Amir Temur nomli ovulda Navroʻz sayli oʻtkazildi

Oʻzbekiston Respublikasi Prezidentining “2023-yilgi Navroʻz umumxalq bayramiga tayyorgarlik koʻrish va oʻtkazish toʻgʻrisida” qabul qilgan qarorida Navroʻzi olamning falsafasida mujassam boʻlgan yaxshilik va bagʻrikenglik, ahillik, hamjihatlik kabi yuksak insoniy fazilatlarni, ajdodlarimizdan meros boʻlib kelayotgan qadimiy urf-odat va anʼanalar, qadriyatlarimizni aholi, xususan yoshlarga keng targʻib etish maqsadida bayramni umumxalq sayillari shaklida koʻtarinki ruhda oʻtkazish belgilangan. Bundan koʻzlangan maqsad yurtimizda hukm surayotgan tinchlik, doʻstlik, birodarlik tuygʻularini mustahkamlash, xalqimiz, yosh avlod qalbida Vatanimizning buguni va kelajagiga daxldorlik tuygʻusini kuchaytirishdir.

Tumanimizning barcha ovul va mahallalarida, mehnat jamoalarida, maktabgacha va umumiy oʻrta taʼlim muassasalarida Navroʻz bayrami koʻtarinki ruhda nishonlandi. Bahoriy yangilanish va bunyodkorlik ruhini, ona zaminga mehr, eʼtibor, inson va tabiat oʻrtasidagi uygʻunlikni ifoda etadigan, kishilarni bugungi tinch hayotni qadrlab, ezgu orzu-umidlar bilan yashashga undaydigan bunday maʼnaviy-maʼrifiy, madaniy tadbirlar barchada yorqin taassurotlar qoldirdi.

Shu yilning 22-mart kuni tumanimizning Turkmaniston davlati bilan chegara hududida joylashgan Amir Temur ovulida ham “Har kuning Navroʻz boʻlsin, jonajon Oʻzbekistonim” degan gʻoya singdirilgan bayram tadbiri boʻlib oʻtdi.

Ovul fuqarolar yigʻini binosi oldi bayramona bezatilib, dasturxonga Navroʻz taomlari sumalak, koʻksomsa, goʻja, palov, chelpak va ovulning chevar pazanda qizlari tayyorlagan bahoriy neʼmatlar tortildi. Tadbirga tashrif buyurgan turli millatga mansub ovul nuroniylari muʼtabar otaxonlar, onaxonlar va barcha aholi shoʻx musiqa sadolari ostida kutib olindi.

Navroʻz sayliga tashrif buyurgan tuman hokimi birinchi oʻrinbosari Rashid Salayev barchani qutlugʻ ayyom bilan tabrikladi, ovul mehnatkashlarining bahorgi ekin-tikin ishlariga baraka tiladi. Ovul keksalarining qutlovlaridan soʻng haqiqiy sayil – oʻyin-kulgular boshlandi. Shu ovul farzandi Rashid Rahimovning goh oʻzbekcha, goh turkmancha, goh qozoqcha qoʻshiqlariga ovulda bir ota-ona farzandlariday ahil-inoq yashab kelayotgan turli millat vakillari yayrab raqsga tushdilar.

Shunisi eʼtiborliki, ushbu hudud tumanimizning boshqa ovul va maxallalaridan koʻpmillatliligi bilan ajralib turadi. Ularning urf-odatlari turlicha boʻlsa-da, quvonchi bir, bir-birining tashvishiga yelkadosh.

Navroʻzi olam saylida ham ovul aholisining koʻngillari-koʻngillariga hamroz ekanligi yaqqol koʻrindi. Oʻyin-kulgulardan soʻng tomosha kurash, arqon tortishish, qoʻchqor, it urishtirish kabi koʻngilochar qadimiy oʻyinlar bilan davom etdi. Sayilni tashkillashtirishga bosh boʻlgan ovul fermerlari ushbu musobaqalar sovrini uchun 3 ta oʻjak, 8 ta echki qoʻydilar va gʻoliblarga topshirdilar.

Navroʻzi olam sayli ovul aholisiga koʻtarinki bahoriy kayfiyat ulashdi va qadimiy bayramimizga hurmatini oshirdi, “Har kuning Navroʻz boʻlsin, jonajon Oʻzbekistonim” degan ezgu tilak har koʻngilda jarang sochdi.

Oygul RAJABOVA.