Qisqa satrlarda

Idoralararo tuman komissiyasining yigʻilishi

24-yanvar kuni tuman hokimligida odam savdosiga qarshi kurashish boʻyicha tuman idoralararo komissiyasining navbatdagi yigʻilishi boʻlib oʻtdi. Yigʻilishda noqonuniy mehnat migratsiyasining va fuqarolarning odam savdosi qurboniga aylanishining oldini olish, xorijdan qaytganlar bilan profilaktik ishlar olib borish hamda hududlarda yangi ish oʻrinlarini tashkil qilish masalalari muhokama qilindi.

"Mehribonlik uyi”ga tashrif

24-yanvar kuni Mangʻit shahridagi 3-maktabgacha taʼlim muassasasi rahbariyati tashabbusi bilan 10 nafar tarbiyalanuvchilar Xoʻjayli shahrida faoliyat yuritayotgan "Mehribonlik uyi” ga mehmonga borishdi.

Kichkintoylar "Mehribonlik uyi”ning 110 nafar tarbiyalanuvchilarini sovgʻa-salomlari va ajoyib kontsert dasturi bilan mamnun qilishdi. Doʻstlik, birodarlik, mehr-oqibat, ona yurtga muhabbat tuygʻulari tarannum etilgan qoʻshiqlar, dilrabo raqslar "Mehribonlik uyi” tarbiyalanuvchilariga ulkan quvonch hadya etdi, oralarida doʻstlik rishtalarini bogʻladi.

Adabiy kecha oʻtkazildi

28-yanvar kuni 1-sonli maktabda tumandagi bir guruh ijodkorlar tashabbusi bilan Oʻzbekiston xalq shoirasi Zulfiya tavalludining 100 yilligiga bagʻishlangan uchrashuv kechasi boʻlib oʻtdi. Kechada yetuk badiiy asarlari, ibratli hayoti va ijtimoiy faoliyati bilan milliy adabiyotimiz va madaniyatimiz rivojiga, xalqimiz maʼnaviyatini yuksaltirishga ulkan hissa qoʻshgan shoiraning hayoti va ijod yoʻli haqida soʻz bordi. Oʻquvchilar shoiraning sheʼrlarini ifodali oʻqib, kuy-qoʻshiqlar ijro qildilar.

Tajriba almashildi

Yaqinda 1-sonli BOʻSMda maktab murabbiylari uchun sportning 8 ta turi – voleybol, basketbol, futbol, tennis, stol tennisi, boks, yengil atletika va badiiy gimnastika mashgʻulotlarining samaradorligiga erishish yoʻl-yoʻriqlariga bagʻishlangan seminar boʻlib oʻtdi.

Seminarda sport musobaqalari hujjatlarini yuritish tartiblari, sport oʻyinlari, musobaqalar oʻtkazishdagi yangiliklar, kelgusida amalga oshirilishi lozim boʻlgan vazifalar xususida keng tushuncha berildi.

Shuningdek, bolalarni sportga yanada kengroq jalb qilish, mashgʻulotlar samaradorligiga erishish borasida yaxshi natijalarga erishayotgan murabbiylar yosh hamkasblari bilan oʻz tajribalarini oʻrtoqlashdilar.