XORIJIY TILLARNI OʻQITISh BOʻYIChA ENG YaXShI MAKTAB ANIQLANDI

Oʻzbekiston Respublikasi Prezidentining “Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida”gi 2021-yil 19-maydagi Qaroriga asosan 19-aprel kuni Amudaryo tumanidagi 40-sonli maktabda “Xorijiy tillarni oʻqitish boʻyicha eng yaxshi maktab” tanlovining tuman bosqichi oʻtkazildi.

Ushbu tanlovni oʻtkazishdan koʻzlangan maqsad – maktablar oʻrtasida sogʻlom raqobat muhitini shakllantirish, ularda xorijiy tillarni oʻqitishning darajasi va sifatini oshirishni ragʻbatlantirish, oʻqitish sifati boʻyicha xalqaro mezon va standartlarga muvofiq yuqori koʻrsatkichlarga erishishga zamin yaratishdan iborat. Shuningdek, maktablarda xorijiy tillarni oʻqitish boʻyicha amalga oshirilayotgan chora-tadbirlar natijadorligini tahlil qilish, xorijiy tillar boʻyicha oʻquvchilarga sifatli taʼlim berayotgan, samarali faoliyat olib borayotgan oʻqituvchilarni aniqlash va ragʻbatlantirish, tanlovda yuqori koʻrsatkichlarni qayd etgan maktablarni ragʻbatlantirish, ularning tajribasini ommalashtirishga eʼtibor qaratish mazkur tanlov tashkilotchilarining asosiy vazifalariga kiradi.

Tanlov Nizomiga asosan har bir maktabdan bir nafardan ingliz, nemis yoki frantsuz tili boʻyicha 7- 9-sinflarda tahsil oladigan 5 nafar oʻquvchidan tashkil topgan bitta terma jamoa ishtirok etishi belgilangan. Unga koʻra, tanlovda tumanimizning 70 ta umumtaʼlim maktablaridan 343 nafar oʻquvchi ishtirok etdi.

Tanlovda ishtirok etish istagini bildirgan 70 ta maktab 2022-yil sentyabr-dekabr oylarida Oʻzbekiston Respublikasi Maktabgacha va maktab taʼlimi vazirligining axborot tizimiga Vazirlik tomonidan belgilangan asosiy koʻrsatkichlarini kiritdi va tizim tomonidan baholandi. Maktab terma jamoasining xorijiy tillarni bilish darajasi test topshiriqlari vositasida sinovdan oʻtkazildi. Test sinovlari barcha tuman va shaharlarda bir vaqtda, 2023-yil 19-aprel kuni soat 11:00 da boshlandi va bir vaqtda, 12:30 da yakunlandi.

Xorijiy til bilish darajasini aniqlashga qaratilgan test topshiriqlari 7-9-sinf oʻquvchilari uchun moʻljallangan boʻlib, topshiriqlar xalqaro taʼlim standartlari asosida tayyorlangan 30 ta topshiriqdan iborat boʻlib, maktab terma jamoasining bali jamoa aʼzolari toʻplagan jami ballarni 5 ga boʻlgan holda aniqlandi va asosiy koʻrsatkichlarga qoʻyilgan ballar qoʻshilgan holda maktabning umumiy natijasi aniqlandi.

Umumiy natijaga asosan eng yuqori ball toʻplagan maktablar ballar ketma-ketligiga koʻra, 1-oʻrinni tumanimizning 40-sonli maktabi, 2-oʻrinni- 30-sonli maktab, 3-oʻrinni 56-sonli maktablar egalladi. Tuman bosqichida 1-oʻrinni koʻlga kiritgan maktab Qoraqalpogʻiston Respublikasi bosqichida qatnashish huquqiga ega boʻldi.

Tanlov nizomiga koʻra, gʻoliblar Oʻzbekiston Respublikasi Prezidentining sovrini bilan mukofotlanadi, yaʼni, tuman yoki shahar bosqichida 1-oʻrin uchun — 100 million soʻm, 2-oʻrin uchun — 75 million soʻm, 3-oʻrin uchun — 50 million soʻm. Mukofot pullari tuman yoki shahar mahalliy byudjetlari hisobidan ajratiladi.

Qoraqalpogʻiston Respublikasi, viloyatlar va Toshkent shahar bosqichida 1-oʻrin uchun — 250 million soʻm, 2-oʻrin uchun — 200 million soʻm, 3-oʻrin uchun — 150 million soʻm mukofot puli ajratilgan boʻlib, ushbu mablagʻ Qoraqalpogʻiston Respublikasi byudjeti, viloyatlar va Toshkent shahar mahalliy byudjetlari hisobidan ajratilishi belgilangan.

Oʻzbekiston Respublikasi bosqichida esa 1-oʻrin uchun — 500 million soʻm, 2-oʻrin uchun — 400 million soʻm, 3-oʻrin oʻrin uchun — 300 million soʻm pul mukofotlari beriladi va mablagʻ respublika byudjetidan va Xalq taʼlimi vazirligining markazlashgan xarajatlariga ajratiladigan mablagʻlar hisobidan qoplanadi.

Biz tanlovning tuman bosqichi gʻoliblarini chin dildan tabriklaymiz va keyingi bosqichlarda omad tilaymiz.

Ravshan BAHROMOV