1-SONLI MAKTABDA QUShLAR BAYRAMI OʻTKAZILDI
Tabiatning eng fusunkor fasli boʻlgan bahor oylarida yilning eng goʻzal va zavqli bayramlari oʻtkaziladi. Insonlarni ona tabiatga yanada yaqinlashtiradigan ana shunday bayramlardan biri bu – Qushlar bayramidir.
26-aprel kuni 1-sonli maktabda oʻquvchi-yoshlar oʻrtasida atrof muhitga, tabiatga va hayvonot olamiga mehr-muhabbat tuygʻularini uygʻotish, tabiat va qushlar, hayvonot dunyosiga oid bilimlarini namoyish etishga imkoniyat yaratish maqsadida “Qushlar bayrami” oʻtkazildi. Maktabning boshlangʻich sinf oʻqituvchilari tomonidan tashkil etilgan ushbu bayramda oʻquvchilar va ularning ota-oanlari ham faol ishtirok etishdi.
Tadbir munosabati bilan maktab hovlisi va foyesida Amudaryo tumanining betakror tabiatiga mansub goʻzal manzara yaratildi. Tabiatning oʻziga xos noyob vakillari boʻlgan oʻsimliklar olami, oʻquvchilar tomonidan yetishtirilgan gullar, uy sharoitida parvarish qilinayotgan qushlar, tasviriy sanʼat namunalaridan koʻrgazmalar tashkil etishdi. Oʻziga xos ekologik bayram sifatida oʻtkazilgan tadbirda oʻquvchilarning tabiatni asrash, yashil olam vakillari hamda qanotli doʻstlariga boʻlgan munosabati chizgan rasmlari, sheʼrlari, tayyorlagan plakatlari orqali aks ettirildi. Turfa gullar va qushlardan iborat boʻlgan koʻrgazmada oʻquvchilar tabiatga yaqinlik, jonivorlarga gʻamxoʻrliklarini namoyish qilishdi. Tadbir davomida tabiat va ekologiya borasida olinayotgan bilimlar yuzasidan savol-javob ham oʻtkazildi. Shuningdek, oʻquvchilar bilan inson va tabiat munosabatlari, hudud ekologiyasi, davlatimiz tomonidan atrof-muhitni asrashda amalga oshirilayotgan ishlar, hozirgi globallashuv jarayonida tabiat, jumladan, qushlarni asrashda yuzaga kelayotgan muammolar haqida suhbatlar oʻtkazdi. Suhbatlarda oʻquvchilar oʻzlari uyda parvarishlayotgan uy hayvonlari, gullar va yurtimizda uchraydigan qushlar turlari haqida soʻzlab berishdi.
“Qushlar bayrami”da oʻquvchilar ekologiyamizda uchrayotgan muammolar, ularni bartaraf etish yoʻllari sahna koʻrinishlari orqali namoyish etishdi. Oʻquvchilar oʻz ijrolari orqali tabiatga boʻlgan doʻstona munosabatini, aktyorlik mahoratini ham namoyish etishdi.
Taʼkidlash joizki, oʻsib kelayotgan avlodning ekologik madaniyatini, bilim va masʼuliyatini muntazam oshirib borish, ularning atrof-muhit hamda inson salomatligi muhofazasi masalalarida ishtirokini faollashtirish ona tabiatga mehr-muhabbat ruhida kamol toptirish xizmat qiladi. Oʻquvchilar tadbir davomida Qoraqalpogʻiston hududidagi koʻllar va suv havzalari atrofida oʻlkamizda doimiy yashovchi hamda mavsumiy qoʻnib oʻtuvchi qushlarning xalqaro va respublikamiz «Qizil kitob»lariga kiritilgan koʻplab turlari uchrashini, ayni paytda ushbu koʻllarda uchraydigan turlar muhofazasini kuchaytirish, ular sonini koʻpaytirish maqsadida muayyan ishlar amalga oshirilayotgani, ularni asrab-avaylash, qushlarning tabiatdagi oʻrni haqida koʻplab maʼlumotlarni bilib olishdi.
Tabiatga mehr bolalikdan uygʻonadi. Tadbirda oʻquvchilar oʻzgacha ishtiyoq bilan ishtirok etishdi. Bu orqali maktabning boshlangʻich sinf oʻquvchilari orasida tabiatga mehri baland oʻgʻil-qizlar ulgʻayayotgani, ular koʻpchilikni tashkil etishi yaqqol namoyon boʻldi. Boʻlib oʻtgan tadbir oʻquvchilarning yurtimiz tabiatini oʻrganishlarida, uni yanada sevishlarida katta ahamiyatga ega boʻldi.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
