oʻrganilib, favqulodda vaziyatlar sodir boʻlishining oldini olish borasida sohalar masʼullariga zarur topshiriq va tavsiyalar ham berildi.

Robiya YOʻLDOShEVA.