TOʻLQIN OVULI DEHQONLARI GʻOʻZA PARVARIShINI AVJ OLDIRMOQDALAR

Gʻoʻza – mamlakatimizda uzoq yillardan beri ekiladigan asosiy ekinlardan biri. Oʻzbekiston ayni kunda ham paxta yetishtirishda dunyoda yetakchi davlatlardan biri hisoblanadi. Bu mehrtalab, parvarishtalab ekinni yetishtirish yaqin-yaqingacha mashaqqatli soha hisoblanib kelingan. Ammo hozirgi kunda ilm-fan yutuqlariga asoslangan, kam xarajat sarflab, tola sifati va hosildorligi yuqori, ertapishar, kasallik va zararkunanda hasharotlarga chidamli, tabiat injichliklariga bardoshli gʻoʻza navlari yetishtirilib ekilayotgani, sohadagi koʻpgina ishlar texnika zimmasiga yuklanayotgani dehqonlarga chinakam yengillik yaratayotir. Gʻoʻza parvarishidagi agrotexnologik tadbirlarning oʻz vaqtida sifatli ado etilishi kuzgi moʻl hosilga zamin hozirlaydi.

Shunisi eʼtiborliki, keyingi yillarda chigit ekiladigan dalalar koʻp yillik begona oʻtlardan tozalanib, lazer tekislagich yordamida tekislanib ekishga sifatli tayyorlanmoqda. Bu ekilgan urugʻning tekis unib chiqishiga, yaxshi rivojlanishiga zamin boʻladi.

Amudaryo tumanining Toʻlqin ovulida paxtachilik bilan shugʻullanayotgan fermer xoʻjaliklarida moʻl hosil yetishtirishning barcha chora-tadbirlari amalga oshirib kelinayotgani bois, har yili moʻl daromad olinayapti. Ayni kunda ovuldagi barcha paxta dalalarda sifatli ekilgan chigitlar unib chiqib, yashil qatorlar hosil qildi. Gʻoʻza nihollarini parvarishlash ishlari oʻz vaqtida ado etilayotir. Gʻoʻza yaganasi sifatli tamomlandi, ilk ishlov berish, yaʼni kultivatsiyalash ham yakunlanish arafasida.

Bu tadbirlar ayniqsa Sardor Matnazarov rahbarlik qilayotgan “Matnazarov Sodiqbek” fermer xoʻjaligida sifatli olib borildi. Yagana qilingan, kultivatsiya qilinib, tagi yumshatilib, oziqlantirilgan gʻoʻza nihollari durkun rivojlanmoqda.

Ushbu xoʻjalikning 81 gektar paxta maydoniga joriy yilda ertapishar, tuproq-iqlim sharoitiga mos “Sulton” navi ekildi. Yerlarni ekishga tayyorlashdan tortib, ekish ishlari ham xoʻjalikning oʻz texnikalari yordamida ado etildi. Mexanizatorlar Otajon Soliyev, Olim Soliyev, Davron Otajonov, Jamshid Toʻraboyevlar bu ishlarda jonbozlik koʻrsatib ishladilar.

Shu kungacha barcha maydonlarga ekilgan chigitlar bir tekis unib chiqdi va sifatli yagana qilindi. Gʻoʻza qator oralarini kultivatsiyalash ishlari ham poyoniga yetay deb turibdi.

Xoʻjalikda paxtadan tashqari 23 gektar bugʻdoy, 2 gektar bogʻ, 1 gektar kartoshka, 1 gektar qovun-tarvuz ekilgan. Jami ekin maydonlari 73 nafar pudratchilarga boʻlib berilgan. Ular oʻzlariga biriktirilgan yerlarda moʻl hosil yetishtirish uchun parvarishni qizitmoqdalar.

Ovuldagi “Azimjon Vaysak” fermer xoʻjaligidagi 63 gektar paxta maydonlaridagi gʻoʻzalar ham yagana qilinib, kultivatsiyalandi.

Shuningdek 22 gektar maydonga ekilgan “Krasnodar” navli bugʻdoy ham sifatli parvarish qilinayotir. Meʼyorida oziqlantirilib, begona oʻtlardan, zararkunanda hasharotlardan himoya qilingani bois, barcha dalalarda moʻl hosil toʻplandi. Boshoqlari egilib turgan bugʻdoyzorlardagi hosilning yigʻim-terimiga ham hozirlik koʻrilayotir.

Xalqimiz rizqi – dehqon mehnatidan. Buni sidqidildan his qilib, barcha ekinlardan yuqori hosil yetishtirishga intilayotgan mirishkor-u mexanizatorlarga tolmas kuch-quvvat tilab qolamiz.

Oygul RAJABOVA.