MATONAT VA JASORAT SOHIBALARI

Atrofimizda turfa xislatli insonlar koʻp. Ularga qarab, biriga havas qilsak, yana birlarining hatti-harakatlaridan ajablanamiz. Nega? Chunki tan-joni sogʻ, qadamidan oʻt chaqnaydigan insonlarning oʻz huzur-halovatini koʻzlab, Alloh tomonidan berilgan goʻzal hayot lahzalarini bekorchilik bilan oʻtkazayotganlaridan koʻnglimiz xijil boʻladi. Bunday boqibegʻam insonlar davlat idoralariga goʻyoki oʻz “haq-huquqi”ni talab qilib, oylab murojaat yoʻllashdan, ovul va mahalla fuqarolar yigʻini raislarining qabuliga kelib, moddiy yordam soʻrashdan aslo tortinmaydilar.

Havasimizga, eʼtiborimizga munosib insonlar esa hayot goʻzalligini his qilib yashash umr ziynati ekanligini, garchi imkoniyati cheklangan, qaysidir jihatdan nogironligi bor boʻlishiga qaramay, oldinga intilishga, kelajakka ishonch bilan yaratuvchanlik ruhida yashashga intiladilar va hatto maʼlum yutuqlarga ham erishadilar. Nazarimda bunday koʻngli kemtik insonlarning bu kabi fidoyiliklari yuqorida aytganimizday, davlatning choʻntagiga koʻz tikib yashayotgan boqibegʻam insonlar uchun haqiqiy ibratdir.

Amudaryo tuman Nogironlar jamiyatining aʼzolarining hayotdan oʻz oʻrinlarini topib, ijtimoiy foydali mehnat bilan shugʻullanishlari uchun jamiyat raisi Nilufar Xolboyeva doimo izlanishda, harakatda. Nilufarxonning ishning koʻzini bilib rejalar tuzishi, jamiyat aʼzolarining hayotdan rozi yashashlarini taʼminlashga qaratilgan saʼy-harakatlari tufayli Oliy Majlis huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondining grant-loyihalarida qatnashib, bir necha marta gʻoliblikni qoʻlga kiritdi va gʻoliblik sertifikati asosida ajratilgan grant-mablagʻlarini maqsadli sarflab, rejalashtirilgan loyihalarni muvaffaqiyatli amalga oshirib kelmoqda. Natijada jamiyat qoshida tashkil etilgan tikuvchilik, toʻquvchilik, kompyuter savodxonligi boʻyicha oʻquv kurslarida tahsil olgan jamiyat aʼzolari nafaqat oʻzi va oilasi, balki, atrofidagi insonlar, oʻzlari istiqomat qilayotgan ovul va mahallalar hayotiga faol aralashib, oʻzini-oʻzi ish bilan band qilishdan tashqari, koʻplab yoshlarga kasb-hunar oʻrgatishga muvaffaq boʻlishmoqda.

Jamiyatning faol aʼzolaridan biri Yulduzoy Karimova ikkinchi guruh nogironi. U bolaligidan Amudaryo tuman Nogironlar jamiyati raisi Nilufar Xolboyevaning qoʻllab-quvvatlashi, maʼnaviy ragʻbati tufayli tumanda boʻlib oʻtadigan koʻplab maʼnaviy-maʼrifiy tadbirlarda faol ishtirok etib keladi. Shu bilan birga jamiyat qoshida tashkil etilgan tikuvchilik kursida bichish-tikish sirlarini mukammal oʻrganib, tikuvchilik bilan shugʻullana boshladi. Uning tikkan liboslarini “Yulduzoy tikkan”, deya faxrlanib kiyib yuruvchi mijozlari safi oshgan sari u bu yoʻnalishda oʻz bilim va tajribasini boyitishga qaror qildi. 2013-2016-yillarda Toshkent shahridagi imkoniyati cheklanganlar kasb-hunar kollejida tahsil oldi. Zamonaviy va anʼanaviy-klassik uslubdagi liboslar tikishni yoʻlga qoʻydi. Bir yil davomida oʻzi kabi imkoniyati cheklangan, nogironligi bor yoshlarga chevarlik sirlaridan saboq berdi. U: “qoʻlimda hunarim bor, topish-tutishim yaxshi”, deb shu yoʻnalish boʻyicha toʻxtab qolishni xohlamadi. Ayol kishi borki, albatta bichish-tikish hunari uning ikkinchi mashgʻuloti boʻlishi kerak, degan oʻyda 2019-2023-yillarda Nukus Davlat pedagogika institutida tahsil oldi. Yaqinda oʻqituvchilik diplomini olgan Yulduzoyning orzulari bir jahon. Maqsadi yoshlarga taʼlim-tarbiya berish, ularni yuksak maʼnaviyatli insonlar qilib voyaga yetkazishdek sharafli kasbning qadr-qimmatini oʻz faoliyati orqali oshirib yashash.

Jamiyatning yana bir aʼzosi Sevinchoy Tursunboyeva birinchi guruh nogironi. Sevinchoy oʻziga atrofidagi sogʻlom odamlarning achinish nazari bilan qarashlarini umuman istamadi. Boʻsh vaqtini kitob mutolaasi, turli suratlar chizish bilan oʻtkazadigan Sevinchoy dizaynerlik yoʻnalishga qiziqib qoldi. U liboslar dizayni boʻyicha shugʻullanishdan zavqlanadigan, turli xis rusumdagi, ayniqsa, fasllarga monand liboslar dizaynini yaratish ustida shugʻullana boshladi. Uning toʻrtta faslga monand liboslar dizayni boʻyicha toʻplamlarini koʻrgan jamiyat raisi Nilufar Xolboyeva Sevinchoyning orzulariga qanot bagʻishladi.

- Sevinchoy, qizim, shu toʻplamlaring bilan dizayn yoʻnalishidagi koʻrik-tanlovlarda qatnashib koʻrmaysanmi? – dedi bir kuni bu tirishqoq qizning ijodini koʻrib quvongan Nilufarxon.

Sevinchoy ikkilanib-ikkilanib 2022-yilda Toshkent shahrida boʻlib oʻtgan dizayn yoʻnalishidagi koʻrik-tanlovda ishtirok etib, sovrindorlar safidan joy oldi va koʻrik-tanlovning qimmatbaho sovgʻalari, faxriy yorligʻi bilan taqdirlandi. Uning orzulari koʻp. Kelajakda dizaynerlik yoʻnalishida oʻqib, oliy maʼlumot olish va oʻz bilimi bilan xalqimizga munosib xizmat qilish.

“Bosuv” mahallasida istiqomat qiluvchi Gulnoza Gulmonova ham birinchi guruh nogironi. Garchi imkoniyati cheklangan boʻlsa-da u oʻzini hamisha kuchli va jasoratli insonlar qatorida koʻradi. Bekorchilikni, loqaydlikni inson umrining egovi, deb bilgan Gulnoza onasi Zevar Gulmonovadan chevarlik sirlarini oʻrganishga kirishganida, avvaliga onasi ham uning sabr-toqat bilan tikuvchilik hunarini egallab olishiga unchalik ishonmagandi. Lekin yoshiga nisbatan jasoratli, matonatli, ayniqsa, kuchli sabr-toqatli bu oʻsmir qizaloq onasi koʻmagida quroq tikishni maromiga yetkazib uddalaydigan, hatto yangi-yangi quroq turlarini yaratib, oʻzi mustaqil ravishda ish tikadigan boʻldi. Avval oʻzlarining ehtiyojiga koʻra, quroq koʻrpacha, yostiq, dasturxonlar tikkan boʻlsa, keyinchalik uning ishidan mamnun boʻlgan qoʻni-qoʻshnilar, qarindoshlarining buyurtmalarini bajaradigan boʻldi. U gul-quroq, shaxmat quroq, atirgul quroq, tangacha quroq kabi biri-biridan goʻzal, bejirim quroqlar tikib, tikkan quroqlari bilan dasturxon, yostiq jildlari, divan-kreslo yopqichlarini bezatdi. Tajribasi oshib borgan sari mijozlari safi ham koʻpaydi. Qiz uzatadigan, kelin tushiradigan onalar Gulnoza tikkan ishlarni quvonib-quvonib, “hunaringdan baraka top”, deya olib ketishadigan boʻlishdi. Ayniqsa, Gulnoza yaratgan “sevgi tumori” deb nomlangan naqshin quroqlar kelin toʻylarida chimildiqlarni bezatdi.

- Biri-biriga jips, chirmashib ketgan gul quroqlarda ramziy maʼno bor, - deydi Gulnoza. – Yaʼni, oilalar mustahkam, jips boʻlsin, ikki koʻngil biri-biriga chirmashib ketsin, degan maʼnoda chimildiq quroq-qoshlarini “sevgi tumori” deb nomlaganman.

Oddiygina mato parchalaridan ham goʻzal maʼno-mazmunlar, mohiyatlar topib, el-yurtning ezgu niyatlariga esh boʻlib yashayotgan Gulnozaxon, qalblarida aziz xalqiga yaxshilik qilishdek orzulari ogʻushida oʻz umrlarini kasb-korlari bilan bezatib, xalq mehriga sazovor, intilishdan aslo toʻxtamay hayotlarini nurli va goʻzal tomonga oʻzgartirish yoʻlida baʼzi sogʻlom insonlardan-da fidoyilik bilan mehnat qilayotgan Yulduzoy va Sevinchoylarga mustahkam sogʻlik, matonat va jasorat tiladik. Zero, matonatli va jasoratli insonlargagina baxt-u saodat hamisha yor boʻladi.

Robiya YOʻLDOShEVA.