Deputat – el xizmatida

Hayotda odamlar turli-turli kasblarda faoliyat olib boradi. Barcha sohalar unda mehnat qilayotgan insonlarning fidoyiligi, oʻz kasbiga boʻlgan hurmati asosida rivojlanadi. Intellektual salohiyatli, intiluvchan xodimlar oʻz jamoasidagina emas, el-yurt oldida obroʻ-eʼtibor qozonadi.

Tuman Madaniyat va turizm boʻlimida mehnat qilayotgan Oybek Begimovni bugungi kunda tumanimizda koʻpchilik taniydi desam, adashmagan boʻlaman. Buning boisi mehnat faoliyati bilangina bogʻliq emas. U iqtidorli suxandon sifatida tumanimizda oʻtkazib kelinayotgan barcha davlat tadbirlarida, muhim sanalar munosabati bilan tashkillashtirilgan tadbirlarda, ommaviy koʻngilochar tomoshalarda boshlovchilik qilib, elimizga sidqidildan xizmat qilib kelayapti.

U maktabni tugatgach, K.Ayimbetov nomidagi Nukus madaniyat kollejining klub tadbirlari rejissyori yoʻnalishida oʻqib, qiziqishlariga koʻra bilim va malakalarini oshirdi. Mehnat faoliyatini 2006-2011-yilda tumandagi 9-sonli Choykoʻl qishloq klubi mudiri boʻlib ishlashdan boshladi. keyinchalik markaziy madaniyat uyida badiiy rahbar, direktor oʻrinbosari, madaniyat va aholi dam olish markazi ommaviy-madaniy va maʼrifiy hamda teatrlashtirilgan tadbirlarni oʻtkazish boʻyicha rejissyor vazifalarida ishladi. Ayni kunda tuman Madaniyat va turizm boʻlimi madaniyat markazida ommaviy-madaniy va maʼrifiy hamda teatrlashtirilgan tadbirlarni oʻtkazish boʻyicha rejissyor boʻlib ishlayapti.

Odatda ommabop madaniy tomoshalarni koʻrganimizda koʻnglimiz tozarganday ruhimiz yengillashadi, atrofga oʻzgacha nigoh bilan qaraymiz. Bunday kechinmalar tomosha taʼsiri ekanligini his qilamiz-u biroq shunday taʼsirli va zavqli tomoshalarni tayyorlagan insonlarning mashaqqatli mehnatlari haqida oʻylab ham koʻrmaymiz.

Oybek Begimov 17-yildan beri ana shunday tomoshalarni tayyorlashga hissa qoʻshishdan tashqari ularda boshlovchilik ham qiladi. Bu unga ikki hissa masʼuliyat yuklaydi.

Shuningdek, ishdan boʻsh vaqtlarida yurtdoshlarimizning toʻy-tantanalarida ham xizmat qilib, el olqishini olib kelayapti.

Oybek Begimov oʻz mehnat jamoasida, tumanimizda halol mehnatlari tufayli eʼtibor qozongan inson. Yosh boʻlsa-da, unga Boyovul saylov okrugi saylovchilari ishonch bildirishib, tuman Kengashi deputati qilib saylashgan. U xizmat lavozimi yuklamalari qatorida deputatlik burchini ham ado etishga, saylovchilari bilan muntazam uchrashib, ularning turmushidagi muammolari hal boʻlishi uchun ham intiladi.

Joriy yilning oʻzida Boyovul mahalla fuqarolar yigʻini binosida 3-sektor rahbari, Xalq qabulxonasi mudirining sayyor qabuli tashkillashtirilishiga bosh boʻldi va aholi hayotidagi muammolarni masʼullarga yetkazishga intildi.

Hududdagi maktab oʻquvchilari bilan, uyushmagan yoshlar bilan uchrashuvlar oʻtkazib, ularning maʼnaviyatini yuksaltirishga harakat qildi, bugungiday erkin, farovon hayotni qadrlashga, yetuk insonlar boʻlib voyaga yetib, yurtimizga xizmat qilishga chorladi. Oʻz hududida amalga oshirilayotgan obodonlashtirish ,qurilish ishlarini nazorat qilib borishga mehrga muhtoj insonlardan xabar olishga ham vaqt topadi.

Hududning Ahmad Yassaviy koʻchasida yashovchi Ilhom Bobojonov xonadoni oldida turgan elektr simyogʻoch chirib yaroqsiz holga kelib qolgani, qulab tushish xavfi borligini deputatga aytganidan koʻp oʻtmayoq eski simyogʻoch tuman Elektr tarmoqlari korxonasi xodimlari tomonidan yangisiga almashtirildi. Shuningdek, saylovchilar bilan uchrashuv chogʻida fuqarolar Qilichboy, Zulfiya nomli, Tadbirkorlar koʻchalaridagi xonadonlar tomorqasiga oqar suv yetishmayotganini bildirishgan edi. Bu borada tegishli idoralarga murojaat qilib, Mangʻit arna kanaliga nasos oʻrnatilishiga bosh boʻlgan deputatdan aholi juda minnatdor boʻldi. Oybek Begimov esa eliga nafi tegayotganida faxrlanib yashaydi. Zero el-yurt gʻamida yashash – haqiqiy olijanoblikdir.

Sevara ISMOILOVA.