Bayram oldidan oziq-ovqat va qishloq xoʻjaligi mahsulotlari yarmarkasi tashkil etildi

Mamlakatimizda har yili eng ulugʻ, eng aziz bayramimiz – istiqlolga erishilgan kun va Yangi yil arafasida aholiga qulaylik yaratish va mahsulotlar tannarxining barqarorligini saqlash uchun oziq-ovqat, qishloq xoʻjaligi mahsulotlari yarmarkalari oʻtkaziladi. Yurtimizning barcha shahar, tumanlari markazlarida hamda aholi zich yashaydigan hududlarda arzonlashtirilgan savdo yarmarkalari tashkil etilishi yurtdoshlarimizga ulkan qulaylik yaratmoqda.

Butun mamlakatimizda boʻlgani kabi tumanimizning “Mangʻit dehqon bozori” masʼuliyati cheklangan jamiyati qoshidagi “Mangʻit-bozor erkin xarid” MChJ tomonidan ham arzonlashtirilgan oziq-ovqat va qishloq xoʻjaligi mahsulotlari yarmarkasi faoliyati yoʻlga qoʻyilgani mustaqillik bayrami arafasida tumanimiz aholisi quvonchiga quvonch qoʻshdi. Muhim sanalar, bayramlar munosabati bilan birovni yoʻqlash, yaqin qarindoshlar, birodarlarni mehmonga chaqirib siylash, dildan suhbat qurib, quvonchini baham koʻrish xalqimizga xos azaliy qadriyatlardandir. Aslida ham qachonki uyimizga mehmon kelsa, koʻnglimiz quvonchdan yayrab, ularni eng mazali mevalar bilan siylagimiz keladi, dasturxonga shirin taomlar tortish orqali mehmonga hurmat-ehtiromimizni ifoda etamiz.

Shunday qutlugʻ kunlarda ichki istʼmol bozorini toʻldirish, narxlarni barqarorlashtirish maqsadida oziq-ovqat va qishloq xoʻjaligi mahsulotlari yarmarkalari faoliyati yoʻlga qoʻyilganligi nur ustiga aʼlo nur boʻlayapti.

Mangʻit Dehqon bozori oldida tashkil etilgan yarmarkada mahsulotlar serob ularni plastik kartalar orqali ham xarid qilish imkoniyati ham yaratilgan. Shu yilning 15-avgustidan 15-sentyabrigacha davom etadigan yarmarkada tumanimiz aholisi har kuni soat 8:00dan 20:00gacha oilasi ehtiyoji uchun asosiy oziq-ovqat va qishloq xoʻjaligi mahsulotlarini xarid qilishlari mumkin, Savdo yarmarkasini hududiy taʼminot korxonalari, tumandagi dehqon, fermer xoʻjaliklari sifatli va xavfsiz mahsulotlar bilan taʼminlab turishibdi. Savdo nuqtalarida sotuvchilar uchun ham zarur sharoitlar yaratilganligini ham eʼtirof etish joiz.

Yarmarkada har kuni 18ta savdo oʻrnida qoramol goʻshti, qaymoq, un, paxta va kungaboqar yogʻlari, tuxum, kartoshka, piyoz, sabzi, qovun, tarvuz, baqlajon kabi mahsulotlar uzluksiz sotilmoqda.

Eʼtiborli jihati yarmarkadagi un va paxta, kungaboqar yogʻi va tovuq goʻshtidan tashqari barcha mahsulotlar tumanimiz mehnatkashlari mehnatlaridan yaratilgan mahsulotlardir. Tovuq goʻshti hozircha Xorazmdan, “Urganch, Umid yulduzlari” xususiy korxonasidan keltirilayapti. Yaqin kunlarda tumanimizning parrandachilik sohasida faoliyat yuritayotgan tadbirkorlari yetishtirayotgan parhez goʻshtlari savdoga chiqariladi.

Yoz oxirlab borayapti. Oʻtayotgan har bir kun bizni mamlakatimiz mustaqillikka erishgan qutlugʻ sana – 1-sentyabrga yaqinlashtirayapti. Butun yurtimiz boʻylab istiqlol shukuhi kezib yurgan bugungiday quvonchli kunlarda arzonlashtirilgan oziq-ovqat va qishloq xoʻjaligi mahsulotlari yarmarkasi shu aziz Vatanda inson qadri ulugʻ ekanligidan dalolat bermoqda.

Oygul RAJABOVA.