“Besh tashabbus – besh imkoniyat!” loyihasi doirasida 85-sonli maktabda ochiq dars oʻtkazildi

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan “Besh tashabbus – besh imkoniyat!” nomli loyiha asosida yoshlar maʼnaviyatini yuksaltirish, ularning iqtidorlarini yuzaga chiqarish, yoshlarni turli zararli illatlardan ishonchli himoya qilish, ularning sifatli taʼlim olishiga erishish borasida turli tadbirlar, adabiy kechalar, uchrashuvlar oʻtkazilib kelinmoqda.

Shuningdek, yoshlarning adabiyot va sanʼatning barcha turlariga qiziqishlarini oshirishga, sport sohasidagi qobiliyatlarini namoyon qilishlariga, oʻzini oʻzi band qilgan holda tadbirkorlik bilan shugʻullanib, daromad topayotgan yosh ayol-qizlarning ish tajribalarini ommalashtirishga katta eʼtibor qaratilmoqda. Ayniqsa yoshlar oʻrtasida kitobxonlikni keng targʻib qilish boʻyicha tanlovlar, davra suhbatlari oʻtkazilib borilishi natijasida barcha yoshdagi fuqarolar qalbida kitobga boʻlgan qiziqish ortib bormoqda.

Barchaga maʼlumki, Prezidentimiz taklif qilgan uchinchi tashabbus doirasida yoshlar oʻrtasida kompyuter texnologiyalari va internetdan samarali foydalanishga qaratilgan tadbirlarni tashkil qilish belgilangan. Aynan shu maqsadda tumanning Xitoy hududida yashovchi manzilli qoʻllab-quvvatlash daftarlariga kiritilgan yoshlar uchun 85-sonli maktabda “Kompyuter texnologiyalari va internetdan samarali foydalanish” mavzusida ochiq dars oʻtkazildi.

Mazkur maktabda tajribali ustozlar – matematika va informatika fani oʻqituvchilaridan Gavhar Saparboyeva hamda Ogʻabek Yoʻldoshevlar koʻp yillardan buyon oʻquvchilarga kompyuter texnologiyalari va internetdan samarali foydalanish borasida oʻzlarining bilim va tajribalarini oʻrgatib kelmoqdalar. Ustozlaridan olgan saboqlari esa yoshlarning kelgusi hayotlarida qayerda va qaysi kasbda ishlamasin dasturulmal boʻlib xizmat etib kelmoqda.

Ochiq dars ochilishida “Jayxun ilhomlari” nodavlat notijorat tashkiloti raisi Oʻrozali Reyimov chiqib gapirib tashkilot tomonidan olib borilayotgan ishlar, butun mamlakatimizda boʻlgani kabi tumanimizda ham maktab oʻquvchilari zamonaviy maktab binolarida eng ilgʻor oʻquv qurollaridan foydalangan holda bilim olayotganligini faxr bilan aytib oʻtdi.

Matematika va informatika fani oʻqituvchisi Gavhar Saparboyeva oʻquvchilarga kompyuterlardan samarali foydalanishning ilgʻor dasturlari hamda ochiq dars oʻtkazilishidan asosiy maqsad yoshlarning kompyuter va internetdan samarali foydalanish borasidagi bilimlarini yana bir bor sinovdan oʻtkazish ekanligini bildirdi.

Ochiq dars “funktsiyalar va oʻzgaruvchilar mavzusiga oid amaliy mashgʻulot” deb ataldi. Oʻquvchilar oldiga funktsiyadan foydalangan holda berilgan ikkita sonning eng katta umumiy boʻluvchisini topish dasturini tuzish vazifasi qoʻyildi.

Oʻtkazilgan ochiq dars maktab oʻquvchilarning kompyuter texnologiyalari va internetdan samarali foydalanish borasidagi bilim va koʻnikmalari juda yuqori ekanligini koʻrsatdi.

Oʻ.Reimov, "Jayxun ilhomlari" NNT raisi