“Obod mahallam” loyihasi doirasida mahallalarda obodligiga hissa qoʻshilmoqda

“Mahalla” xayriya jamoat fondi Amudaryo tuman boʻlinmasi tomonidan “Obod mahallam” nomli loyihasining ish rejasi boʻyicha mahallalarda obodlikni taʼminlash, aholi oʻrtasida sogʻlom turmush tarzini targʻib qilish, aholining tibbiy va ekologik madaniyatini oshirish borasida keng koʻlamli ishlar olib borilmoqda.

Oʻtkazilayotgan uchrashuvlar, davra suhbatlari, tanlovlardan koʻzlanayotgan asosiy maqsad – hududlarni obodonlashtirish va koʻkalamzorlashtirish, atrof-muhit muhofazasiga hissa qoʻshishdan iboratdir.

“Mahalla” xayriya jamgʻarmasi jamoat fondi Amudaryo tuman boʻlinmasi boshligʻi Bahodir Boltaboyev rahbarligidagi guruh aʼzolari Qipchoq ovul fuqarolar hududidagi ishlar bilan yaqindan tanishdi.

Guruh aʼzolari dastlab “Qoraqalpoqyoʻlkoʻkalam” unitar korxonasi aʼzolari, Qipchoq  oʻrmon xoʻjaligi xodimlari tomonidan olib borilayotgan obodonlashtirish ishlarini borib koʻrdilar. Bekbergan Tileoʻboyev, Hamro Choʻtboyev tomorqalaridagi issiqxonalarda erta pishar meva va sabzavotlar yetishtirilmoqda. Bogʻbon Toʻliboy Xudoyberganovning bogʻida nashvati, olma, uzum yetishitirilmoqda. Mahalla faoli Madrim Nametov ovuldagi yaxshi oʻzgarishlar haqida faxrlanib gapirdi.

Uyshin mahallasidagi Omonboy Jalolov xonadoni issiqxonada gul yetishtirish bilan shugʻullanadi. Issiqxonada turli xil gul navlari yetishtirilmoqda.

Shuningdek, “Obod mahallam” loyihasi boʻyicha “Yashil makon” umummilliy dasturi doirasida Toʻlqin, Bobur, Qumyop, Choykoʻl, Qilichboy ovullarida hamda Farovon mahallasida “Mahalla bogʻi”ni yaratish ishlari ham koʻzda tutilmoqda.