“Baday toʻqay” koʻriqxonasiga sayohat uyushtirildi

“Mahalla” xayriya jamoat fondi Amudaryo tuman boʻlinmasi tomonidan “Obod mahallam” loyihasining ish rejasi asosida oʻrinlarda uchrashuvlar, davra suhbatlari, tanlovlar tashkil etilib aholining ekologiyaga oid bilimlarini kengaytirish maqsadida keng koʻlamli ishlar amalga oshirib kelinmoqda.

Jumladan, atrof-muhitni muhofaza qilish va tabiiy resurslardan oqilona foydalanish sohasidagi qonun hujjatlari talablarini aholining keng qatlamiga tushuntirish maqsadida ovul fuqarolar yigʻinlarida vakillar bilan uchrashuvlar, aholi, ayniqsa yoshlarni tabiatga ehtiyotkorona munosabatda boʻlish, tabiiy resurslarni tejashga daʼvat qilish, ularning ekologiyaga oid bilimlarini oshirish maqsadida hududlardagi maktablar oʻquvchilari oʻrtasida mavzuga oid insholar va rasmlar tanlovlarini oʻtkazish, fuqarolar yigʻinlari huzuridagi ekologiya va atrof-muhitni muhofaza qilish, obodonlashtirish va koʻkalamzorlashtirish boʻyicha komissiyalar faoliyati samaradorligini yanada yaxshilash maqsadida soha mutaxassislari ishtirokida ovul va mahalla fuqarolar yigʻinlari komissiyalari vakillari uchun oʻquv seminar tashkil etilmoqda.

Yaqinda mazkur tashkilot tomonidan yoshlar ongida tabiatga muhabbat tuygʻusini mustahkamlash maqsadida “Barkamol avlod“ bolalar markazining “Yosh ekolog va tabiatshunos” toʻgaragi tarbiyalanuvchilari ishtirokida Beruniy tumanidagi “Baday toʻqay” koʻriqxonasiga sayohat uyushtirildi.

Oʻquvchilarning boʻsh vaqtlarini mazmunli tashkil qilish, bolajonlarga turli kasb sirlarini oʻrgatish maqsadida Amudaryo tumani barkamol avlod bolalar maktabida 7 ta yoʻnalishda mashgʻulotlar olib borilmoqda.

Ayniqsa “Yosh ekolog va tabiatshunos” toʻgaragiga qatnashish uchun oʻquvchilarda xavas juda yuqori boʻlmoqda. Chunki ona tabiatni sevish barchamizga xos xislat. Mazkur toʻgarakning maqsad va vazifalari – yoshlarda ekologik ongni shakllantirish, bugungi kundagi ekologik ahvoldan xabardor etish, sanitariya, gigiyena masalalaridagi malakalarini rivojlantirishga oʻrgatish, bugungi kundagi dolzarb ekologik muammolarni nazariy hamda amaliy koʻrsatib berish orqali oʻquvchilarni tabiatga muhabbat ruhida tarbiyalashdan iborat. Shu maqsadda oʻquvchilar bilan birgalikda tabiat qoʻyniga sayohat uyushtirildi. Oʻquvchilar tabiatning eng goʻzal goʻshasini tomosha qilishga muyassar boʻldilar.

Respublikamizning Beruniy tumanida joylashgan “Baday toʻqay” qoʻriqxonasi 1971-yilda tashkil qilingan. Bugungi kunda bu qoʻriqxona quyi Amudaryo biosfera rezervati deb nomlanadi.

Ayni kunda Oʻzbekiston Respublikasida 8 ta qoʻriqxona va bitta rezervat tashkil qilingan.

Keyingi yillarda aholi sonining oshishi, ishlab chiqarish, korxonalarining jadallashuvi natijasida goʻzal tabiatimizga biroz zarar yetkazildi. Tabiatni asrash, atrof-muhitni muhofaza qilish maqsadida qoʻriqxonalar tashkil qilingan. Qoʻriqxonalar davlat etoloni boʻlib, tabiatning qimmatbaho inʼomlarini inson maqsadlari uchun saqlashdan iborat.

Baday toʻqay qoʻriqxonasida turli xil jonivorlar, qushlar, dorivor oʻsimliklar muhofaza qilinadi. Tabiatimizda yoʻqolib borayotgan oʻsimlik va hayvonot turlari muhofaza ostiga olingan. Qoʻriqxonaning muhofaza qilinadigan asosiy jonivori Buxoro bugʻusi hisoblanadi.1975-yilda koʻpaytirish uchun olib kelingan 2 bosh buxoro bugʻusining soni bugungi kunga kelib 1500 boshga koʻpaydi.

Shuningdek, oʻquvchilar bu yerda qoʻriqxona muzeyi bilan ham tanishdilar. Qoʻriqxona muzeyi turli xil eksponatlarga boy. Muzeyda shu qoʻriqxonada mavjud boʻlgan oʻsimlik turlari, hayvonot turlari haqida maʼlumotlar bor.

Oʻquvchilar bu yerda buxoro bugʻusining yashash tarzini oʻz koʻzlari bilan koʻrib, yaqindan tanishdilar.

Bu sayohat oʻquvchilar koʻnglida ulkan taassurotlar qoldirdi.

Oʻrozali REYIMOV.