Qoraqalpogʻiston Respublikasi Vazirlar Kengashi Raisining sayyor qabuli boʻlib oʻtdi

Inson manfaati – oliy qadriyat. Mamlakatimizda amalga oshirilayotgan islohotlar negizida ayni maqsad ustuvor oʻringa qoʻyilayotgani joylardagi oʻzgarishlarda yaqqol sezilmoqda. Binobarin, odamlarni rozi qilish, ularning huquq va manfaatlari himoyasi yoʻlidagi saʼy-harakatlar amaliy natijasini bermoqda.

Ayniqsa, aholi muammolarini yechishning mutlaqo yangi, samarali tizimini yaratish maqsadida yuqori darajadagi davlat organlari rahbarlarining xalq orasiga kirib, muammolarni joyida oʻrganish va hal qilishida muhim vosita boʻlayotgan ommaviy sayyor qabullar oddiy odamlar hayotida muhim oʻrin tutmoqda.

Buni joriy yilning 28-aprel kuni Amudaryo tumanining Qipchoq shaharchasidagi 21-sonli Bolalar musiqa va sanʼat maktabida oʻtkazilgan sayyor qabul ham yana bir karra tasdiqladi.

Qoraqalpogʻiston Respublikasi Vazirlar Kengashi Raisi Farhod Ermanov raisligida boʻlib oʻtgan sayyor qabulda tuman hokimi Sultonboy Yoʻldashev, Vazirlar Kengashi raisining oʻrinbosari Shuhrat Dauletiyarov, sektorlar rahbarlari, tuman hokimi oʻrinbosarlari, tegishli korxona, tashkilotlar rahbarlari hamda turli mavzudagi murojaatlar bilan tumanning ovul va mahallalaridan kelgan aholi vakillari ishtirok etishdi.

Sayyor qabulda 20 nafardan ortiq fuqarolar oʻzlarini qiynab kelayotgan muammolari hamda takliflari bilan murojaat qildi. Murojaatlar asosan, kredit olish, sogʻligini tiklash uchun mablagʻ ajratish, yoʻllarni taʼmirlash, ichimlik suvi tarmogʻini tortish, bandlik, futbol maydonchasi qurishda amaliy yordam berilishini va boshqa masalalarda boʻldi.

Shu oʻrinda aytish kerakki, odamlarni rozi qilish bugun davlatimiz siyosatining bosh maqsadi hisoblanadi. Xalqimizni koʻp yillardan buyon oʻylantirib, tashvishga solib kelayotgan muammolarga yechim topilib, yurtdoshlarimizning farovon turmush kechirishi uchun bor imkoniyatlar ishga solinmoqda.

Sayyor qabulda yurtimizda amalga oshirilayotgan keng koʻlamdagi bunyodkorlik ishlari, yangidan ishga tushirilayotgan tadbirkorlik subʼektlari, ishlab chiqarish va xizmat koʻrsatish korxonlari faqatgina xalq manfaatini taʼminlash, ularning yashash sharoitni yaxshilash maqsadida amalga oshirilayotganligi taʼkidlandi.

Shuningdek, Prezidentimiz Qoraqalpogʻistonga har galgi tashrifida juda katta yangiliklar bilan kelishi, katta miqdorda ajratilayotgan mablagʻlar mahallalar infratuzilmasini yaxshilashga, yirik invistitsion loyihalarni ishga tushirishga sarflanayotgani va buni xalqimiz oʻzining farovon hayotida toʻlaqonli his etib yashayotganligi aytib oʻtildi.

Sayyor qabulda murojaatlaring hech biri eʼtibordan chetda qolmadi va har bir murojaat imkon qadar ijobiy yechimini topishi taʼkidlandi.

Amaliy natijalari bilan ahamiyatli boʻlgan tadbirda aksariyat murojaatlar joyida hal etildi. Yechimiga vaqt talab qiladigan muammolar yuzasidan masʼul shaxslarga topshiriqlar berildi. Shuningdek, murojaatchilarga baʼzi masalalarda huquqiy tushuntirishlar berilib, takliflar esa oʻrganib chiqish uchun qabul qilindi.

Bugungi kunda yurtimizning barcha hududlarida “Xalq davlat idoralariga emas, balki davlat idoralari, rahbarlar xalqqa xizmat qilishi kerak” tamoyili asosida oʻtkazilayotgan bu kabi sayyor qabullar aholi muammolari hal boʻlishida asosiy omil boʻlib xizmat qilmoqda.

Tuman hokimligining Axborot xizmati.