Soʻzi bilan amali bir fermer

Bugun yurtimizda yer olaman, ekin ekib, yurt ravnaqiga, mamlakat iqtisodiyotiga oʻz ulushimni qoʻshaman, aholining turmush farovonligini yaxshilab, ishsiz aholini ish bilan taʼminlayman degan fuqarolarimiz koʻplab topiladi.

Lekin yerdan unumli foydalanish, bozorlarimizni sarxil meva-sabzavotlar bilan toʻliq taʼminlash birmuncha mashaqqatni talab etadi. Shunga qaramay, fermerlik kasbining bor mashaqqat va masʼuliyatini oʻz yelkasiga ortib yurtimiz rivojiga va aholi farovonligiga oʻz hissasini qoʻshib kelayotgan fermerlar soni tobora koʻpaymoqda.

Mamlakatimizda fermer, dehqon xoʻjaliklarini va tomorqa yer egalarini yanada rivojlantirish, ularning faoliyat koʻlamini kengaytirishga ustuvor ahamiyat berilayotgani tufayli Amudaryo tumanining Oq oltin ovuli hududidagi “Xolbek-Elbek” fermer xoʻjaligi rahbari Inomjon Madraimovda ham fermerlik faoliyati bilan shugʻullanish istagi uygʻondi. U oʻz faoliyatini 2015-yilda boshlagan edi. Faoliyatini boshlaganiga hali koʻp boʻlmasada ishning koʻzini bilgani uchun Amudaryoning eng ilgʻor fermerlari qatoridan joy oldi.

Joriy yilgi hosil uchun fermer jami 94,6 gektar ekishlik maydonining 50 gektar qismiga paxta, 22 gektariga bugʻdoy, 3 gektariga tarvuz, qolgan 19,6 gektariga turli dukkakli va moyli ekinlar, poliz mahsulotlarini ekdi.

Erta bahordan qadalgan urugʻ navlari bugun oʻzining barakali hosilini berib, unga katta daromad keltirmoqda. Ayniqsa, Inomjon Madraimovning fermer xoʻjaligi dalalarida yetishtirilgan neʼmatlar oʻziga xos, taʼmi-yu xususiyati bilan taxsinga loyiq. Bunda lafzi halol, fidoyi dehqonlarimizning mehnati mujassam.

Fermer xoʻjaligida yetishtirilayotgan sarxil mahsulotlar endilikda nafaqat xalqimizning, balki xorijliklar dasturxonini ham bezab, fayzini oshirmoqda. Ilgʻor fermer ichki bozorlarimizni ushbu arzon va sifatli qishloq xoʻjaligi mahsulotlari bilan taʼminlabgina qolmasdan, yetishtirgan mahsulotlarini xorijga eksport qilmoqda. Bugungi kunda fermer xoʻjaligida 6 nafar ishchi, 20 nafar pudratchi faoliyat yuritmoqda.

Keyingi yillarda butun dunyoda boʻlgani kabi yurtimizda ham suv taqchilligi sezilmoqda. Bu esa suvdan oqilona foydalanishni talab etadi. Tashabbuskor, innovatsion yondashuvlarni ishlab chiqarishda qoʻllashni xush koʻradigan fermer gʻoʻza maydonlarini tomchilatib sugʻorish usulidan ham foydalanmoqda.

Shu oʻrinda aytish lozimki, bugungi fermerlarimiz ongida tom maʼnoda tub burilishlar yasaldi. Bundan oʻn besh yil oldin daromad koʻrish, mashina olib, uy qurish maqsadida mehnat qilgan fermer bugun xoʻjaligi qoshida qayta ishlash korxonalari ochish, yangi ish oʻrinlari yaratib, yoshlarni ish bilan taʼminlash niyati bilan yashamoqda. Fermerlarimiz oʻz muammolarini yuqori minbarlardan turib gapirmoqda, mamlakatimizning ijtimoiy-iqtisodiy, siyosiy hayotida amalga oshirilayotgan izchil dasturlarda faol ishtirok etmoqda.

Bularning bari istiqlol bois fermerlarga yaratilayotgan qulay shart-sharoit va imtiyozlar tufaylidir. Tinib-tinchimas va mehnatkash fermerning bundan keyingi ishlarida hamisha omad yor boʻlishini tilaymiz!

Tuman hokimligining Axborot xizmati.