MANGʻITDA YaNGI YoGʻ-MOY ZAVODI IShGA TUShISh ARAFASIDA

Bugungi kunda Oʻzbekistonning xorijiy mamlakatlar bilan iqtisodiy, siyosiy-madaniy aloqalari tobora rivojlanib bormoqda. Natijada mamlakatimiz dunyoning yetakchi davlatlari bilan hamkorlikni yoʻlga qoʻymoqda.

Aytish joizki, ishlab chiqarishni madernizatsiyalash, mahalliylashtirish, import oʻrnini bosuvchi tovarlarni ishlab chiqarish va koʻpaytirish bugungi kunning asosiy talabidir. Bu tabiiy resurslar, qishloq xoʻjaligi mahsulotlari, ishchi kuchi mavjud chekka hududlarda ishsizlikni bartaraf etishda ham oʻzining ijobiy samarasini beradi.

Amudaryo tumanida masʼuliyati cheklangan jamiyat shaklidagi “Amudaryotex” xorijiy korxonasi zavodi qoshida yogʻ-moy ishlab chiqarish zavodi faoliyati ham yoʻlga qoʻyilayotganligi tufayli yana 100 nafardan ziyod amudaryoliklar ish bilan taʼminlanadi. Xitoy texnologiyasi asosida faoliyat yuritadigan zavod paxta-toʻqimachilik klasteri sifatida faoliyat yuritayotgan xorijiy korxonada qayta ishlash jarayonida paxtadan ajralib chiqqan chigitdan yogʻ-moy ishlab chiqarishga ixtisoslashgan.

Ayni kunda zavodda Jizzax yogʻ-moy zavodidan kelgan tajribali texnologlar va texnologiyani oʻrnatishda ishtirok etgan mutaxassislar ishtirokida mahsulot ishlab chiqarish jarayoni koʻzdan oʻtkazilmoqda va sinov tariqasida mahsulot ishlab chiqarilmoqda.

Ushbu texnologiyalarni oʻrnatishga Investitsiya dasturi doirasida 3,5 million AQSh dollari miqdorida kredit mablagʻi va “Amudaryotex” xorijiy korxonasining 27 milliard 339 million soʻm mablagʻi sarflandi.

Zavodda oʻrnatilgan texnologiya yiliga 10 ming tonna yogʻ-moy ishlab chiqarish quvvatiga ega va paxta chigiti yogʻi, kungaboqar yogʻi, soya yogʻi ishlab chiqarish imkoniyatiga ega.

Zavodda ayni kunda texnologiyalarni sozlash, uskunalarni sinovdan oʻtkazish ishlari olib borilayapti. Shuningdek, ishga qabul qilingan ishchilarga texnologik uskunalar hamda ish jarayonlarni boshqarish oʻrgatilayapti.

Zavodda yogʻ-moy ishlab chiqarish uchta bosqichda, yaʼni uchta tsexda amalga oshiriladi. Eng oxirgi bosqichda mahsulot tozalanib, isteʼmolga yaroqli holga keltiradi.

Paxtani qayta ishlashga moʻljallangan masʼuliyati cheklangan jamiyat shaklidagi “Amudaryotex” xorijiy korxonasi yiliga 10 ming tonnalik yogʻ-moy ishlab chiqarish quvvatiga ega yangi zavodni ishga tushirishi natijasida yurtimiz aholisiga sifatli paxta, kungaboqar va soya yogʻini yetkazib berish imkoniga ega boʻlish birga, tumanimiz iqtisodi yuksalishiga ham munosib hissa qoʻshadi. Shuningdek, yuz nafardan ziyod ishsiz fuqarolarning bandligini taʼminlaydi.

Yurtimizda bugungi kunda yangi ishlab chiqarish korxonalarini tashkil etish orqali aholi bandligini taʼminlash, importni qisqartirish va eksportni rivojlantirishga alohida eʼtibor qaratilmoqda. Yangidan ish boshlash arafasida turgan yogʻ-moy zavodi ham tumanimiz aholisining hayoti yana ham farovonlashishiga xizmat qiladi, albatta.

Oygul RAJABOVA.