SAYYoR SUDDA PROBATsIYa HISOBIDAGI 7 NAFAR ShAXS MUDDATIDAN ILGARI JAZODAN OZOD ETILDI

Durunki mahalla fuqarolar yigʻini maʼmuriy binosida Jinoyat ishlari boʻyicha tuman sudi tomonidan sayyor sud oʻtkazildi.

Sayyor sudda Jinoyat ishlari boʻyicha tuman Amudaryo tuman sudi, Prokuratura, Ichki ishlar organlari Probatsiya guruhi masʼullari qatnashishdi. Ushbu sayyor sud majlisida muayyan huquqdan mahrum qilish, axloq tuzatish ishlari, ozodlikni cheklash jazolariga sud tomonidan hukm qilingan mahkumlarni Oʻzbekiston Respublikasi Jinoyat Kodeksi talablari asosida jazoni oʻtashdan muddatidan ilgari ozod qilish toʻgʻrisidagi 7 ta taqdimnomalar koʻrib chiqildi. Natijada, haqiqatda mehnatga halol munosabatda boʻlgan va jazo oʻtashning tartib qoidalariga rioya qilib, tuzalish yoʻliga oʻtgan 7 nafar mahkum Jinoyat Kodeksining insonparvarlik va odillik tamoyillariga asosan jazoni oʻtashdan muddatidan ilgari shartli ravishda ozod qilindi.

Sudda ishi koʻrilayotgan mahkumlarning barchasi tuman fuqarosi ekanligi, ular Oʻzbekiston Respublikasi Jinoyat Kodeksining tegishli moddalariga koʻra jazoga tortilgani, hozirgi kunda belgilangan jazoning maʼlum qismini oʻtagani toʻgʻrisida maʼlumot berildi. Maʼlum boʻlishicha, ushbu mahkumlarning 1 nafari Oʻzbekiston Respublikasi Jinoyat Kodeksining 25-, 169-moddalariga koʻra jazoga tortilgan. U savdo faoliyati bilan shugʻullanuvchi masʼuliyati cheklangan jamiyatlaridan biriga ishchi sifatida qabul qilingan va hozirgi kunga qadar ishlab kelmoqda. Mahkum jazoni oʻtash tartib va qoidalariga toʻliq amal qilmoqda. Shu sababli uning axloq tuzatish ishlari jazosining oʻtalmagan muddatidan ilgari shartli ravishda ozod qilish masalasini koʻrib chiqishlik uchun sudga taqdimnoma kiritilgan.

Undan tashqari, Jinoyat Kodeksining 122-moddasi 1-qismi bilan 1-yil muddatga ahloq tuzatish ishlari jazosiga sudlangan yana bir shaxs ham oilaviy korxonaga ishchi boʻlib qabul qilingani, hozirgi kunga qadar ishlab kelayotgani, jazoni oʻtash davrida oʻzining jinoiy qilmishlarini toʻliq anglab yetib, tuzalish yoʻliga qatiy oʻtgani, belgilangan tartiblariga amal qilayotgani sababli muddatidan ilgari shartli ravishda ozod qilish masalasini koʻrib chiqish uchun sudga taqdimnoma yuborilgan. Shuningdek, Kodeksning 105-moddasi bilan 3-yildan ziyod muddatga, 128-moddasi bilan 1-yil muddatga, 266-moddasi bilan 3-yil muddatga, 211-moddasi bilan 2-yil muddatga, 118-moddasi bilan 7-yil muddatga ozodlikdan mahrum qilingan boshqa mahkumlarni ham Probatsiya nazorati davomida munosib xulq-atvorda boʻlganligi sababli muddatidan ilgari shartli ravishda ozod qilish masalasini koʻrib chiqishlik uchun sudga taqdimnoma kiritilgan.

Sud ishi davomida mahkumlarga tegishli hujjatlar birma-bir oʻrganildi, tomonlarning koʻrsatmalari tinglanib, bir xulosaga kelindi. Jazo oʻtash tartib-qoidalariga amal qilib, sud tomonidan zimmasiga yuklatilgan majburiyatlarni bajargan va mehnatga halol munosabatda boʻlganligi uchun 7 nafar mahkum oʻtalmagan jazo muddatidan Oʻzbekiston Respublikasi Jinoyat Kodeksining 73-moddasiga asosan muddatidan ilgari shartli ravishda ozod qilindi.

Oʻzlariga tegishli xulosalar chiqarib olgan ushbu shaxslarga zimmalaridagi majburiyatlar yana bir bor tushuntirildi. Jazodan ozod qilinganlar jinoyatining oqibatlarini toʻla anglab yetganligini, tuzalish yoʻliga oʻtganligini, endilikda oʻzlariga berilgan bu imkoniyatdan oqilona foydalanishini aytib, davlatimizga va masʼullarga minnatdorchilik bildirishdi.

Bu kabi tadbirlar pofilaktik ishlar samaradorligini oshirib, jinoyat va huquqbuzarliklarning barvaqt oldi olinishini taʼminlaydi.

A.Safarov, Jinoyat ishlari boʻyicha Amudaryo tuman sudi raisi.

R. Iskandarov, tuman IIB Probatsiya guruhi katta inspektori.