“XAVFSIZ HAYoT UChUN!” ShIORI OSTIDA VELOMARAFON OʻTKAZILDI

Dunyoning turli burchaklarida urush-nizolar, davlatlararo munosabatlarda ziddiyatlar kuchayayotgan bugungi kunda yoshlarning ong-shuurini, tafakkurini toʻgʻri shakllantirish, ularni ham ruhan, ham jismonan barkamol qilib voyaga yetkazish dolzarb vazifaga aylangan. Chunki kelajak – yoshlarniki. Ularni oʻz Vataniga sodiq, ota-onasi, oilasi, chor-atrofidagi odamlarga mehrli, el xizmatiga kamarbasta, fidoyi qilib voyaga yetkazish – yurtimiz tinch-osuda, obod, farovon boʻlishini taʼminlaydi.

Ilmli, intiluvchan, yurtiga xizmat qilishga shay avlodni voyaga yetkazishda, ularni yot gʻoyalardan, illatlardan asrashda sogʻlom turmush tarzining oʻrni alohidadir. Sogʻlom turmush tarzi jismoniy faollik bilan uzviy bogʻliq.

Shularni inobatga olgan holda Amudaryo tumani hokimligi, Yoshlar ishlari agentligi tuman boʻlimi Ichki ishlar boʻlimi va tuman Bolalar-oʻsmirlar sport maktabi hamkorligida “Xavfsiz hayot uchun!” shiori ostida velomarafon oʻtkazildi.

Aslini olganda bahor faslining ajib tarovati, ona zamin bagʻridan maysalarning unib chiqish-yu chor-atrofimizni qurshagan dov-daraxtlarning yashil libos kiyib, tabiatning oʻzgacha koʻrkamlik kashf etishi kishi koʻngliga ajib bir masrurlik baxsh etadi, har bir kuni qutlugʻ kunday, bayramday taassurot uygʻotadi odamda.

Ana shunday shukuhli damlarda tumanimizning barcha ovul va mahallalaridan kelgan 700 nafardan ortiq yoshlarni, oʻsmirlarni birlashtirgan velomarafon ham haqiqiy shodiyonaga aylanib ketdi. Bir safga tizilgan musobaqa ishtirokchilarini tuman Ichki ishlar boʻlimi boshligʻi Jaloladdin Yusupov, yoʻl harakati xavfsizligi boʻlimi boshligʻi Murat Mirzamuratov, Yoshlar ishlari agentligi tuman boʻlimi boshligʻi Sardor Ismoilov, Bolalar-oʻsmirlar sport maktabi direktori Chorsham Tojimurodovlar gʻoliblik uchun kuch sinashishga kelganliklari bilan qutladi.

“Xavfsiz hayot uchun” shiori ostida sogʻlom turmush tarzi tamoyillari asosida jismoniy barkamolligini namoyish etishga chogʻlangan velosport ishqibozlariga muvaffaqiyatlar tiladilar. Musobaqaga start berilishi yoshlarning shodon qiyqiriqlari bilan olqishlandi. Velomarafonchilar Oʻrta qalʼa ovulining “Vaxum” aholi punktidan Doʻstlik mahallasi hududiga – tuman hokimligi binosigacha boʻlgan yoʻlda gʻoliblik uchun oʻzaro bellashdilar.

Eng chaqqon, eng intiluvchan velosipedchilarning marra chizigʻiga yetib kelishi qarsaklar bilan olqishlandi.

Velomarafon gʻoliblari shu yerning oʻzida taqdirlandi. Ularni tuman hokimi Sultonboy Yoʻldoshev, Ichki ishlar boʻlimi boshligʻi Jamoladdin Yusupovlar qizgʻin qutladilar va barcha ishtirokchilarga ham minnatdorchilik bildirdilar.

Velomarafon gʻoliblariga musobaqa tashkilotchilarining qimmatbaho sovgʻalari topshirildi.

“Xavfsiz hayot uchun!” Ushbu shiorning oʻzi barcha ishtirokchilarga koʻtarinki kayfiyat va motivatsiya berdi, sogʻlom, xavfsiz hayot kechirishga ragʻbatlantirdi.

Oygul RAJABOVA.