“HAR KUNING NAVROʻZ BOʻLSIN, JONAJON OʻZBEKISTONIM!” ShIORI OSTIDA NAVROʻZ SAYLI VA BAYRAM TADBIRI OʻTKAZILDI

Bu yilgi koʻklam yurtimizga oʻzgacha tarovat, shukuh bilan kirib keldi. Koʻklamni sogʻingan dillarga uning tashrifi iliqlik baxsh etdi, ruhini koʻtarib, yuraklardagi zavq-u shavqni oshirdi. Elimizda koʻtarinkilik, joʻshqinlik bilan Navroʻzi olam tadorigi boshlandi. Yashil maysalar bosh koʻtarayotgan zamin-u, qushlar chugʻuriga toʻlayotgan feruzarang samo, biz nafas olayotgan musaffo havoni ovul va mahallalarda hamjihatlikda pishirilayotgan shoh taom – sumalakning xushboʻy hidi tutdi.

Yurtimizga mana shunday shod-u xurramlik, quvonch ulashib, qutlugʻ qadam bilan Navroʻzi olam kirib keldi. Ushbu bayramni munosib nishonlash boʻyicha 2023-yil 1-mart kuni Oʻzbekiston Respublikasi Prezidentining «2023-yilgi Navroʻz – umumxalq bayramiga tayyorgarlik koʻrish va uni oʻtkazish toʻgʻrisida»gi Qarori qabul qilindi. Unga koʻra, bu yilgi Navroʻz bayrami mamlakatimizda «Har kuning Navroʻz boʻlsin, jonajon Oʻzbekistonim!» degan bosh gʻoya asosida nishonlanishi belgilandi.

Tumanimizda ham ushbu shior ostida katta bayram sayli oʻtkazildi.

18-mart kuni tumandagi Markaziy oʻyingohda boʻlib oʻtgan ushbu sayilga butun amudaryoliklar, yosh-u qari yurtdoshlarimiz tashrif buyurishdi. Nuroniy otaxonlar, moʻʼtabar onaxonlar bayramona bezatilgan soʻrilar, shohsupalarda oʻtirib, milliy anʼanalarimiz boʻlgan yor-yor, laparlar kuylashdi, quroq qurab, ip yigirib, aytishuvlar aytishdi. Navroʻz bayrami tumanimizning ovul va mahallalarida, shahar va qishloqlarda ham keng nishonlanmoqda.

Qator koʻrkam rastalarda tashkil qilingan milliy hunarmandlik mahsulotlari, milliy taomlar, savdo yarmarkalari, nafosat bilan bezatilgan dasturxonlar koʻzlarni yashnatdi.

Bayram tomoshasi boshlanishidan oldin tumanimiz rahbarlari va mehmonlar birgalikda xalqimiz bilan muloqot qilib, koʻrgazmalarni koʻzdan kechirishdi, sayil ishtirokchilarini bayram bilan tabriklashdi. Shundan soʻng, “Ofarin” folklor-etnografik xalq jamoasining karnay-surnay navolari bilan bayram tomoshasi boshlandi.

Tuman hokimi Sultonboy Yoʻldashev butun Amudaryo ahlini Navroʻzi olam bilan muborakbod etdi va yurtimizdagi bunyodkorliklar, erishilgan yutuqlar xususida soʻzladi. Tabrikdan soʻng, “Fasli navbahor tarannumi” deb nomlangan musiqiy dastur boshlandi.

Dasturda tumanimizning estrada xonandalari qatori isteʼdodli yosh xonandalar ham ishtirok etishdi. Shuningdek, bolalar badiiy jamoalari oʻzlarining yangi qoʻshiq va raqslarida bahor quvonchlarini ifoda etdilar. Amudaryo tumaniga xos boʻlgan mumtoz navolar, askiyachilik, masxarabozlik, xalq sanʼati, urf-odatlar namoyish etildi aytishuv, laparlar, yor-yorlar yangradi. Xalqimizning milliy merosi – urf-odatlari, anʼanalari mujassam boʻlgan chiqishlar bayramga oʻziga xos betakror ohang va maʼno bagʻishladi.

Navroʻz bayrami munosabati bilan boʻlib oʻtgan ushbu sayilda amudaryoliklar jam boʻlib, birdamlik, hamjihatlik anʼanalariga sodiqligini yana bir karra namoyon etishdi. Bayram tomoshasi barcha yurtdoshlarimizga bahoriy kayfiyat, koʻtarinki ruh ulashdi.

Tuman hokimligining Axborot xizmati.