Xotin-qizlar faoli ayollarning haqiqiy koʻmakchisiga aylangan

Ovul va mahallalarda xotin-qizlar faoli lavozimi joriy etilganiga bir yildan oshigʻroq vaqt boʻldi. Shu davr mobaynida Amudaryo tumanidagi ijtimoiy himoyaga muhtoj, bandligi taʼminlanmagan, tadbirkorlik qilish istagidagi koʻplab xotin-qizlarga yoramlar koʻrsatilib muammolari ijobiy hal etildi. Bu boradagi ishlarning tizimli va samarali yoʻlga qoʻyilishida albatta, mahallalardagi xotin-qizlar faollarining xizmatlarini eʼtirof etmoq lozimdir.

Amudaryo tumani markazidan olisroqda joylashgan Xizr eli mahalla fuqarolar yigʻinining xotin-qizlar faoli Gulnora Matniyazova ham oʻz faoliyati davomida xonadonma-xonadon yurib, hudud xotin-qizlarining turmush tarzi, turli yosh toifasidagi ayollarni qiynab kelayotgan muammolarni oʻrgangan holda yordamlar koʻrsatib kelmoqda.

Mahallada joriy yil boshidan “Ayollar daftariga” 107 nafar ayollar qamrab olindi. Ushbu ayollarga “Ayollar daftari”ga kiritish toifalari boʻyicha turli ijtimoiy-iqtisodiy yordamlar koʻrsatildi.

Bundan tashqari, xotin–qizlar faoli Gulnora Matniyazova hokim yordamchisi Anvar Tajiboyev bilan birgalikda hamkorlikni samarali tarzda yoʻlga qoʻyib ishsiz ayollarga imtiyozli ravishda kreditlar ajratilishiga va bandligi taʼminlanishiga hissa qoʻshib kelmoqda. Shuningdek, mahalladagi 11 nafar ayolga oʻz ehtiyojlari uchun imtiyozli ravishda kreditlar ajratilib elektromotatsikllar berildi.

Mahalla ahlining tinib-tinchimasligi, mehnatkashligi, qolaversa, xotin-qizlar faolining oʻz kasbiga fidoiyligi sabab shahar hududlardagi barcha sharoitlar shu yerning oʻzida yaratilishiga erishilgan.

Mahallada istiqomat qiluvchi Dilbar Xoʻjanova “Xizir eli shirinliklari” nomi ostida non va qandolat tsexini ochib oʻzining tadbirkorlik faoliyatini yoʻlga qoʻydi. Shundan buyon mahalla ahli ortiqcha ovvoragarchilikdan qutildi. Oʻz uyidan bir chaqrim ham nari ketmay toʻy va bazmlar uchun non va non mahsulotlarini, shirinliklarni shu yerning oʻzidan xarid qiladigan boʻldi. Tadbirkor ayol avvalo oʻzining, qolaversa ikki nafar ishsiz kelinlarini ham ish bilan taʼminladi.

Mahalladagi ishsiz ayollardan yana biri Dilbar Abullayeva ham “Ayollar daftari”ning 6-toifasiga kiritilgan edi. Ayolga 2022-yilning dekabr oyida subsidiya ajratilib, 1 sotix tomorqa yeriga issiqxona qurib berildi. Xozirgi kunda u issiqxonadan kattagina daromad olib kelmoqda.

Mahallada parrandachilik yoʻnalishi boʻyicha ham oʻz tadbirkorlik faoliyatini yoʻlga qoʻygan ayollar talaygina. Shulardan biri Hayitjon Jumashevadir. Unga xotin-qizlar faolining koʻmagi bilan 5 mln. soʻm miqdorida pul mablagʻi ajratildi. U bu mablagʻ evaziga oʻz uyida inkubatsiya tashkil qilib, mahalladoshlarini parranda goʻshti va tuxumi bilan taʼminlab kelmoqda.

Xizr eli mahallasida ayollar uchun goʻzallik saloni yoʻqligi xotin-qizlar faolini qiynab kelardi. Bu sohaga qiziqishi kuchli boʻlgan mahalladoshi Mohira Shamurodova bilan yaqindan suhbatlashib, goʻzallik saloni ochishiga yordam berdi. Mohira Shamurodovaga hokim yordamchisi Anvar Tojibayevning tavsiyanomasi ososida 33 mln. soʻm imtiyozli kredit ajratildi.

Biz ijodiy guruhimiz bilan bugungi kunda mahalla ahli oʻz ehtiyojlari uchun shaharga borib kelishi shart emasligini, hamma sharoit va imkoniyatlar shu kichik qishloqning oʻzida mavjud ekanligiga guvoh boʻldik.

Xotin-qizlar faolining esa har bir oilaning dardi va quvonchiga sherikligi, har qanday muammoni mahallaning oʻzida hal qilishga intilishi, ayollarning muammosi uning ham muammosi ekanligi bir kundik ish faoliyati davomida oʻz isbotini koʻrsatdi.

Oramizda Gulnora Matniyazova singari oʻz kasbiga fidoiy mahalla tizimi xodimlari koʻpayaverishiga tilakdoshmiz!

Tuman hokimligining Axborot xizmati.